Read Medumba Malashi 1 Bible Online

Malashi 1 - Medumba bible

Malashi 1

¹Ntàmtenu, ntshob mi Tshùaben tshùa num ntshu Malashi, ntshob Israél là:

²Tshùaben tshob ndù: Me lo kô zine! Bin nke ntshob ndù: O na' nkô yag à num zit nu à? Tshùaben tshob mum ntàmtenu mi ndù: Esau ke b'a mfèt Yakob ké? Tshù, me lo kô Yakob,

³mban Esau! Me lo ghù tse mbat tù' fam, me lo fà ntsi' mi ba wunnyàm tse bo kônkwa là.

⁴A be ze Edom tshob ndù: Bo sate yage, mba nsi bèn bù'te fam! Mba Tshùaben tàndà ntsho tshob ze ndù: A bwô ndù bo kule, tu wul àm, me nsi sate. Bo nsi tsiaṅ yub ndù ngô tshùagntù, nzwit mèn ze Tshùaben ya ntù num bo matmat là.

⁵Miag min nsi yen i, bin tshob ndù: Tshùaben b'a mèn ndùb mba tà njam tse ndùnsi Israél!

⁶Nshum be ngù nku'ni tàab, ngafa' ghù nku'ni tàfa' i. A be ze me b'a tà là, mba nku'ni z'a lo mbwô bin ghù me là yà? A be ze me b'a tàfa' là, mba bwôg z'a lo mbwô ndù bin bwôg àm yi là yà? Tshùaben tàndà ntsho tshob ghale'te Nsi ndù: Bin be ngwag lén sàm, nke ntshob ndù: Bag wag lén so à num zit nu à?

⁷Tshu nele't'àm yi tse bin be mfà num tômbwôg là b'a tse nesagte, bin nke ntshob ndù: Bag na' mfàn à zit nu wù à? A b'a ndùse bin tshob ndù téblé Tshùaben b'a se newag là!

⁸Ndùse bin fà nyàm z'a vù fù là mba ju nele'te Nsi là, mb'a ke nukebwô ké? Ndùse bin fà nyàm ze ku i be' là mb'a ke nukebwô ké? Ndùlal'o fà ngomna o mb'a nsi yen o lag mebwô, mb'a nsi lo' o mebwô ké? Tshùaben tàndà ntsho bèn mbètte!

⁹Be ndaṅndaṅ bin nèn ndabte Nsi, ndù a ko ndèn be! Mba bin na' ndo' mbu min ngù ndùlili là, be a lo' zin mebwô ké? Tshùaben tàndà ntsho bèn mbètte.

¹⁰A zit mèn netèt bin z'a nsi fùn nzendà, ndù kà bin nekwé'te mbwôg num tômbwôg sàm banban à? Ntù àm ke' tshùa tse num bin, Tshùaben tàndà ntsho bèn ntshobe. Me ke' yen tsin nda' tse bin fà là ntù mebwô.

¹¹Neto' ntumnyam nèn nkum mbinyam, lén sàm b'a se ndùb netèt ngôngô; bo be nton tshu nelamte num nku'ni lén sàm njoṅ dù' fa; bo be mfà ts'a làn nà, nummbe lén sàm b'a se ndùb netèt ngôngô, Tshùaben tàndà ntsho bèn ntshobe.

¹²Là bin be ndo' lén sàm mba ju banban nà nke ntshob ndù: Téblé Tshùaben sagte, jujù z'a be num bwe là be ze newage.

¹³Bin be ntshob ndù: A ke lèn bot li à! Nke ngwag i. Tshùaben tàndà ntsho tshob ndùlala; mba ndùlala bin be ndo' ju ze bin yi, z'a be nke'kèt, ze dù' be' num i là nse' yi, tshen nà b'a nda' tse bin be mfà là! Bin kwate ndù me ghù nebam tshen tshu là mum mbu min ké? Tshùaben bèn mbètte!

¹⁴Ndon tu ngatatte z'a ghù fot nyàm netèt nyàm, nke nton nyàm z'a jum nà Tshùaben nà! Nummbe me b'a mfen ndùb, Tshùaben tàndà ntsho bèn ntshob ndùlala. Lén sàm b'a se nekuni netèt ngôngô.