Read Medumba Sakaria 13 Bible Online

Sakaria 13 - Medumba bible

Sakaria 13

¹Mum sen lé'njù là, mo' tumnsi ntse nsi bèt num tunndà David bo ba Yérusalém, num nesôg nukebwô bo nesagte.

²Tshùaben tàndà ntsho tshob ndù: Me nsi biagte ndèn neto mum ngô mum sen lèn'njù là, ndùlala ndù kà bo bèn nekwimte; me nsi sô mba ba ghatshob ntshob Nsi boa ywèt nesagte mum ngô.

³A be ze mèn bèn ntshob ntshob ngatshob ntshob Nsi là, mba tàab bo màab tse bo bwe i là nsi tshob yi ndù: O ke nsi yôge, nummb'o tshwèt ntatte num lén Tshùaben! Tàab bo màab tse bo bwe i là nsi sob i ndùs'a nsi tshob ntshob ngatshob ntshob Nsi là.

⁴Mum sen lé'njù là, tuswe nsi ko ba ghatshob ntshob Nsi num tshob njem, ndùse bo nsi tshob ntshob ngatshob ntshob Nsi là; bo ke nsi ma' kummbaṅ nyiaṅnyiaṅ num bo lo' tatte yi.

⁵Mba we lo netèt bo nsi tshob ndù: Me ke' b'a ngatshob ntshob Nsi, me b'a ngadù' nà, nummbe me lo ghù tsha' fe mum lé'njù tse me be ménnshum nà.

⁶A be ze bo bètt'é ndù: Tshen mfaṅ ts'o ghù mum mbu mu là fe à yà, mb'a nsi bùnte ndù: Me ket tshen mfaṅ n'a ntùm ndà ben tse bo ke nkô àm nà.

⁷Ṅwi, lo nsi num yàm ngabéb mbwe, bo mèn z'a be nshunku àm nà. Tshùaben tàndà ntsho bèn ntshobe. Lab ngabéb mbwe, ndù njùmbwe sate! Yen ngelaṅ nà me nsi bù' bu àm nsi num tse nke'nke'e.

⁸Tshùaben tshob ndù: Ntùm njoṅ ngô fa, bo nsi biagte bag tse bàa num bag tse tat, bo bi; bag i ze ntshù' num bag tse tat nsi tù'ù.

⁹Me nsi ma' yen bag i ntshù' num bag tse tat là ntùm mbwôge, lànt'é mba bo be ndànte nkàb là. Me nsi lànt'é mba bo be ndànte gol là. A nsi tsiaṅ lén sàm, me ju' nz'é mbame; me nsi tshob ndù: A b'a yàm nzwit mèm, tu wul i tshob ndù: Tshùaben b'a Nsi àm.