Read Medumba Malashi 3 Bible Online

Malashi 3 - Medumba bible

Malashi 3

¹Tshù, me nsi tum ngantum àm; a nsi nabte manze mbwe àm. Be ndùse Tshùaben ze bin be ndiag i là nsi tsho ntùm ndà i. Tshù ngantum kàn ze bin be nkô là z'a se' là, Tshùaben tàndà ntsho bèn ntshobe.

²We z'a ghù nefènte lé'njù sen nà s'a nsi se' à? We z'a ku'ni netsin tù ndùs'a ṅwag 'a? Nummb'a nsi b'a mba mbwôg tàlàm nà, be mba zin ghadiaṅ ntu' là.

³A nsi tswe nsi, tone, lànte nkàb; a nsi lànte nshumnshum Lévi. A nsi lànte yube, tswite yub mba bo be ndànte gol bo nkàb là, ndù bo ke mfà nda' Tshùaben ntùm nunetsine.

⁴Yen ngelaṅ nà nda' Yuda bo ze Yérusalém nsi bwô Tshùaben, ndaṅndaṅ mb'a na' mbe mum lé'njù tse mbwe, ndaṅndaṅ mb'a na' mbe num ngu'njù tse mbwe là.

⁵Me nsi ghebte num netsho'te, me nsi nànte kwé nta num ghatshaṅ ngàme, boa ghaghù màndà, num ben tse bo num nkàn mfe tatte là, me nsi nànte kwé nta num ben tse bo be ndé' nkàb ngafa', nke mfétte mfôg mènnzwi bo ménntse, nke ngù kebwô ngùn, ke be bwôg àm nà. Tshùaben tàndà ntsho bèn ntshobe.

⁶Tshù, me b'a Tshùaben, me ke' be bate; là bin bon Yakob, bo lo ke biagte zine.

⁷Fe num ze ngelaṅ tà tsine, bin lo tsin ngùanesà mbaṅ ntshù' màm, bin lo ke ze ntshù' màm. Bin bèn njam nse' ntèl àm me nsi bèn njam se' tèt zine. Tshùaben tàndà ntsho bèn ntshobe. Bin be nke ntshob ndù: Bag bèn njam à num zit nu à?

⁸Be mènntùn fùte Nsi ké? Nummbe bin be mfùt'àm, nke ntshob ndù: Bag fùt'o à num zit nu à? Mum bag tshu ntshù' num bag tse gham mba mum ba nda'.

⁹Ndon kab mbu num bin, nummbe bin be mfùt'àm.

¹⁰Bin lo' njoṅ bag tshu fa num tse gham nèn yi mà ndà tshunkàb, ndùlala ndù jujù be mum ndà àm; bin laṅt'àm ndùlala. Tshùaben tàndà ntsho bèn ntshobe; yen ngelaṅ nà bin nsi yene, a be ze me ke' tsho' ntô kamànyam, ke tam ntse bin kua' mà yàm nà.

¹¹Bin nsi yene, a be ze me ke' biagte mbé' tse bo be mfèt tshu ts'a bit num tsha' tsine, nke ngù nkùa z'a kob bin ke netshùm nà. Tshùaben tàndà ntsho bèn ntshobe.

¹²Tshùaben tàndà ntsho tshob ndù: A be ndùlala mba ngôngô nsi tsiaṅ zin ghafen, nummbe bin ke mfa' à mum ngô ze ntàm fù' mebwô be bwe là.

¹³Tshùaben tshob ndù: Ntshob mi bin be ntshob num àm nà ta neshu, là bin nke ntshob ndù: A ke ze bag tshob num o à?

¹⁴Bin be ntshob ndù: Nefa' Nsi b'a banban. Be jù bin à num ke mba be be nze ntag mi, nke ndo' zwentù nzin yi mbwe Tshùaben tàndà ntsho l'à?

¹⁵Ndonni ghaka'te b'a ghafen; ṅ ghatshùagntù tshwèt nèn mbwe; tshù, bo be ndaṅte Nsi, netum ntshu i!

¹⁶Ndùlala ben bo ke mbwôg Tshùaben nà lo tshobte bo bo; Tshùaben lo kù' ntoṅ nju'u. Bo lo kite ta' ṅwa'ni mbwe Tshùaben nelo' nke nkwimte yi, num ben bo be mbwôg Tshùaben, nke nyàmte lén se là.

¹⁷Bo nsi b'a tshàm ben, Tshùaben tàndà ntsho bèn ntshobe. Bo nsi be tshàm ben mum lé'njù se me nabte là; me nsi ko ndèn mube, mba mèn be nko ndèn nshum i z'a be mfa' yi là.

¹⁸Yen ngelaṅ nà bin yi yen fagte z'a be netèt mèn netsin bo ngatshùagntù là, yen fagte z'a be netèt ngafa' Nsi bo mèn z'a ke' be ngafa' i là.

¹⁹Nummbe tshù lé'njù li s'a se' là, nke ndum mba ndà mbwôg là. Njoṅ ghaka'te fa mba njoṅ ghatshùagntù fa nsi b'a mba bèn nà; lé'njù s'a tshwèt nse' là nsi kù yube. Tshùaben tàndà ntsho bèn ntshobe. A nsi kù ke faṅ lèn nga i ke tob i lo.

²⁰Là, lagnyam nunetsin nsi tum num bin tse bin be mbwôg lén sàm nà. Neyate num bam mbàb mi. Bin nsi tume, ke ywétte mba mfot mfôt be njwétte mum nka' là.

²¹Bin nsi nyiaṅte ghatshùagntù nku, nummbe bo nsi be bam nku min à mba bwembwôg là, mum lé'njù se me tshwèt nabte là. Tshùaben tàndà ntsho bèn ntshobe.

²²Bin kwimte ntshù' ngafa' àm Mosé ze me na' nkite yi num mbat Horéb, num njoṅ ba Israél fa, mfà ba ntag boa ntenu bo là.

²³Tshù, me tum Elia, ngatshob ntshob Nsi bin, kà lé'njù Tshùaben se'e, lé'njù sen nà b'a se ndùb, mbe se nekuni.

²⁴Elia nsi lo' ntù ba tà bèn yi njam mum ze bon tshobe, lo' ntù bon bèn yi njam mum ze tà tshobe, mbwôg ndù kà me se' ntam ntshù' mum ngô.