Read Medumba Matio 11 Bible Online

Matio 11 - Medumba bible

Matio 11

¹Ngelaṅ Yésu miagte nefà ntag ghazi'te ntshob bàa gham nà, a tum yen dù' là, nèn netswite mbèn nke ntshob ntshob Nsi ntùm ngô tshobe.

²Ntùm ndàtsha, Yohané ju' nu num mfa' Kristô, ntum tsemo' ghazi'te nu i bo nèn ntshob Yésu ndù:

³O b'a mèn z'a tshwèt nse' ké? Ke bag bèn mbéb mo' mènghua à?

⁴Yésu bùnte ntshob bo ndù: Bin nèn nsoṅ Yohané nu ze bin tshwèt nju', mbèn njen nà.

⁵Ba mfùmiag tshwèt njene, ba kekat nke nzine, wut ghankin nke ndàne; ba mbu'ntoṅ nke nju'u, fe ben nke ndo num vù; bo tshwèt nke ntshob nkùn mebwô bwoṅbwoṅ.

⁶Mènfen b'a mèn z'a ke nsi fa't'a num àm kà vù nsi là.

⁷Ngelaṅ bo ke nèn nà, Yésu to' netshob nu bwoṅ benntùn mfà num Yohané: Bin na' nèn lôt'a ke num kônkwa à? Nka'nesoṅ ze fetmbaṅ tshwèt nyi't'é là ké?

⁸Là bin na' nèn yen à ke? Mo' mèn z'a ket mo' kuni nzwe là ké? Tshù, ben tse bo num nket nzwe mebwô là b'a ntùm ndà fenfen.

⁹Bin na' nèn à numke? Num neyen mo' ngatshob ntshob Nsi ké? Ṅ, me tshob bin ndù a tshùa ngatshob ntshob Nsi.

¹⁰A b'a mèn ze bo na' nkite num i ndù: Tshù, me tum ngantum àm mbwe o, z'a nsi nabte manze o mbwe o là.

¹¹Kua' nenùne, me tshob bin ndù: Netèt ben tse mènnzwi bèn mbwe yub là, sàm mèn ke' tum z'a tshùa Yohané nganyu' benntùn ntse là. Là nda' metsit mén ntùm nufen kamànyam tshùa i.

¹²Fe num tse lé'njù Yohané nganyu' benntùn ntse tà nse' nkum ndonni, bo tshwèt nkagtùn netsho ntùm nufen kamànyam ntùm neta, ben neta tshwèt ntsho bwe tùn.

¹³Ghatshob ntshob Nsi mba ntshù' Nsi lo tshob ntshob Nsi tà nse' nkum num Yohané.

¹⁴A be ze bin kô nebam nà, mb'a b'a Elia z'a na' mbwô ndù a se' là.

¹⁵Mèn z'a ghù ntoṅ nà, a ju'!

¹⁶Be me mfà mfi' yen zwiaṅ benntùn ni à num we? Bo fut'a bônke' tse bo tswe num nsém, nke nkua'a, ntshob shun tshob ndù:

¹⁷Bag bu' loṅe, bin ke nyiaṅ; ntôte vù, bin ke bam, ke làn.

¹⁸Nummbe Yohané lo se'e, ke be jù, ke bèn nu; bo tshob ndù: A ghù ywètkebwô.

¹⁹Mén mèn lo se'e, nke njù, mbèn nu; bo tshob ndù: Tshù ngajù mba nganu ndu', nshun ghakwéfé' mba ben kebwô li. Là mfa' mi lo la'te ndù zenu Nsi b'a netsine.

²⁰Yésu to' netshobte ngô ts'a na' ngù nsà yàm bwe là, nummbe bo lo ke kaṅ ntù tshobe.

²¹Nge' num wù, me Kôrazin, nge' num wù, me Bètsaida, nummbe nsà tse bo ghù netèt bin nà na' mb'a netèt Tiro bo Sidon mba bo lo à kaṅ ntù tshobe, ntôg bàm, mbèn nse' bwembwôge.

²²A ndùlala, me tshob bin ndù: Nu Tiro mba Sidon nsi bwô tshùa zin mum lé'njù netsho'te ntsha.

²³Wù Kapernaum, o nsi ko' kà nèn nkum kamànyam ké? Bo nsi lo' o, swe' yi tà nèn nkum ntùm ngô fe ben. Nummbe nsà tse bo ghù netèl o là na' mb'a netèt Sodom, mb'a ke' tà nse' nkum sènni.

²⁴Ndùlala me tshob bin ndù: Nu ngô Sodom nsi bwô tshùa yu mum lé'njù netsho'te ntsha.

²⁵Num yen ngelaṅ nà, Yésu tshob men ntshob li ndù: Me nyàmt'o me Tà, Tshùaben ba mfe kamànyam mba ba mànsi, wù z'o lem tshen nu li num miag ghazenu boa ghakwanu, nda'te be nda' bônke' là.

²⁶A b'a ndùlala me Tà, nummbe o yen ntùm yu nekô ndù a bwô ndùlala.

²⁷Tà lo fà njoṅ tshu fa me; sàm mèn ke' lèn Mén, mb'a nda' Tà; sàm mèn ke bèn ndèn Tà, mb'a nda' Mén, mba mèn ze Mén kô nela't'é yi là.

²⁸Bin se' me njoṅ zin fa tse bin bole, mbèn nket lèt là, tu wul àm m'a' fà fite bin.

²⁹Bin ket sàm kele'e, nzi'te yàm nu; me b'a mèn nefite mbèn mbe ngafà wut nsi ntùm ntù, bin nsi fon fite mum ntù tsine.

³⁰Nummbe sàm kele' bwô, yàm lèt bèn mfùage.