Read Medumba Matio 26 Bible Online

Matio 26 - Medumba bible

Matio 26

¹Ngelaṅ Yésu miagte netshob men ntshob là fa là, a tshob ghazi'te nu i ndù:

²Bin lèn ndù a tù' lé'njù bàa Pasa be, bo tshwèt nswèn Mén mèn ndù bo kwimt'é num fanta'tù.

³Ghale'te Nsi tse ndùbndùb mba ghakwé mbwe ntùm ngô bumte ntshundà ngale'te Nsi ze ndùb, ze bo ke ntsiaṅ i Kaifa là,

⁴ngù ntse'te ndù bo tshùa ntùm nkùnkù kà ntshùb Yésu nzwi i.

⁵Là bo ke ntshob ndù: A ke' bwô ndù yen nu là b'a lé'njù jùa, ndùlala ndù kà tshu'te be netèt benntùn.

⁶Ngelaṅ Yésu be Bètania ntùm ndà Simon ngankin nà,

⁷mo' mènnzwi se' mbaṅ i ndù a ghù ntshaṅ labinda ze tanjoṅ, naṅ num tu Yésu z'a tswe téblé là.

⁸Là ghazi'te nu i be yene, nja ntù, ntshob ndù: Yen nebagte li ywimt'a ke?

⁹Bo lo nku'ni neswèn i nkàb yàme, mfà bwoṅbwoṅ.

¹⁰Là Yésu ju', ntshob ndù: Numke bin nke ngùtni yen mènnzwi l'à? A fa' fa' mebwô num àm.

¹¹Bin à bwoṅbwoṅ nke mbe njoṅ ngelaṅ fa, là bag à bin ke ke mbe njoṅ ngelaṅ fa.

¹²Mb'a fètte yen labinda là num wul àm nà, a nabt'a netshoṅ àm.

¹³Kua' nenùne, me tshob bin ndù: Njoṅ dù' fa tse bo nsi ke tshob yen nkùn mebwô li bwe ntùm njoṅ ngô njù fa là, bo nsi soṅ mba ju z'a ghù là, num nekwimte lén se yi.

¹⁴Mo' mèn netèt tse ntshob bàa gham, ze bo na' nke ntsiaṅ i Yuda Iskariot là, nèn ntèt ghale'te Nsi tse ndùbndùb, ntshob ndù:

¹⁵Ke ze bin kô nefà me, me fà i bin à?

¹⁶Bo bam silba ṅam ntat. Fe num yen ngelaṅ nà, a nke ndiag manze mebwô z'a nsi tshùa bwe kà fà i bo là.

¹⁷A be mbwe lé'njù bàn keko', ghazi'te nu Yésu se' mbaṅ i, ntshob ndù: O kô ndù bag nabte jujù Pasa wù à yà?

¹⁸A tshob ndù: Bin nèn ntùm ngô, la' yen mèn nà, ntshob yi ndù: Ngatswite tshob ndù: Yàm ngelaṅ ghebte, m'a' jù Pasa à la' o bag à ghazi'te nu àm.

¹⁹Ghazi'te nu Yésu ghù be ndaṅndaṅ mb'a tshob bo là, nabte Pasa.

²⁰Njù be sène, a tswe téblé boa ghazi'te nu i ntshob bàa gham.

²¹Ngelaṅ bo ke njù jujù là, Yésu tshob ndù: Kua' nenùne, me tshob bin ndù mo' mèn netèt bin nsi swèn àm.

²²Bo nywin kua' neshu, nto' netshob yi ntshù' ntshù' ndù: A ke b'a me ké, Tshùaben?

²³Là, a bùnte ntshob ndù: A b'a mèn ze bag yi tshag bu ntùm ka là, yen mèn nà bèn nswèn àm.

²⁴Mbe se' mba Mén mèn nà, a nèn à ndaṅndaṅ mba bo na' nkite num i là, là nge' tu mèn yen nà ze bo nsi tshùa njam i kà swèn Mén mèn nà. A lo bwô yen mèn nà ndù kà bo bwe i mba nebwe.

²⁵Là Yuda mèn z'a swèn i là, bùnte, ntshob ndù: A ke b'a me ké, Rabbi; a tshob yi ndù: Mb'o tshob là.

²⁶Ngelaṅ bo ke njù jujù là, Yésu lo' bàn, nde'te Nsi, mbe'te, mfà ghazi'te nu i, ntshob ndù: Bin ko là njù, yen ni b'a mbàb wul àm.

²⁷Mbèn ndo' ntu', nde'te Nsi, mfà bo, ntshob ndù: Bin nu ntùm bwe njoṅ zin fa.

²⁸Nummbe yen ni b'a lem tshàm tse kàn tse bo fètte num tu benntùn yàm ndù Nsi lagte nukebwô tshob là.

²⁹Me tshob bin ndù: Fe ndonni me ke nsi bèn nu ndu' tà nkum sen lé'njù là se me nsi bèn nu ndu' nswe bag à bin ntùm nufen Tàa là.

³⁰Bo be miagte neyob kwi, ntum nèn num mbat ntene.

³¹Yésu tshob ndù: Njoṅ zin fa nsi vù ntùm ywi' num àm yen tèttswe' li, nummbe bo lo kite ndù: Me nsi lab ngabéb njùmbwe, ndà njùmbwe sate.

³²Là ngelaṅ me nsi lo num vù là, m'a' kwé mbwe bin Galiléa.

³³Là Pétro bùnte, ntshob yi ndù: A be ze njoṅ yub fa vù ntùm ywi' num o là, mba tu wul àm ke nsi vù tshàm ntùm ywi'.

³⁴Yésu tshob yi ndù: Kua' nenùne, me tshob wù ndù yen tèttswe' li, kù'ngab nsi be tô ndù o à gha àm yoṅ tat.

³⁵Pétro tshob yi ndù: A be z'a bwô ndù me kwù bag wù là, mba me ke nsi gha o tshàm. Njoṅ ghazi'te nu i fa tshob be ndaṅndaṅ.

³⁶Yésu kum bo à bo ntùm mo' dù' bo ke ntsiaṅ ndù Gétsémané là, a tshob ghazi'te nu i ndù: Bin tswe nsen ni, me nèn nsen nà tà nkum ngelaṅ me nsi miagte nele'te Nsi là.

³⁷A lo' Pétro mba bon Zèbèdéo bàa, nto' nenywine mba netswe nge'.

³⁸A tshob bo ndù: Ntù àm tshwèt nywin tà ntù' b'a ze vù. Bin tswe nsen ni, bag à bin zi tshùalo.

³⁹A nèn mén nda'nda', ngwù nsi kabkab, nde'te Nsi, ntshob ndù: Tà, a be z'o kô là, o ghù yen ntu' li tôg àm. Là ke b'a mba me kô là, là mb'o kô là.

⁴⁰A bèn njam mbaṅ ghazi'te nu i, njen yub ndù bo tshwèt nzi, a tshob Pétro ndù: Ndùlala bin ke' ku' nezi tshùalo bag à bin mba nda' ta' nyam ké?

⁴¹Bin zi tshùalo, nde'te Nsi ndù kà bin tsho ntùm laṅte. Ywèt num mbame, là mbàb wut nke mbole.

⁴²A bèn nèn nde'te Nsi num mbatte yoṅ bàa, ntshob ndù: Tà, a be ze yen nà ke' ku' netôg ke me nu i là, yu nekô bumte!

⁴³A bèn mbèn njam, njen yub bo nke nzi, nummbe bo lo ke ntshaṅkèt miaglo.

⁴⁴A faṅ yub mbèn nèn nde'te Nsi num mbatte yoṅ tat, mbèn ntshob be ntshob ntshù'.

⁴⁵A bèn mbèn njam mbaṅ ghazi'te nu i, ntshob bo ndù: Bin zi ndonni, mfite wut tsine; tshù, ngelaṅ ghebte, bo tshwèt nswèn Mén mèn mum mbu ben kebwô.

⁴⁶Bin lo nsi bag à bin nène; tshù, mèn z'a tshwèt nswèn àm nà ghebte.

⁴⁷Mb'a ke nke' ntshob là, Yuda mo' mèn netèt tse ntshob bàa gham se', boa bwoṅ benntùn yàm tse ghale'te Nsi tse ndùbndùb mba ghakwé mbwe ntùm ngô tum yub là, ndù bo tshùb ṅwi mba nzwit mbu bo.

⁴⁸Ngaswèn Yésu lo fà lèn bo, ntshob ndù: Mèn ze me nsi nyô nge' mi là, a yi, bin tshùb i.

⁴⁹A yoṅ mbe kum mbaṅ Yésu, ntshob yi ndù: Rabbi, me tsha't'o, nyô nge' mi.

⁵⁰Là Yésu tshob yi ndù: Nshun àm, a ju z'a ghù o se' nsen ni là. Bo se' mbaṅ i, njab mbu num Yésu, ntshùb i.

⁵¹Tshù, mo' mèn netèt tse boa Yésu be là, nyit bu i, nsô ṅwi, ndab tshe' ngale'te Nsi ze ndùb yi, nkeb toṅ i,

⁵²Yésu tshob yi ndù: So ṅwi o ntùm mbàn i. Nummbe ben tse bo num ntsho' ṅwi là nsi kwù à ṅwi.

⁵³O kwat'a ndù me lo ke ku'ni nebu' mbu Tàa! Là mb'a tum ntshu ntsho ba Angél me ndonni ntshob bàa gham.

⁵⁴Mba ju ze bo na' nkite ndù a bwô a bumte là nsi bumt'a ndùke?

⁵⁵Num yen ngelaṅ nà, Yésu tshob bwoṅ benntùn ndù: Bin tum ndo' ṅwi mba nzwit nse' neghom àm yi, mba me b'a fimntshu là; njoṅ lé'njù fa, me lo ke ntswe nsi ntùm Ndà Nsi, nke ntswite, bin ke tshùb àm.

⁵⁶Là njoṅ yen nà fa se' à ndù ju ghatshob ntshob Nsi na' nkite là bumte. Njoṅ ghazi'te nu i fa faṅ i nkù.

⁵⁷Là ben tse bo tshùb Yésu là lo' i nèn yi ju Kaifa ngale'te Nsi ze ndùb, dù' ze ghalèn ṅwa'ni Nsi mba ghakwé mbwe na' ntse'te là.

⁵⁸Là Pétro nke mbwe i tà ngùanesà, tà nèn nkum ntshundà ngale'te Nsi ze ndùb, ntsho bwe, ntswe nsi boa bônke' tse num neyen miagte nu.

⁵⁹Ghale'te Nsi tse ndùbndùb mba ntse'te ghatsho'te ntsha fa nke ndiag kwénta tatte ze bo nsi yab num Yésu kà zwi i là.

⁶⁰Bo ke yen, mba mba ghakwénta tatte na' ntum yàm nà. A be be mànjam, tsemo' ben bàa tum ntshob ndù:

⁶¹Yen mèn ni lo tshob ndù: Me ku'ni nesate Ndà Nsi, mbèn nkut mo' mum lé'njù tat.

⁶²Ngale'te Nsi ze ndùb tsin tù, ntshob yi ndù: O ke' bùnte sàm nu ké? Ke ze tshen ben ni tshwèt ntete num o à?

⁶³Là Yésu mi ntswe. Ngale'te Nsi ze ndùb tshob yi ndù: Num lén Nsi z'a be ntùn nà, me le't'o, tshob bag a be z'o b'a Kristô Mén Nsi là.

⁶⁴Yésu tshob yi ndù: Mb'o tshob là. Là me tshob bin ndù: Fe ndonni, bin nsi yen Mén mèn ndù a tswe num bag bu neta ze zwim, a nsi se' num ndot kamànyam.

⁶⁵Là ngale'te Nsi ze ndùb fag kummbaṅ se, ntshob ndù: A tshabte Nsi. Be bèn ndiag ghakwénta numke?

⁶⁶Bin kwate ndùke? Bo bùnte ntshob ndù: A ku'ni mèn vù.

⁶⁷Bo tôg nkekùà num se i, ndab i, ntsham i nto', ntshob ndù:

⁶⁸Kristô, tshob bag, we z'a lab o à?

⁶⁹Là Pétro tswe nsi njù ntshundà, mo' mènnzwi ngafa' se' mbaṅ i, ntshob ndù: Mba wù lo be bin Yésu ze Galiléa.

⁷⁰Là, a gha mbwe njoṅ yub fa, ntshob ndù: Me ke' lèn nu z'o tshwèt ntshob là.

⁷¹Là, a be tum nzendà, mo' yen i, ntshob ben tse bo be nsi là ndù: Yen mèn ni lo be bo Yésu ze Nazarèt.

⁷²Là, a be ghubte nkàn mfe, ntshob ndù a ke' lèn yen mèn nà.

⁷³Là, a be ghubte mén nda'nda', ben tse bo be bwe là, se' mbaṅ Pétro, ntshob yi ndù: Kua' nenùne, mba wù yu, o b'a mo' mèn netèt tshen ben nà, nummbe yu mat netshob tshwèt nda't'o.

⁷⁴Là, a to' nema' njom, nkàn mfe, ntshob ndù: Me ke' lèn tshàm yen mèn nà. Be ndùse kù'ngab tô.

⁷⁵Pétro kwimte ntshob Yésu mi a tshob yi ndù: Kù'ngab nsi be tô ndù o à gha àm yoṅ tat là, ntum njù, nkua' neshu.