Read Medumba Matio 18 Bible Online

Matio 18 - Medumba bible

Matio 18

¹Be num yen ngelaṅ nà, ghazi'te nu Yésu se' mbaṅ i, ntshob ndù: Kà we z'a be mèn ndùb ntshùa tsemo' ntùm nufen kamànyam à?

²A tsiaṅ metsit ménfi mbaṅ i, nte i netèt bo,

³ntshob ndù: Kua' nenùne, me tshob bin ndù: A be ze bin ke' kaṅ ntù tsine, ke bèn ntù' mba bontsit bônke' là, mba bin ke nsi tsho ntùm nufen kamànyam.

⁴Mèn z'a nsi lo' wul i, nèn yi nsi mbwe yen metsit ménfi li là, mb'a b'a mèn ndùb ntshùa tsemo' ntùm nufen kamànyam.

⁵Mèn z'a nsi lo' mo' metsit ménfi mba yen ni num lén sàm nà, mba ng'é lo' à me.

⁶Mèn z'a nsi ghù mo' metsit mén netèt tshen ni tse bo num mbam àm nà vù ntùm ywi' là, mb'a bwô ndù bo taṅ loṅ bàn tô i, ma' i ntùm lamntse.

⁷Nge' num tu njù num nu nefa'te. Ṅ, a yôg mbwô ndù nu nefa'te se'e, là nge' tu mèn ze nu nefa'te tshùa num i kà se' là.

⁸A be ze bu o ke ku o lo ghù ndù o vù ntùm ywi' là, o keb i, ngua' i ngùanesà mbaṅ o; a bwô wù netsho ntùm yôg bu ntshù' ke ku ntshù' lo, ntshùa mb'a be o ghù mbu mbàa mbàa nku mbàa, bo ma' o ntùm mbwôg z'a tswe matmat là.

⁹A be ze lag so ghù ndù o vù ntùm ywi' là, o tsho' i, ngua' i ngùanesà mbaṅ o; a bwô wù netsho ntùm yôg lag ntshù', ntshùa mb'a be o ghù miag mbàa, bo ma' o ntùm mbwôg là.

¹⁰Bin bam nà newag mo' metsit mén netèt tshen ni. Nummbe me tshob bin ndù ba Angél tshob mfe kamànyam num ndôte se Tàa mfe kamànyam njoṅ ngelaṅ fa. [

¹¹Nummbe Mén mèn se' neyôg à z'a na' mbi là.]

¹²Bin kwate ndùke? A be ze mo' mèn ghù njùmbwe nkù, mo' ta' i netèt tshen ni bi là, mb'a ke faṅ tse ntshob bwe'e ṅam bwe'e num mbale, nèn nediag z'a bi là ké?

¹³A be z'a diag i kà mfon i là, mba me tshob bin kua' nenùn ndù mb'a' tsiaṅte num i ntshùa tse ntshob bwe'e ṅam bwe'e tse bo ke' bi là.

¹⁴Be ndaṅndaṅ, Tà zin mfe kamànyam ke' kô ndù mo' metsit mén netèt tshen ni bi.

¹⁵A be ze mfèl o ghù nukebwô wù là, o nèn ntèl i, nsoṅ i nu z'a ghù wù là, ntswe bin yi ntu bàa, ntshobt'é; a be z'a ju' o là, mb'o yôg mfèl o.

¹⁶A be z'a ke' ju' o là, o lo' ta' mèn ke ben bàa lo, bin à bo nèn ntèl i ndù njoṅ ntsha fa mi num ntshu ghakwénta bàa ke tat lo.

¹⁷A be z'a ke' ju' tshen ben ni là, o tshob ntse'te ben Kristô; a be z'a ke' ju' mba ntse'te ben Kristô là, o lo' i mba ngakelèn Nsi mba ngakwéfé' là.

¹⁸Kua' nenùne, me tshob bin ndù njoṅ tshu fa tse bin nsi kut num nsitsha' là, bo nsi bèn kut kamànyam; njoṅ tshu fa tse bin nsi kiagte num nsitsha' là, bo nsi bèn kiagte kamànyam.

¹⁹Me bèn ntshob bin kua' nenùn ndù: A be ze benntùn bàa netèt bin num nsitsha' tamte ntshu ntshù' num mba zit nu lo, a be ze bo bètte là, mba Tàa mfe kamànyam nsi fà bo.

²⁰Nummbe mba yà lo ze ben bàa ke tat lo tse'te num lén sàm nà, me num netèt bo.

²¹Pétro se' mbaṅ i, ntshob yi ndù: Tshùaben, mfèl àm ghù nukebwô me yoṅ si' mba m'a' ke ndagte yi à? Tà nkum yoṅ sammbàa ké?

²²Yésu tshob yi ndù: Me ke' tshob wù ndù: Tà nkum yoṅ sammbàa, là tà nkum yoṅ ṅam sammbàa yoṅ sammbàa.

²³A ndùlala nufen kamànyam fut'a mo' mfen z'a na' nke ndiag nesiaṅte tshu tse boa tshe' tse ts'a na' ndem tshu bo là.

²⁴Ngelaṅ a to' nesiaṅte là, bo lo' mo' nganjo z'a ke mbètt'é talaṅto ntsha' gham nà nse' yi mbwe i.

²⁵Là mba yen mèn ni na' mbe ke ghù ju netô ze njo yi là, tshùaben tshob ndù bo swèn i, nzwi i mba njoṅ tshu fa ts'a ghù là, ndo' ntô ze njo yi.

²⁶Tshe' i là vù nsi kabkab, mbu' mbu mfen, ntshob ndù: A bwô ndù o fènte, me nsi tô njoṅ yàm njo fa wù.

²⁷Tshùaben ko ndèn tshe' i, nkag i, mbèn mfaṅ njo yi.

²⁸Ngelaṅ ze yen tshe'mfen ni tum nà, a bumte bo mo' tshe'mfen z'a ghù njo i yi denario nkù là, ntshùb i ntôntô, ntshob ndù: Tô njo ze me tshwèt mbètt'o là.

²⁹Yen tshe'mfen nà vù nsi mbwe i, mbu' mbu yi, ntshob ndù: A bwô ndù o fènte, me nsi tô yàm njo wù.

³⁰A ke bam, là, a nèn ma' i ndàtsha tà nkum ngelaṅ z'a tô ze njo yi là.

³¹Tsemo' tshe'mfen be yen nu z'a tôg là, nywin kua' neshu, nèn ntshob njoṅ nu fa ts'a tôg là tshùaben yub.

³²Ndùlala tshùaben tsiaṅ i mbaṅ i, ntshob yi ndù: Tshe'mfen kebwô, me lo faṅ njoṅ yu njo fa wù, nummbe o lo bu' mbu me.

³³O lo ke ku'ni neko ndèn mfèl o, mba me ko ndèn mu là ké?

³⁴Tshùaben i ya ntù, mfà i ghabéb ndàtsha tà nkum ngelaṅ z'a nsi tô njoṅ ze njo fa là.

³⁵Mba Tàa mfe kamànyam nsi ghù num bin be ndaṅndaṅ, a be ze mba we lo netèt bin ke' be lagte nukebwô mfèl i ngô ntù i fa là.