Read Medumba Sakaria 12 Bible Online

Sakaria 12 - Medumba bible

Sakaria 12

¹Ntàmtenu Tshùaben ntùm ntshob mi num Israél. Tshùaben z'a nyitte kamànyam, nte tsha' nsi, mbèn nabte ywèt ts'a be num mènntùn nà tshob ndù:

²Me nsi lo' Yérusalém ghù ntu' femni yi num njoṅ ntumntum fa tse bo diaṅ i mbum nà. Nge' nsi tsho mba Yuda ndùse bo nsi lo' Yérusalém nà.

³Mum sen lé'njù là me nsi lo' Yérusalém ghù loṅ nelèt yi num njoṅ ntumntum fa; njoṅ benntùn bo nsi bù' i nsi là nsi fotte wut tshob bwe; njoṅ ngôngô fa nsi tse'te lo nsi num i.

⁴Tshùaben tshob ndù: Mum sen lé'njù là me nsi kag femni num njoṅ nyàmdiaṅ fa, ghù netshaṅ ke nshùm ghako' nyàm. Là, me nsi te lag num Yuda ndùse me nsi kag fù miag nyàmdiaṅ ntumntum nà.

⁵Fenfen Yuda nsi tshob ntù bo ndù: Ze neta ba Yérusalém b'a njam Tshùaben tàndà ntsho, Nsi yub.

⁶Mum sen lé'njù là me nsi lo' fenfen Yuda, a be mba lagmbwôg s'a tshwèt nkù là netèt tse ntshwèn, a be mba tswe'nka' ze bo bat mbwôg là netèt nenà. Bo nsi kù ntumntum tse bo diaṅ yub mbum nà, tse bo be bag bu zwim mba bag bu kwéb là. Yérusalém nsi ghô be kua' num ze dù'.

⁷Tshùaben nsi bwôgmbwe tshu' tse ntàb Yuda, ndùlala ndù kà nkuni tunndà David, nkuni ba Yérusalém ko' nèn tù ntshùa mi Yuda.

⁸Mum sen lé'njù là me nsi kabte ba Yérusalém, fi mèn netèt bo nsi be mba David là; tunndà David nsi be mba Nsi là, mba Angél Tshùaben nà mbwe bo.

⁹Mum sen lé'njù là me nsi kagtùn biagte njoṅ ngô fa tse bo nsi se' num Yérusalém nà.

¹⁰Ndùlala me nsi naṅ ywèt kondèn mba tse le'te num tunndà David mba num ba Yérusalém; bo nsi kaṅ se yub te num àm, mèn ze bo na' nsob i là. Bo nsi kua' num i ndaṅndaṅ mba bo be nkua' num mén ntshù' là. Bo nsi làn i kua' zwezwe mba bo be ndàn tuswe mén nà.

¹¹Mum sen lé'njù là vù ndùb nsi be Yérusalém, mba vù Hadadrimon ntùm tômbo' Megidon nà.

¹²Vù nsi be ntùm ngô, mba zit tunndà lo be tù' i: tunndà David be tù' i, bènnzwi be num yub bag i; tunndà Natan be tù' i, bènnzwi be num yub bag i,

¹³tunndà Lévi be tù' i, bènnzwi be num yub bag i; tunndà Shiméi be tù' i, bènnzwi be num yub bag i;

¹⁴njoṅ tsemo' tunndà fa, mba zit tunndà lo be tù' i, bènnzwi be num yub bag i.