Read Medumba Marko 10 Bible Online

Marko 10 - Medumba bible

Marko 10

¹A lo num yen dù' là, nèn nkum bag ngô Yudéa mba mo' yoṅ Yordan. Bwoṅ benntùn bèn ntse'te mbaṅ i; mb'a be ze matnu là, a tswite yube.

²Ba Férésia se' mbaṅ i, ndaṅt'é, mbètt'é ndù: Ntshù' bam ndù mèn sô nzwi i ké?

³Là, a bùnte, ntshob bo ndù: Mosé lo tshob bin à ndùke?

⁴Bo tshob ndù: Mosé lo bam ndù be mèn kite ṅwa'ni nefagte nandà, nsô nzwi i.

⁵Là Yésu tshob bo ndù: Mosé kite men ntshù' là bin à num sagntù tsine.

⁶Là neto'te mba njù be là, Nsi nabte yube, nabte mandum mba mènnzwi.

⁷A ndùlala mèn nsi faṅ tàab mba màab lat num nzwi i,

⁸ntu tshob bàa tù' ta' mènntùn ntshù'. Ndùlala bo ke bèn mb'a bàa, là nda' ta' mènntùn ntshù'.

⁹Ndùlala, ju ze Nsi tamte là kà mèn fagte.

¹⁰Bo be kum ndà, ghazi'te nu i bèn mbètt'é num yen nu là.

¹¹A tshob bo ndù: Mèn z'a sô nzwi i, mbèn nso mo' là, mb'a ghù màndà bo yi.

¹²A be ze mènnzwi faṅ ndu i, mbèn ngù mo' là, mb'a ghù màndà.

¹³Bo lo' bontsit bônke' nse' yi ndù a kwag yube. Là ghazi'te nu i nke ntshobte ben tse bo se' bo là.

¹⁴Yésu be yen ndùlala, nja ntù, ntshob bo ndù: Bin faṅ bontsit bônke' bo se' ntèl àm, kà bin tshèt yube, nummbe nufen Nsi b'a ze ben tse bo be ndaṅndaṅ mba bo là.

¹⁵Kua' nenùne, me tshob bin ndù: Mèn z'a ke nsi kwé nufen Nsi à mba metsit mén nà, ke nsi tsho bwe.

¹⁶A tate yube, njab mbu mi tu bo, naṅ mbotni num bo.

¹⁷Mb'a ke ntam nze nenèn nà, mo' mèn kù nde, nse' nkwim ntunkekwi' mi nsi mbwe i, mbètt'é ndù: Ngatswite ze mebwô, me nsi ghù à ndùke, kà ghù yàm bag i ntùm yôg matmat là?

¹⁸Yésu tshob yi ndù: Numk'o tsiaṅ àm mèn mebwô à? Sàm mèn ke mèn mebwô k'a ke nda' Nsi tù' i.

¹⁹O lèn ntshù' Nsi: Kà zwi mèn, kà ghù màndà, kà yi tshô, kà kwé nta tatte, kà te nu num mèn, ke nku'ni tàan mba màan.

²⁰Mèn nà bùnte yi ndù: Ngatswite, me lo à ze men ntshù' là fe ngelaṅ me be mônke' là.

²¹Yésu te miag num i, ndôt'é, nkô i, ntshob yi ndù: Ta' ju bwoṅ wù. Nène, nswèn njoṅ tshu fa ts'o ghù là, mfà nkàb bwoṅbwoṅ, o nsi se' ghù junkàb tanjoṅ mfe kamànyam, bèn nse' ntam njam àm.

²²Num men ntshob là, mèn nà nyamte se i, nèn nenywine, nummbe a lo ghù tshu yàme.

²³Yésu lôte mbaṅ i ndiaṅ mbume, ntshob ghazi'te nu i ndù: Mi' a ta neshu ben tse bo ghù tshu yàm nà netsho ntùm nufen Nsi.

²⁴Ghazi'te nu i tshàm neshu num men ntshob là. Yésu bèn mbùnte, ntshob bo ndù: Bon tshàm, mi' a ta neshu ben tse bo yab ntù tshob num nkàb là netsho ntùm nufen Nsi.

²⁵A fùag kamél netôg tô nto ntshùa mb'a be ngankàb tsho ntùm nufen Nsi là.

²⁶Bo bèn ntshàm nga' mbu, ntù' ke ntshob bo bo ndù: K'a we z'a ku'ni neyôg à?

²⁷Yésu te miag num bo, ntshob ndù: Yen nu li tshùa à benntùn, a ke' tshùa Nsi, nummbe Nsi ku'ni neghù njoṅ nu fa.

²⁸Pétro to' netshob yi ndù: Tshù, mba bag lo faṅ njoṅ tshu fa, ntam njam o.

²⁹Yésu tshob ndù: Kua' nenùne, me tshob bin ndù: Mèn ke bwe z'a na' mfaṅ ndà i, ke fèt tse tse bandum ke tse bènnzwi, ke màab ke tàab, ke bon tse, ke nà i lo num àm mba num nkùn mebwô là,

³⁰z'a ke nsi kwé tshen tshu là yoṅ nkù fe ndonni ntùm yen njù li: Ndà, fèt, mà, bon, nà ntùm netsho' nku kebàn, mbèn nkwé yôg matmat ntùm njù z'a nsi se' là.

³¹Là benntùn yàm netèt mbwe benntùn a' ghù ntshèt njam, benntùn yàm netèt njam benntùn bèn nkwé mbwe.

³²Bo be num manze neko' nèn Yérusalém, Yésu zin mbwe ghazi'te nu i. Bo tshàm; ben tse bo ke ntam njam i là bwôg. A bèn ndo' tse ntshob bàa gham mbaṅ i, nto' nesoṅ yub tshu ts'a nsi ghù i là.

³³Tshù, bag bin tshwèt nko' nèn Yérusalém; bo nsi fà Mén mèn mbu ghale'te Nsi tse ndùbndùb mba ghalèn ṅwa'ni Nsi; bo nsi keb ntsha ndù bo zwi i, mfà i mbu ghakelèn Nsi;

³⁴bo nsi tshabt'é, ntôg nkekùà num i, ndab i nshua'a; a be tshùa lé'njù tat, a lo num vù.

³⁵Yakobo mba Yohané, bon Zèbèdéo, se' mbaṅ i, ntshob yi ndù: Ngatswite, bag kô ndù o ghù mba zit ju lo ze bag nsi lon wù là bag.

³⁶A tshob bo ndù: Ke ze bin kô ndù me ghù bin à?

³⁷Bo tshob yi ndù: Bam bag ndù bag tswe nsi ntùm nkuni mu, mo' mèn num bag bu o ze zwim, mo' num bag bu o ze kwéb.

³⁸Là Yésu tshob bo ndù: Bin ke' lèn ju ze bin lon nà. Bin ku' nenu ntu' ze me nu là ké? Bin ku' nebam ndù bo nyu' zin ntùm men ntse mi bo nsi nyu' àm bwe là ké?

³⁹Bo tshob yi ndù: Bag ku'u! Yésu tshob bo ndù: Ntu' ze me nsi nu là, bin nsi nu, ntse mi bo nsi nyu' àm bwe là, bo nsi nyu' zin bwe.

⁴⁰Là mbe se' mba netswe num bag bu àm ze zwim ke ze kwéb lo, a ke b'a me bèn fà, là, a b'a ju ben tse bo na' nabte num bo là.

⁴¹Tse gham lo be ju'u, nto' neya ntù Yakobo mba Yohané.

⁴²Yésu tsiaṅ yub mbaṅ i, ntshob bo ndù: Bin lèn ndù ben tse bo num ndo' yub mba ghatô ngô là num ntô i neta, ben ndùbndùb ntùm ngô nke ndo' neta, ngùtni yub yi.

⁴³Là, a ke' b'a ndùlala netèt bin; mèn z'a kô netù' mèn ndùb netèt bin nà nsi tù' ngafa' zin;

⁴⁴mèn z'a kô nebe mbwe mèn netèt bin nà nsi tù' nkuan njoṅ benntùn fa.

⁴⁵Nummbe Mén mèn lo ke se' à ndù benntùn fa' yi, là ndù a fa' benntùn, mbèn mfà yôg se, ndo' ntshu' benntùn yàm yi.

⁴⁶Bo kum Yériko. Ngelaṅ Yésu ke ntum Yériko boa ghazi'te nu i, mba bwoṅ benntùn yàm nà, Bartiméo mén Timéo, mfùmiag z'a ke ndon tshu là, lo tswe nsi nkaṅ manze.

⁴⁷Mbe ju' ndù a b'a Yésu ze Nazarèt, nto' nekua' neta, ntshob ndù: Yésu mén David, ko ndèn màm.

⁴⁸Benntùn yàm nke ntshobt'é ndù a mi ntswe, là a bèn nkua' neta ndù: Mén David, ko ndèn màm.

⁴⁹Yésu tsin, ntshob ndù: Bin tsiaṅ i! Bo tsiaṅ mfùmiag là, ntshob yi ndù: Fèn ntù, ndo tù, a tshwèt ntsiaṅ o.

⁵⁰A ma' kummbaṅ se nsi, ndo, ntsin tù ndende, nèn mbaṅ Yésu.

⁵¹Yésu bùnte, ntshob yi ndù: Ke z'o kô ndù me ghù wù à? Mfùmiag tshob yi ndù: Rabbuni, ghù me yen nze.

⁵²Yésu tshob yi ndù: Nène, bamntù o yôg o. Be ndùse, a yen nze, ntam njam Yésu num manze.