Read Medumba Sakaria 5 Bible Online

Sakaria 5 - Medumba bible

Sakaria 5

¹Me bèn mbù' miag màm nke ndôte njen mo' ṅwa'ni nebote mum njem, a nke mfùle.

²Angél ze bag yi ke ntshobte là tshob me ndù: Ke z'o yen à? Me bùnte ndù: Me yen mo' ṅwa'ni nebote, a nke mfùle; a lo ghù nguan mbu bwe'e nesage, ngù nguan mbu kuà kam i num bam se.

³Ndùlala Angél ze bag yi ke ntshobte là tshob me ndù: Yen ni b'a ndon z'a tsho num njoṅ ze be ngô fa là; ndaṅndaṅ mb'a tshob là, bo nsi ta' mba zit ntshô lo nsen ni, bo nsi ta' mba zit mèn z'a kàn mfe lo là nsen ni.

⁴Tshùaben tàndà ntsho tshob ndù, me so ndon, ndù a tsho num ndà ntshô, ndù a tsho num ndà mèn z'a kàn mfe num lén sàm ntatte là, ndù yen ndon nà se ka bwe, nkù ndà boa ntù mi mba ndoṅ.

⁵Angél ze bag yi ke ntshobte là ghebte ntshob me ndù: Bù' miag mo ndôte njen ju z'a tshwèt ntum bwe là.

⁶Me bùnte ndù: A b'a ke? A tshob me ndù: A kesoṅ bèn nke ntume. A bèn ntshob ndù: A b'a mfànnu mub ntùm njoṅ ngô fa.

⁷Tshù, mo' tu' tùn tum, ndù mo' mènnzwi tswe netèt kesoṅe.

⁸Angél ze bag yi ke ntshobte là dù: A b'a mfànnu. Angél tèn mènnzwi ma' ntùm kesoṅe, ndo' tu' tùn nkabte ntshu i yi.

⁹Tshù me bù' miag màm nke ndôte, njen bènnzwi bàa ṅwag mum njem. Fetmbaṅ nke mfette ntùm mbàb mube: Bo lo ghù mbàb ndaṅndaṅ mba mi ghammàtat là. Bo bù' kesoṅ netèt tsha' bo kamànyam.

¹⁰Me tshob Angél ze bag yi ke ntshobte là ndù: Bo lo' kesoṅ nèn yi à yà?

¹¹A bùnte me ndù: Bo lo' i nèn yi à mum ngô Shinear kut ba' yi bwe; ndùse bo nsi miagte nekut là, bo nsi yab i bwe, ntùm ze dù'.