Read Medumba Matio 22 Bible Online

Matio 22 - Medumba bible

Matio 22

¹Yésu bèn nto' netshob nu bo tànkùt, ntshob ndù:

²Nufen kamànyam fut'a mo' mfen z'a na' nabte nandà mén i là.

³A tum tshe' tse ndù bo nèn ntsiaṅ ben ts'a na' ntsiaṅ yub num nandà là, là bo ke kô nese'e.

⁴A bèn ntum tsemo' tshe' tse, ntshob ndù: Bin tshob ben tse me na' ntsiaṅ yub là ndù: Tshù, m'a na jujù, nzwite ba mfô mba ba nyàm tse bo ghù zit là, njoṅ tshu fa ku'u, bin se' num nandà.

⁵Là bo wag yen nu là, nèn tshobe; mo' nèn ntùm nà i, mo' nèn ntàn mi;

⁶tsemo' ghom tshe'mfen nà, ngùtni yube, nzwi yube.

⁷Là mfen ya ntù, ntum soyé tse ndù bo nèn nzwite tshen ben nà, mbèn nton ngô yube.

⁸A bèn ntshob tshe' tse ndù: Jujù nandà ku'u, là ben tse me na' ntsiaṅ yub là lo ke ku'ni.

⁹Ndùlala bin nèn ba mfagte manze, ntsiaṅ njoṅ ben fa tse bin fon nà num nandà.

¹⁰Tshen tshe'mfen nà tum nèn num ba manze, ntse'te njoṅ benntùn fa tse bo fon nà, ben kebwô mba ben mebwô kà ndà nandà dun.

¹¹Mfen tsho ndà nelôte ben tse bo tswe téblé là, njen mo' mèn bwe ndù a ke' ma' nzwe nandà, a tshob yi ndù:

¹²Nshun àm, o tsho nsen ni à ndùke, ke be ndù o ghù nzwe nandà à? A tswe ntshu mi'i.

¹³Mfen tshob ghafa' ndù: Bin kut nku mi mba mbu mi, ma' i njù ntùm dù' njame. Nekua' mba nefèt nsô nsi be yen dù' là.

¹⁴Nummbe ben tse bo tsiaṅ yub là b'a yàme; là tse bo tsho' yub là b'a metsili.

¹⁵Ba Férésia tum, nèn ngù ntse'te ndù bo lo' ta' ntshob mbùn i yi,

¹⁶bo tum ghazi'te nu yub boa ben Hèrodé mbaṅ i, bo tshob ndù: Ngatswite, bag lèn ndù o b'a ngatshob nenùne, nummbe o ke' be lôte se benntùn.

¹⁷Ndùlala, tshob mb'o kwate là bag. Ntshù' bam ndù mèn fà ntshub Kàsà ké, ke nga à?

¹⁸Là Yésu lèn nukebwô yub ntshob ndù: Ghamfùm, bin laṅt'àm numke?

¹⁹Bin lo' lèn nkàb ntshub ntswite me. Bo lo' ta' denario mfà yi.

²⁰A tshob bo ndù: A tu we li num bwe à, lén we li num bwe à?

²¹Bo tshob ndù: A b'a ze Kàsà. A tshob bo ndù: Ndùlala, tshu Kàsà bin fà Kàsà; tshu Nsi, bin fà Nsi.

²²Bo be ju' men ntshob li, ntshàm neshu, mfaṅ i nène.

²³Be num sen lé'njù là, ba Sadukai tse bo ke ntshob ndù nelo num vù ke' be là, se' mbaṅ i, mbètt'é nu, ntshob ndù:

²⁴Ngatswite, Mosé lo tshob ndù: A be ze mèn kwù ke bwe bon nà, mba mfèl i nsi so mfôge, mbwe bon ngù nzwit mfèl i yi.

²⁵Tsemo' fèt sammbàa lo be netèt bag, mbwe i z'a ghù mènnzwi là kwù ke ghù nzwit, mfaṅ nzwi i mfèl i.

²⁶Be ndaṅndaṅ num mbatte bàa, mbatte tat tà nèn nkum num njoṅ yub ntu sammbàa fa;

²⁷bo kwù, mènnzwi bèn nkwù ze.

²⁸Ndùlala, ngelaṅ ze nelo num vù nsi ku' là, mènnzwi nsi b'a ze we netèt ben sammbàa, mba njoṅ yub fa so i l'à?

²⁹Là Yésu bùnte, ntshob bo ndù: Bin fàn manze, bin ke' lèn ju ze bo na' nkite là mba neta Nsi.

³⁰Nummbe ntùm nelo num vù, benntùn ke so mènnzwi ke bèn mfà ngonngon tshob ntùm nandà, là bo nsi be à mba ba Angél mfe kamànyam nà.

³¹Mbe se' mba nelo ben tse bo na' nkwù là num vù là, bin ke' yoṅ nsiaṅ men ntshob li Nsi na' ntshob bin ndù:

³²Me b'a Nsi Abraham, mba Nsi Isak, mba Nsi Yakob; a ke' b'a Nsi fe ben, là, a b'a Nsi ben bo be ntùn nà.

³³Bwoṅ benntùn be ju'u, ngamte nu z'a tswite là neshu.

³⁴Là ba Férésia be ju' ndù Yésu ghù ba Sadukai tswe ntshu mi'i, mbèn ntse'te,

³⁵mo' ngalèn ntshù' Nsi netèt bo laṅte Yésu mbètt'é ndù:

³⁶Ngatswite, a mit ntshù' bèn mbe mi ndùb ntùm ntshù' Nsi à?

³⁷A tshob yi ndù: Ke nkô Tàan Nsi o, njoṅ ntù o fa, njoṅ zwiag so fa, mba njoṅ nkwatenu mu fa.

³⁸Yen ni b'a ntshù' ze ndùb, mbèn mbe mbwe i.

³⁹Mbatte bàa fut'é: O nsi ke kô mèn z'a ghebte mbaṅ o là mba yu tu wut là.

⁴⁰Njoṅ ntshù' Nsi fa mba ghatshob ntshob Nsi b'a ntùm men ntshù' mbàa là.

⁴¹Yésu bètte ba Férésia tse bo tse'te là, ntshob ndù:

⁴²Bin kwate ndùke num Kristô à? A b'a mén we? Bo tshob yi ndù mén David.

⁴³A tshob bo ndù: Kà David na' ntshùa njam Ywèt nke ntsiaṅ i Tshùaben à ndùke, ntshob ndù:

⁴⁴Tshùaben tshob Tshùaben àm ndù: Tswe num bag bu àm ze zwim, tà nkum ngelaṅ me nsi ma' ghakeban tsho nsi tun nku mu là.

⁴⁵Mba David tsiaṅ i Tshùaben nà, be a bèn mbe mén i à ndùke?

⁴⁶Sàm mèn ke ku'ni nebùnte ta' ntshob yi mba ntshù'; fe num sen lé'njù là, sàm mèn ke bèn mfèn ntù nebètt'é nu.