Read Medumba Matio 14 Bible Online

Matio 14 - Medumba bible

Matio 14

¹Num yen ngelaṅ nà, mfen Hèrodé ju' tshô Yésu, ntshob tshe' tse ndù:

²Yen mèn ni b'a Yohané nganyu' benntùn ntse; a lo num vù, a ndùlala bèn ngù k'a nke ngù tshen nsà ndùbndùb là.

³Nummbe Hèrodé na' mbèn ngù bo tshùb Yohané, nkul i, ma' ndàtsha num nu Hèrodia, nzwi Filibo mfèl i.

⁴Nummbe Yohané lo ke ntshob yi ndù: Ntshù' ke' bam ndù o so i.

⁵Hèrodé lo ke ndiag nezwi i, là nke mbwôg benntùn, nummbe bo ke ndo' Yohané à mba ngatshob ntshob Nsi là.

⁶Mum lé'njù bo tsiaṅte lé'njù bo bwe Hèrodé là, ngon Hèrodé nyiaṅ netèt bo, a bwô Hèrodé neshu.

⁷K'a kàn mfe ntshob ndù a nsi fà mba ke lo z'a bètt'é là yi.

⁸Màab tènt'é a tshob ndù: Fà tu Yohané nganyu' benntùn ntse me ntùm ka nsen ni.

⁹Mfen nywin, là mb'a kàn mfe bo mba benntùn be nsi là, a tshob ndù bo fà yi,

¹⁰a tum bo nèn nkeb tu Yohané ndàtsha.

¹¹Bo yab tu i ntùm ka, nse' mfà ménngon nà, ménngon lo' nèn mfà màab.

¹²Ghazi'te nu Yohané se' ndo' fe i, nèn ntshoṅe; bo nèn nsoṅ Yésu.

¹³Là Yésu be ju' yen tshô là, ntum yen dù' là, ntsho kenu, nèn dù' banban tù' i. Bwoṅ benntùn be ju'u, ntum ntùm ngô, mbwe i nku.

¹⁴Yésu be tum kenu, njen mo' mà bwoṅ benntùn, ndèn mub ko i, a yate ghangokèt tshobe.

¹⁵Njù be sène, ghazi'te nu i se' mbaṅ i, ntshob ndù: Yen ni b'a dù' banban, ngelaṅ à nebèn ntshùa. Lé'te benntùn ndù bo nèn ntùm ntaṅla' njun jujù yub tu.

¹⁶Là Yésu tshob bo ndù: A ke' bwô ndù bo nène; bin bèn fà jujù bo.

¹⁷Là bo tshob yi ndù: Bag ghù nda' ntu' bàn ntàn mba ngontse ndô bàa nsen ni.

¹⁸Là, a tshob ndù: Bin lo' nse' yi nsen ni mfà me.

¹⁹A ghù bwoṅ benntùn tswe nsi num nenà, a lo' men ntu' bàn ntàn nà mba ngontse ndô bàa là, mbù' miag mi mfe kamànyam, nde'te Nsi, mbe'te bàn, nke mfà ghazi'te nu i; ghazi'te nu i nke mfà bwoṅ benntùn.

²⁰Njoṅ yub fa jù, mbèn njwèle, ntse'te mbe'te mi mi a tù' là, a dun nkag ntshob bàa gham.

²¹Ben tse bo na' njù là na' mb'a nguan bandum ntsha' tàn ke kwa bènnzwi mba bônke'.

²²Be ndùse, a nànte ghazi'te nu i ndù bo tsho ntùm kenu, mbwôg dut ntse, nèn mo' yoṅ dibantse, ngelaṅ a lé'te bwoṅ benntùn nà.

²³A be miagte nelé'te bwoṅ benntùn, nko' num mbat tù' i nele'te Nsi. Njù be sène, Yésu ke' bwe tù' i.

²⁴Là kenu be à tà netèt dibantse, ntse nke nshùm i, nummbe fetmbaṅ na' nke mfe à mbwe i.

²⁵A na' mb'a ngelaṅ njù tù' nelàn nà, a zin num dibantse, nse' mbaṅ bo.

²⁶Là ngelaṅ ghazi'te nu i yen a nke nzin num dibantse là, tu tshob tshu', bo bwôg, ntshob ndù: A b'a ghamèn, bo kua' kua' bwôg;

²⁷là Yésu tshob bo ndende ndù: Bin fèn ntù, a b'a me, kà bin bwôg!

²⁸Là Pétro bùnte yi ndù: Tshùaben, a be z'a b'a wù là, o tshob me se' mbaṅ o num ntse.

²⁹A tshob ndù: Se'e! Pétro tum ntùm kenu, nzin num ntse num nenèn mbaṅ Yésu.

³⁰A ju' fetmbaṅ, mbwôge; mb'a ke nto' nevù ntùm ntse là, a kua' neta, ntshob ndù: Tshùaben yôg àm;

³¹be ndùse, Yésu nyit bu i, ntshùb i, ntshob yi ndù: Ngabamntù metsili, numk'o nke ngwù bag bag à?

³²Ngelaṅ bo tsho ntùm kenu là, fetmbaṅ tsin.

³³Ben tse bo be ntùm kenu là se' ngwù nsi mbwe i, ntshob ndù: Kua' nenùne, o b'a Mén Nsi.

³⁴Bo be miagte nedule, nkum kaṅ ntse mbaṅ ngô Gènèsarèt.

³⁵Ba ntùm yen dù' là lèn i, ntum bo soṅ benntùn ntùm njoṅ ngô fa ts'a ghebte mbaṅ bo là, bo lo' njoṅ ghangokèt fa, nse' yi mbaṅ i,

³⁶mbu' mbu yi ndù a faṅ bo kwag nda' tôg nzwe i. Njoṅ benntùn fa tse bo kwag i là yate.