Read Medumba Agé 1 Bible Online

Agé 1 - Medumba bible

Agé 1

¹A lo be mbatte ngu'njù bàa mba Darius jù fen nà, mum mbwe lé'njù ntùm ṅwù ntôge, Tshùaben tshùa num ntshu Agé ngatshob ntshob Nsi, ntshob Zorobabél nshum Salatiél, ngomna Yuda mba Yoshua nshum Yotsadak, ngale'te Nsi ze ndùb, ndù:

²Tshùaben tàndà ntsho tshob ndù: Yen nzwit mèn ni be ntshob ndù: Ngelaṅ ke' yoṅ nku'u, ngelaṅ ke' yoṅ nku' nebèn nkut ndà Tshùaben!

³Tshùaben tshùa num ntshu ngafa' i Agé ngatshob ntshob Nsi, ntshob men ntshob mi li ndù:

⁴Ndù a b'a ngelaṅ ni netswe ntùm ndà tsin tse bin nabte mebwô là, ndùse yen ndà li bo sate tù' fam nà ké?

⁵Ndùlala tshù mba Tshùaben tàndà ntsho tshob li: Bin lôte zin nebe njene!

⁶Bin be njwit yàme, ntsho' à metsili, bin be njù, là ke ywèt, bin be nu, ntù tsin nke nke' nkù, bin be nket nzwe wut tsin ke dum; ngalo' nkàbfa' be ndo' ma' à ntùm totun bàm.

⁷Ndùlala Tshùaben tàndà ntsho tshob ndù: Bin lôte zin nebe njene!

⁸Bin ko' nse' num mbale, bin lo' ntshwèn nse' yi ndù bin kut ba' àm: Me nsi ghù tsiaṅte bwe, bo ghamt'àm, Tshùaben bèn ntshobe.

⁹Bin lo ke nkwate neghù yàme, ndonni bin ghù à metsili; ndùse bin ke ndo' ntsho yi ndà là, me fùag ywèt tshàm num bwe. Numke? Tshùaben tàndà ntsho bèn mbètte. Num nu ndà àm z'a sate ntù' fam, là mba we lo netèt bin nke nànte be num ze ba' là.

¹⁰A ndùlala ze kamànyam nyam zin meme', tsha' nyam zin ntàm mi là.

¹¹Me lo ghù dù' jum mum ngô mba num ba mbale, ngù ngefele, nsa, ndu' bo mfèt jum, ngù njoṅ tshu fa ts'a be a tum mum tsha' là jum, ngù benntùn mba ba nyàm jum boa njoṅ mfa' mbu fa.

¹²Zorobabél, nshum Salatiél, Yoshua, nshum Yotsadak, ngale'te Nsi ze ndùb, mba njoṅ tshé' ngô fa ju' nze Tshùaben Nsi yub mba ntshob Agé ngatshob ntshob Nsi, ndaṅndaṅ mba ntum ze Tshùaben Nsi yub tshob là. Ndùlala bwôg tshùb ngô mbwe Tshùaben.

¹³Agé ngantum Tshùaben tshob ngô ndaṅndaṅ mba Tshùaben tshob là ndù: Me b'a bag à bin, Tshùaben bèn ntshob ndùlala.

¹⁴Ndùlala Tshùaben kamte ywèt Zorobabél, nshum Salatiél, ngomna Yuda, bo ywèt Yoshua nshum Yotsadak ngale'te Nsi ze ndùb mba ywèt njoṅ tshé' ngô fa. Bo se', nto' fa' mum ndà Tshùaben tàndà ntsho, Nsi yub,

¹⁵mum lé'njù ntshob kuà ṅam mbàa mum ṅwù ntôge, ntùm mbatte ngu'njù bàa mba Darius jù fen nà.