Read Medumba Malashi 2 Bible Online

Malashi 2 - Medumba bible

Malashi 2

¹Bin ghale'te Nsi, ndonni bin ju' yen nu li ndù:

²A be ze bin ke' ju', ke yab yen nu là ntù bin, ndù bin nsi fà ghamte num lén sàm nà, mba me nsi kag ndon num bin, so ndon num kàn sine, ṅ, me nsi so ndon num i, Tshùaben tàndà ntsho bèn ntshobe.

³Tshù, me nsi bagte tshu tse bin ywit là, me nsi tam mbèt num se zine, mbèt nyàm tse bin nton me là; bo nsi lo' zin bin à bo nèn yi.

⁴A nsi tshùa ndùlala bin lèn ndù me lo tshob yen nu li bin, ndù kàn sàm se bag Lévi wat là be; Tshùaben tàndà ntsho bèn ntshobe.

⁵Kàn se bag yi wat là b'a kàn yôg bo fite, a ju ze me na' mbam yi ndù a ke mbwôg àm nà; a lo bwôg àm, a lo vètte mbwe lén sàm.

⁶Ntshù' nenùn lo be num ntshu i, mfànnu lo ke to' be tse num nkub ntshu mi; bag yi lo zin ntùm fite mba ntùm nenùne. A lo sô benntùn yàm ntùm nukebwô.

⁷Nummbe nkub ntshu ngale'te Nsi bèn nke ndé' zenu. Bo ke nzwi'te ntshù' a tum à num ntshu i, nummb'a b'a ngantum Tshùaben tàndà ntsho.

⁸Là bin, bin kag manze, bin ghù ntshù' tù' ju fa'te benntùn yàme; bin bagte kàn Lévi, Tshùaben tàndà ntsho bèn ntshob ndùlala.

⁹Tu wul àm, me nsi ghù bo wag zine, bin tù' ju banban num miag njoṅ benntùn fa, nummbe bin lo ke zin num tshàm manze, mbèn nke ndôte mèn kà ngù nu yi ndùse bin tshwèt mfa' fa' ntshù' là.

¹⁰Njoṅ ben fa ke b'a bon ta' tà ntshù' ké? A ke b'a ta' Nsi ntshù' bèn mbom be ké? Numke be nke nsobte wut be, be be, nke mfàn kàn tà be à?

¹¹Yuda lo ta tu, mo' nge' tsho Israél bo Yérusalém; nummbe Yuda lo fàn nu num ju z'a be ze Tshùaben nà, ju ze tshùaben be nkô là. A tamte bo ngon nsi ba tum.

¹²A bwô ndù Tshùaben so ntsha tu ben tse bo ghù ndùlala là, ngù ndù kà mèn z'a be ntùn, nke bùnte nu, nke mfà nda' Tshùaben tàndà ntsho là tum ntùm tse ntàb Yakob.

¹³Tshù mo' ju ze bin be ngù li: Bin be ndo' ntsenyà njo' tômbwôg Tshùaben yi, nekua' bo netswe kà ke bèn ndo' ba nda' mba ju là, ke bèn mbam sàm ju z'a tum mum mbu min nà.

¹⁴Bin be ntshob ndù: Mba numke? Nummbe Tshùaben b'a ngakwénta netèl o bin mènnzwi ze bin yi lo ngon nà; mènnzwi z'o be ngatatte yi ndonni, mba mb'a b'a nshun o, mbe mènnzwi ze bin yi wat kàn nà.

¹⁵Sàm mèn z'a ke' nkwa nu là ke' to' ghù ndùlala. Nda' ta' mèn bèn ngù ndùlala, mba numke? Nummb'a lo ke ndiag nzwit ze Nsi na' mbù yi là. Ndùlala bin zete mum ntù tsine, ndù kà mba we lo be ngatatte mbwe mènnzwi ze bo yi lo ngon nà!

¹⁶Nummbe me be nga nefagte nandà, Tshùaben Nsi Israél bèn ntshobe, nke nga mèn z'a be ndo' nu fa nkabte nzwe i yi là, Tshùaben tàndà ntsho bèn ntshobe. Bin zete mum ntù tsine, ndù kà bin be ghatatte.

¹⁷Bin be ndo' ntshob min nkag bot yi num Tshùaben, nke ntshob ndù: Bag kag bot num i à num zit nu à? A b'a num mba bin be ntshob ndù: Mba we lo z'a ghù nukebwô là b'a mèn mebwô num miag Tshùaben, a ke nju' mebwô à num ng'é! Ke netshob ndù: Kà Nsi netsin b'a yà?