Read Medumba Sakaria 9 Bible Online

Sakaria 9 - Medumba bible

Sakaria 9

¹Ntàmtenu Tshùaben ntùm ntshob mi mum ngô Hadrak; men ntshob là kwag mba Damas; nummbe lag Tshùaben te num benntùn mb'a be nte num njoṅ tunndà Israél fa là;

²ntshob Tshùaben kwag mba Hamat ze bo Damas be ndùnsi là, nkwag Tiro bo Sidon, mba mba bo ghù zenu là.

³Tiro kut kàbngô ze neta. A tse'te nkàb a tshùa mbabe, ntse'te gol a tshùa netob manze.

⁴Tshù, Tshùaben nsi lo' i so ze neta mum dibantse, mbwôg bèn nkù i.

⁵Askalon nsi yen i be ntùm bwôg; Gaza nsi yen i nevètte tshùb i; mba Ekron, nummbe tuswe nsi ghom i. Mfen ke nsi bèn be Gaza. Bo ke nsi bèn tswe Askalon.

⁶Ngùn nsi te mà Asdod, me nsi biagte ko'tewut ba Filistia.

⁷Me nsi sô lem ntshu i, sô ṅu' ntùm mfé' nsô mi, ndù mba yi ze yôge, mbe njam Nsi be. A nsi be mba mo' mfen Yuda là. Ekron nsi be mba Yébusia là.

⁸Me nsi te ntàb diaṅ ndà àm yi bume, num netshètt'é num ta' ntshu ntsho, num netshètt'é num ben tse bo tshwèt nèn nà bo tse bo tshwèt nse' là. Ngafétte ke nsi bèn tôg mbaṅ bo; nummbe miag màm te num i ndonni.

⁹Ṅwate tsho me ngon Sion, tshag nz'o tù ntùm tsiaṅte me ngon Yérusalém! Tshù mfen o là z'a tshwèt nse' tèl o là a b'a mbétni mèn, mbe ngayob ngu'u, a mbétni mèn ndù a ko' num kekwène, num kekwèn z'a b'a metsit mén kekwèn nà!

¹⁰A nsi sate nkalig Efraim, sate nyàmdiaṅ ts'a Yérusalém nà; a nsi biagte nkét ntsho. A nsi tshob fite ngôngô, to' ze nesa' fe num mo' dibantse nèn kum num mo', to' fe num ta'ntse nèn kum num ntôg tsha'a.

¹¹Mbe se' mba wù là, a tshùa num kàn s'o lo' lem tsho ngwat yi là, me sô kuan tsho mum tô dù' ze ntse ke' be là.

¹²Kuan, bin tse nenywinte dun ntù bin nà, bin bèn njam bwoṅ! Me bèn ntshob bin sènni ndù me nsi yagte wù yoṅ tse bàa.

¹³Me taṅ Yuda mba yàm ngoṅkét là, Efraim be mba sàm két là; Sion, tshù, me nsi ghù bon tsho lo nsi nèn num tse ba Grikia Me nsi lo' o mba ṅwi ngayob ngu' là.

¹⁴Tshùaben nsi ṅwag num bo, két se nsi se' à mba beba'mbaṅ nà. Tshùaben Nsi nsi tô nta ntsho, a nsi se' ntùm fetmbaṅ ndùb z'a fe mà ntèn nà.

¹⁵Tshùaben tàndà ntsho nsi kabte yube; bo nsi tam mbwe, tshùa ntsho num ndoṅ shùmte ghakeban; bo nsi nu, tshu'te mba bo bum ndu' là, bo nsi dun mba ntu' là, mba ntôg tômbwôg le'te Nsi là.

¹⁶Tshùaben Nsi yub nsi yôg yub mum sen lé'njù là, mba bwoṅ njùmbwe z'a be ze nzwit mèn nà. Nummbe bo nsi b'a mba ndoṅ tanjoṅ mi a be nké' num nsitsha' là.

¹⁷Tshù mba bo nsi bwô njene, tshù mba bo nsi ziag njene! Ngefet nsi ghù nshumnshum ku'u, ndu' nedùmte ghù ngonngon ku'u.