Read Medumba Matio 12 Bible Online

Matio 12 - Medumba bible

Matio 12

¹Num yen ngelaṅ nà Yésu tshùa ntùm nà nsa mo' lé' Sabbat. Nziku' ya ghazi'te nu i, bo to' nefag nsa, mfèle.

²Ba Férésia yen, ntshob Yésu ndù: Tshù, ghazi'te nu o tshwèt ngù ju ze ntshù' ke' bam neghù lé' Sabbat là.

³Là, a tshob bo ndù: Bin ke' siaṅ ju ze David na' ngù ngelaṅ nziku' ya i boa ben tse bo à bo na' mbe là,

⁴mb'a na' ntsho Ndà Nsi njù bàn le'te Nsi ze ntshù' na' mbe ke bam yi nejù, mba ben tse bo à bo be là, là k'a ke nda' ghale'te Nsi tù' bo là.

⁵Bin lo ke bèn nsiaṅ ntùm ntshù' ndù ghale'te Nsi num mbagte ntshù' Sabbat ntùm Tèmpèl lé'njù Sabbat, ke be ghavù ntsha ké?

⁶Là me tshob bin ndù: Nsen ni mo' ju ndùb num bwe ndù a tshùa Tèmpèl.

⁷Bin lo mbe kà ndèn tun men ntshob li ndù: Me kô à kondèn ke b'a ju nele'te Nsi, mba bin ke' naṅ ntsha tu ben tse bo ke' vù ntsha là.

⁸Nummbe Mén mèn b'a tà lé' Sabbat.

⁹A tum yen dù' là, nèn ntùm sinagogue yub.

¹⁰Tshù, mo' mèn lo be bwe ndù bu i jum. Bo bètte Yésu ndù: Ntshù' bam neyate mèn lé' Sabbat ké? Bo na' nke ndiag à nu ze bo tshùa bwe kà bot'é là.

¹¹A tshob bo ndù: We z'a netèt bin z'a ghù mbwe i a vù tàm lé' Sabbat, mb'a ke tshùb i, nsô i à?

¹²Mènntùn ke' tanjoṅ neshu ntshùa mbwe ké? Ndùlala ntshù' bam ndù mèn ghù numebwô lé' Sabbat.

¹³A tshob mèn nà ndù: Nyit bu o. A nyit bu i, bu i tswe mba mo' là.

¹⁴Là ba Férésia tum, ngù ntse'te nediag mba bo nsi tshùa kà zwi Yésu là.

¹⁵Là Yésu be lèn yen nu là, ntum yen dù' là.

¹⁶Benntùn yàm tam njam i, a yate yub fa, a tshobte yub kua' neta ndù kà bo ghù bo lèn i,

¹⁷ndù men ntshob li mi Esaya ngatshob ntshob Nsi na' ntshob là bumte ndù:

¹⁸Tshù ngafa' àm ze me tsho' i li, mèn ze me num nkô i, ze ntù àm yab nkwatenu mi num i là; m'a' yab Ywèt tshàm num i, a nsi tshob nunetsin ghakelèn Nsi.

¹⁹A ke nsi kam ntsha, ke bèn ntshobte neta, bo ke nsi ju' nz'é num manze.

²⁰A ke nsi be' nka'nesoṅ z'a ben nà, ke bèn mbiag nesèn mbwôg z'a tshwèt nziag là, tà nkum ngelaṅ z'a nsi ghù nunetsin ma' ntshùa là.

²¹Ghakelèn Nsi nsi nywinte num lén se.

²²Bo lo' mo' ngaghù ywètkebwô nse' yi mbwe i; a na' mb'a mfùmiag mbèn mbe ketshob. A yat'é; yen mèn nà yen, mbèn ntshobe.

²³Njoṅ bwoṅ benntùn fa tshàm, ntshob ndù: Yen mèn ni ke b'a mén David ké?

²⁴Là ba Férésia ju', ntshob ndù: Yen mèn ni ke ndo' à Bèèzèbul mfen ba ywètkebwô kà nta' ywètkebwô yi.

²⁵Yésu be lèn nkwatenu mube, ntshob bo ndù: Njoṅ nufen fa z'a num ngabte wul i là, ke nèn à nebi.

²⁶A be ze Satan ta' Satan nà, mb'a ghabte wul i ze tu, mba nufen i nsi tswe à ndùke?

²⁷A be ze me num ndo' à Bèèzèbul nta' ywètkebwô yi là, mba bon tsin ke ndo' à we nta' yub yi à? A ndùlala, bo nsi be tsin ghatsho'te ntsha.

²⁸Là, a be ze me num ndo' à Ywèt Nsi nke nta' ywètkebwô yi là, mb'a b'a ndù nufen Nsi se' tà nkum mbaṅ bin.

²⁹Be mèn ku'ni netsho ndà mèn neta, ndagte tshu tse, a be z'a ke' bwôgmbwe nkut yen mèn neta là kà njôg ndagte ndà i là ké?

³⁰Mèn ze bag yi ke' bèn mbe là, mb'a b'a ngakeban àm; mèn ze bag yi ke bèn nke ntse'te tshu là, mb'a ke nesate.

³¹A ndùlala me tshob bin ndù: Njoṅ nukebwô fa, njoṅ tshabte fa, bo nsi lagte benntùn, là bo ke nsi lagte tshabte num Ywèle.

³²Mba we lo z'a tshob mo' ntshob num Mén mèn nà, mba bo nsi lagt'é; là mèn z'a tshob nu num Ywèt Nelàn nà, mba bo ke nsi lagte yi ntùm yen njù li, mba ntùm njù z'a nsi se' là.

³³Bin tshob ndù: Tù bwô mba ntàm mi a' bwô; ke netshob ndù: Tù bag mba ntàm mi a' bag. Nummbe bo ke ndèn tù à ntàm mi.

³⁴Nzwit ngamnyu, be bin ben kebwô ku'ni netshob numebwô à ndùke. Nummbe ju z'a dun ntùm ntù mèn nà, ntshu ke ntshob à be yi.

³⁵Mèn mebwô num nsô ju mebwô ntùm tshu mebwô ts'a tse'te là; mèn kebwô sô ju kebwô ntùm tshu tse tse kebwô.

³⁶Me tshob bin ndù: Mum lé'njù netsho'te ntsha, benntùn nsi tshob nu fà num ntshob ke tun i mi bo na' ntshob là.

³⁷Nummbe bo nsi tsiaṅ o mèn netsine, ntshùa à num ntshob mu, bèn naṅ ntsha tu o, ntshùa num ntshob mu.

³⁸Tsemo' ghalèn ṅwa'ni Nsi mba ba Férésia bùnte yi ntshob ndù: Ngatswite, bag kô ndù o ghù nsà bag yene.

³⁹Là, a bùnte ntshob bo ndù: Zwiaṅ ben kebwô mba ghaghù màndà tshwèt mbètte nsà; bo ke nsi bèn fà nsà yi, k'a ke nda' nsà Yona ngatshob ntshob Nsi.

⁴⁰Nummbe mba Yona na' ntswe lé'njù tat, mbwôgtshù mba tèttswe' ntùm bam ngontse là, Mén Mèn nsi tswe lé'njù tat, mbwôgtshù mba tèttswe' ntùm tsha'a.

⁴¹Ba Ninive nsi ghù tsin tù ntùm ndàntsha boa yen zwiaṅ benntùn ni ghù bo vù ntsha, nummbe ba Ninive lo kaṅ ntù tshob num ntshob Nsi mi Yona tshob bo là. Tshù, mo' mèn nsen ni ndù a tshùa Yona.

⁴²Mfen ze mènnzwi z'a fe mà ntèn nà, nsi ghù lo tù ntùm ndàntsha boa yen zwiaṅ benntùn ni, ghù a vù ntsha, nummbe a lo fe mo' bag njù, nse' neju' zenu Salomon. Tshù, mo' mèn nsen ni ndù a tshùa Salomon.

⁴³Ngelaṅ ze ywètkebwô tum ntù mèn nà, a nke nkatte ntùm dù' njum, nke ndiag dù' nefite ke fon,

⁴⁴ntshob ndù: M'a' bèn njam ntùm ndà àm dù' ze me tum bwe là. A be bèn njam, ntèt ndà ndù bo nabt'é kua' mebwô.

⁴⁵Ndùlala, a bèn njam, nèn ndo' tsemo' sammbàa ntamte num i, tse bo bag ntshùa ze tu wut là, bo à bo se' nke ntswe bwe; yôg yen mèn ni bèn mbag ntshùa mb'a na' mbe mbwe là. A nsi se' be be ndaṅndaṅ num yen zwiaṅ ben kebwô li.

⁴⁶Ngelaṅ a ke nke' ntshob nu bwoṅ benntùn nà, tshù, màab mba fèt tse tsin njù, nke ndiag i netshob nu yi.

⁴⁷Là mo' mèn tshob yi ndù: Tshù, màan mba fèt tsho num njù, nke ndiag o tshob nu wù.

⁴⁸Là, a bùnte ntshob mèn z'a ke ntshob yi là ndù: Màa b'a we? Fèt tshàm b'a we?

⁴⁹A nyit bu i, ntshag num ghazi'te nu i, ntshob ndù: Tshù màa mba fèt tshàm ni.

⁵⁰Nummbe mèn z'a ghù ju ze Tàa mfe kamànyam num nkô là, mb'a b'a mfèl àm ze mandum bo mfèl àm ze mènnzwi mba màa.