Read Medumba Habakuk 1 Bible Online

Habakuk 1 - Medumba bible

Habakuk 1

¹Ntshob Nsi mi Habakuk, ngatshob ntshob Nsi ju' mum njem nà.

²Tshùaben, me nsi ke tsiaṅ o be ke ju' nz'àm tà kum à ndùke? Me kua' ntsiaṅ o num nu nefètte lem! Là o ke tshu' àm.

³Numk'o nke mfaṅ me njen nukebwô, o bèn mbèn mbe ngakwénta nuketsin à? Nefétte bo nefètte lem tshwèt nke nzin mbwe àm; ntanta num bwe, nefagte bù' wul i nsi.

⁴A ndùlala ntshù' tù' b'a nke'kèt, nu ndaṅndaṅ ke' bèn nebù' tu i nsi; nummbe ngatshùagntù bu'te mèn netsine. A ndùlala nu ndaṅndaṅ tù' b'a nke'kèt.

⁵Bin ma' lag ntùm ngôngô ndôte njene; bin tshàme, bwôg tshùb zine! Nummbe m'a' fa' ta' ju mum tsin lé'njù, fa' se be bin ke bam, a be ze bo soṅ zin à nesoṅ nà.

⁶Tshù, m'a' tènte ba Kaldéa, nzwit tshùag mba ghayabnge' tse bo be num nta'nta' nkam tsha' num nelo' tsha' ts'a ke' b'a tshob là.

⁷Yen nzwit là kuni neshu, nke nkag bwôg, ze nenùn mba ze ka'te ke ntum à be tu wul i;

⁸tse nyàmdiaṅ be mfùag wut ntshùa nzwimàntô. mfùag wut ntshùa mbù fèn mfetnjù. Tse ghako' nyàm ke ndo' à ka'te nse' yi; tse ghako' nyàm tshwèt nse' tà ngùanesà, bo tshwèt mfùt mba bebabsa' z'a tshwèt nswe' ghom ju nsi là.

⁹Yen nzwit mèn nà se' nelagt'a dù'; bo be nse' à mba fetmbaṅ z'a fe bag ntumnyam nà, nke nkùmte ghandàtsha mba bo kùmt'a nkwango' là.

¹⁰A tshabte fenfen, fenfen b'a tshu komzwi mbwe i; a zwi tse num tshob kàbngô, a be nkùmte tsha'a, ndo'o.

¹¹A ndùlala ze ngù' ke nko' à be neko'o, a nke nèn dù' z'a nèn nà, nke mfàn nu nèn be mbwe. Ze nsi z'a ghù là b'a neta i.

¹²A ke b'a wù bèn mbe Tshùaben, Nsi àm mba yàm Nsi Nelàn fe tà ndùke lo, fe mbwembwe ké? Be bag ke kwù! Ô Tshùaben! O yab yen nzwit mèn n'a ndù a tsho'te tsho ntsha. Ô gholoṅ sàm! O tènt'é à ndù a yab nge' num yu tu.

¹³Miag mu làn neshu neyen nukebwô, o ke' be lôte mfànnu benntùn. B'o lôte ghatatte mi ntswe ke ntshob nu, ndùse ngatshùagntù tshwèt mi mèn z'a tsin ntshùa i l'à ndùke?

¹⁴O ke ndo' benntùn nà à mba ngontse dibantse là, mba nyàm z'a be nsoṅ bam se nsi, ke ghù ghalôt'é là.

¹⁵Yen nzwit mèn nà be ndo' lub nsô yub yi tun ntse, ndo' mbunjà nsoṅ yub yi, ntse'te njoṅ i fa naṅ ntùm dua': Ndùlala mbe ntùm tsiaṅte, nke ṅwate.

¹⁶A ndùlala a be mfà jule'te Nsi mbunjà i, nton tshu nelamte dua' se, nummb'a be ntshùa njam bo ze bag i tsho nyàm, ze jujù lamte.

¹⁷Ndùlala nsi sô k'a tshwètte mbunjà i ké? A nsi ke zwite ngôngô ke ko ndèn ké?