Read Medumba Matio 20 Bible Online

Matio 20 - Medumba bible

Matio 20

¹Nummbe nufen kamànyam fut'a mo' tàndà z'a tum nkebnjù num nelo' ghafa' ntùm nà i là.

²Ngelaṅ boa ghafa' tamte mbe ntshu ntshù' num ta' denario mum lé' fa' là, a tum yub ntùm nà i.

³A bèn ntum num nyam bwe'e, njen tsemo' ndù bo tswe mfagte manze ke ke mfa' sàm ju.

⁴A tshob mba bo yub ndù: Mba bin zin, bin nèn ntùm nà àm, me nsi fà ju z'a ku'ni là bin.

⁵Bo nèn. A bèn ntum num njagnyam mba nyam tat ngù be ndaṅndaṅ.

⁶Num nyam tàn mfetnjù, a bèn ntume, mfon tsemo'o, ndù bo tswe bwe, a tshob bo ndù: Numke bin tswe nsen ni fe nkebnjù ke ke mfa' sàm ju à?

⁷Bo tshob yi ndù: Nummbe sàm mèn ke' lo' yag fa'. A tshob bo ndù: Mba bin zin, bin nèn ntùm nà àm.

⁸Njù be sène, tà yen nà là tshob ngatshagte fa' ndù: Tsiaṅ ghafa', mfà nkàbfa' bo, nto' num ba njam nèn nkum num ba mbwe.

⁹Ben tse bo lo' yub nyam tàn nà se', nkwé denario ntshù' ntshù'.

¹⁰Ngelaṅ ba mbwe se' là, bo kwate ndù bo a' kwé ntshùate; là mba bo yub kwé à be denario ntshù' ntshù'.

¹¹Bo be kwé, nke nzwete tun ntô num tàndà,

¹²ntshob ndù: Tshen ben ni tse bo se' à njam nà fa' à nda' nyam ntshù', o lo' yag bag à bo be ndaṅndaṅ, bag tse bag fènte nge' mba nyam fe nkebnjù là.

¹³Là, a bùnte mo' ta' i netèt bo ndù: Nshun àm, me ke' ghù ju z'a ke' ku'ni là wù; be lo ke be ntshu ntshù' à num ta' denario ntshù' ké?

¹⁴Lo' ju z'a be yu là, nène. Là me kô nefà yen njam mèn ni be ndaṅndaṅ mba wù là.

¹⁵Me ke' ku'ni neghù ju ze me kô là tshu ts'a b'a tshàm nà ké? O lôt'àm lag kebwô à mba me be mèn kebwô là ké?

¹⁶Ndùlala ba njam nsi tù' ba mbwe, ba mbwe bèn ntù' ba njam.

¹⁷Num ngelaṅ Yésu ke nko' nèn Yérusalém nà, a lo' tse ntshob bàa gham tù' bo, ntshob bo num manze ndù:

¹⁸Bag bin tshwèt nko' nèn Yérusalém; bo nsi fà Mén mèn mbu ghale'te Nsi tse ndùbndùb mba ghalèn ṅwa'ni Nsi; bo nsi keb ntsha ndù bo zwi i,

¹⁹mfà i mbu ghakelèn Nsi ndù bo tshabt'é, ndab i, nkwimt'é num fanta'tù, a be be mbatte lé'njù tat, a lo num vù.

²⁰Mà bon Zèbèdéo se' mbaṅ Yésu boa bon tse, ngwù nsi kabkab mbwe i, ndon i ju.

²¹Là Yésu tshob yi ndù: Ke z'o kô à? A tshob yi ndù: Tshob ndù tshen bon tshàm bàa li tswe ntùm nufen su, mo' num bag bu o ze zwim, mo' num ze kwéb.

²²Là Yésu bùnte, ntshob ndù: Bin ke' lèn ju ze bin lon nà. Bin ku'ni nenu ntu' ze me nsi nu là ké? Bo tshob yi ndù: Bag ku'ni!

²³A tshob bo ndù: A nenùne, bin nsi nu ntu' àm; là, mbe se' mba netswe num bag bu àm ze zwim mba ze kwéb là, a ke' b'a me bèn fà yen nà, là, a b'a ju ben tse Tàa na' nabte num bo là.

²⁴Tse gham lo be ju'u, nja ntù tshen fètfèt bàa là.

²⁵Là Yésu tsiaṅ yub mbaṅ i, ntshob ndù: Bin lèn ndù ghatô ngô num ntô i neta, ben ndùbndùb nke ndo' ngù' ngùtni yub yi.

²⁶A ke' b'a ndùlala netèt bin; là mèn z'a kô netù' mèn ndùb netèt bin nà, nsi tù' ngafa' zin.

²⁷Mèn z'a kô nebe mbwe mèn netèt bin nà, nsi tù' nkuan zine.

²⁸Be ndaṅndaṅ, Mén mèn lo ke se' à ndù benntùn fa' yi, là ndù a fa' benntùn, mbèn mfà yôg se ndo' ntshu' benntùn yàm yi.

²⁹Ngelaṅ bo ke ntum Yériko là, mo' bwoṅ benntùn yàm tam njam i.

³⁰Tshù, tsemo' mfùmiag bàa tswe nsi kaṅ manze, mbe ju' ndù Yésu tshwèt ntshùa, nkua' neta, ntshob ndù: Tshùaben Mén David, ko ndèn mage.

³¹Bwoṅ benntùn tshobte yub ndù bo mi ntswe. Là bo bèn nkua' neta, ntshob ndù: Tshùaben Mén David, ko ndèn mage.

³²Yésu tsin, ntsiaṅ yube, ntshob ndù: Ke ze bin kô ndù me ghù bin à?

³³Bo tshob yi ndù: Tshùaben, ghù miag mag gha'a.

³⁴Ndèn mub ko Yésu, a kwag miag mube, be ndùse bo yen nze, ntam njam i.