Read Medumba Matio 23 Bible Online

Matio 23 - Medumba bible

Matio 23

¹Yésu tshob nu bwoṅ benntùn mba ghazi'te nu i, ntshob ndù:

²Ghalèn ṅwa'ni mba ba Férésia tswe num diaṅ Mosé:

³Njoṅ tshu fa tse bo num ntshob bin nà, bin ghù, mbèn nze njoṅ i fa, là kà bin bwe mfa' mube. Nummbe bo num ntshobe, ke ghù.

⁴Bo num nkut tshu nelèle, njab num nkembe' benntùn, là tu wut tshob ke kô nekwag mba ntubu yub.

⁵Bo num mfa' njoṅ mfa' mub fa à ndù benntùn yen yube. Bo num nke ngù nkin tshob ghu', mbèn ngù ntôg nzwe mub sag.

⁶Bo num nkô netswe mbwe dù' ntùm dù' jujù, mba mbwe ndiaṅ ntùm sinagogue,

⁷nkô ndù benntùn ke ntsha'te yub num manze mba ndù bo ke ntsiaṅ yub ndù: Rabbi.

⁸Là bin, kà bin ghù bo tsiaṅ zin ndù: Rabbi. Nummbe ngatswite zin b'a ntshù', njoṅ zin fa be fètfèle.

⁹Kà bin fà lén Tà tà zin num nsitsha'a, nummbe Tà zin b'a ntshù', yen nà z'a be kamànyam nà.

¹⁰Kà bin ghù bo tsiaṅ zin ghatshagte, nummbe ngatshagte zin b'a ntshù', yen nà b'a Kristô.

¹¹Là mèn z'a be mèn ndùb ntshùa tsemo' netèt bin nà, nsi be ngafa' zin.

¹²Mèn z'a nsi lo' wul i nèn yi tù là, bo nsi tèn i fà nsi; mèn z'a nsi lo' wul i nèn yi nsi là, bo nsi bù' i fà tù.

¹³Nge' num bin ghalèn ṅwa'ni Nsi mba ba Férésia ghamfùm, nummbe bin fùn nze nufen kamànyam mbwe benntùn, ke tsho bwe zin tu, ke bèn mbam ben tse bo kô netsho bwe là ndù bo tsho bwe. [

¹⁴Nge' num bin ghalèn ṅwa'ni Nsi mba ba Férésia ghamfùm, nummbe bin num nke nkwé jujù fôg bènnzwi, mbe tatte benntùn nke nde'te Nsi a sag. A ndùlala, bin a' se' ngwù ntsha z'a ntshùate là.]

¹⁵Nge' num bin ghalèn ṅwa'ni Nsi mba ba Férésia ghamfùm, nummbe bin num nke nkatte num dibantse mba num tsha' neghù ta' ngabam nu zine, ngelaṅ z'a bam nà, bin bèn ngù a tù' mèn z'a nsi tsho ntùm mbwôg ntshùa zin yoṅ bàa là.

¹⁶Nge' num bin ba mfùmiag ghatshagte tse bin num ntshob ndù: A be ze mèn lo' Ndà Nsi nkàn mfe yi là, mb'a' ke mo' nu; là, a be ze mèn lo' gol Ndà Nsi, nkàn mfe yi là, mb'a ghù ju z'a kàn mfe num bwe là.

¹⁷Ba kagni mba ba mfùmiag, ze ndùb b'a zil à, gol ke Ndà Nsi z'a lànte gol l'à?

¹⁸Bin num mbèn ntshob ndù: A be ze mèn lo' tômbwôg le'te Nsi nkàn mfe yi là, mb'a ke ghù mo' nu; là, a be ze mèn lo' ju neghamte Nsi z'a be bwe, nkàn mfe yi là, mb'a' ghù ju z'a kàn mfe num bwe là.

¹⁹Ba mfùmiag, ze ndùb b'a zil à, ju neghamte Nsi ke tômbwôg z'a lànte ju neghamte Nsi l'à?

²⁰Mèn z'a lo' tômbwôg nkàn mfe yi là, mb'a kàn mfe num tômbwôg mba num njoṅ tshu fa ts'a be num bwe là.

²¹Mèn z'a lo' Ndà Nsi nkàn mfe yi là, mb'a kàn mfe num Ndà Nsi mba num mèn z'a be ntswe bwe là.

²²Mèn z'a lo' kamànyam nkàn mfe yi là, mb'a kàn mfe num ko'fen Nsi mba num mèn z'a be ntswe num bwe là.

²³Nge' num bin ghalèn ṅwa'ni Nsi mba ba Férésia ghamfùm, nummbe bin be ndo' netshime, ntàmndoṅe, ywitngon, ngabte nze gham, mfà ta' bag i ghale'te Nsi, là njôg mfaṅ nu ntùn z'a be ntùm ntshù' là njam: Nunetsine, kondèn mba bamntù. A bwô neze yen ni ke faṅ yen nà njam.

²⁴Ba mfùmiag ghatshagte, bin num ntshit ntse mbwôg nemi nzenze, là njôg mi kamél.

²⁵Nge' num bin ghalèn ṅwa'ni Nsi mba ba Férésia ghamfùm, nummbe bin num nsôg njam mvèn ntu' mba nka, là ntùm bwe be ndù a dun lamte tshu mba tshu kebwô.

²⁶Mfùmiag ze Férésia, bwôgmbwe nsôg ntùm ntu', ndù mba njam mvèn i làn ze.

²⁷Nge' num bin ghalèn ṅwa'ni Nsi mba ba Férésia ghamfùm, nummbe bin fut'a ntufi mi bo se' yub mbem nà: Bo num mbwô njam njù, là mbe ndù ntùm bwe dun mvôge, mba njoṅ tshu fa ts'a ke' làn nà.

²⁸Be ndaṅndaṅ, mba bin num mbe mba ben netsin nà mbwe benntùn, là mbe ndù bin dun mfùm mba nukebwô ntùm bwe.

²⁹Nge' num bin ghalèn ṅwa'ni Nsi mba ba Férésia ghamfùm, nummbe bin num nke nkut ntufi ghatshob ntshob Nsi, mbèn nabte ntàb ntufi ben netsin a bwô,

³⁰nke ntshob ndù: Bag na' mbe ngelaṅ ba tà tshage, mba bag lo ke tamte tshag bag à bo nefètte lem ghatshob ntshob Nsi.

³¹Ndùlala bin num nke nkwé nta tu wut tsin ndù bin b'a bon ben tse bo na' nzwite ghatshob ntshob Nsi là.

³²Mba bin zin, bin zwiagte nu ba tà tsine,

³³Ba nyu, nzwit ngamnyu, be bin kù nevù ntsha z'a ma' zin ntùm dù' mbwôg l'à ndùke?

³⁴A ndùlala, tshù, me tshwèt ntum ghatshob ntshob Nsi, ghazenu mba ghalèn ṅwa'ni Nsi bin; bin nsi zwite tsemo' netèt bo, bèn kwimte tsemo' num fanta'tù; bin nsi lab tsemo' nshua' ntùm sinagogue tsine, bèn ta' yub ntùm ngô tsine,

³⁵ndù lem ben netsin tse bo fètte num nsitsha' là tsho tu bin, fe num lem Abél mèn netsine, tà nèn nkum num lem Sakaria mén Bàrakia, ze bin na' nzwi i netèt Ndà Nsi mba tômbwôg nele'te Nsi là.

³⁶Kua' nenùne, me tshob bin ndù njoṅ tshen ni fa nsi tsho tu yen zwiaṅ benntùn ni.

³⁷Yérusalém, Yérusalém, wù z'o num nke nzwite ghatshob ntshob Nsi, ntamte ben tse bo tum yub wù là ndoṅ nà, a yoṅ si' mba me diag netse'te bon tsho ndaṅndaṅ mba mà ngab be ntse'te bon tse tun mbàb mi bin ke kô à?

³⁸Tshù, zin ba' nsi tù' fam.

³⁹Nummbe me tshob bin ndù: Bin ke bèn neyen àm fe ndonni tà nkum ngelaṅ bin nsi tshob ndù: Mbotni be mèn z'a tshwèt nse' num lén Tshùaben nà.