Read Medumba Marko 11 Bible Online

Marko 11 - Medumba bible

Marko 11

¹Ngelaṅ bo ghebte Yérusalém mbwe Bètfagé mba Bètania mbaṅ mbat nten nà, Yésu tum tse bàa netèt ghazi'te nu i,

²ntshob bo ndù: Bin nèn ntùm yen ngô là z'a mbwe bin nà. Bin nsi yoṅ be tsho bwe, yen mén kekwèn ndù bo taṅ i, ze mèn ke' yoṅ nko' num i là. Bin ké' i, ndo' i nse' yi.

³A be ze mèn tshob bin ndù: Bin ghù à ke nsen nà à? Bin tshob yi ndù: Tshùaben diag i; a nsi ba' i wù be nsen ni kua' ndende.

⁴Bo nèn, njen mén kekwèn ndù bo taṅ i ntshundà num mfagte manze, bo ké' i.

⁵Tsemo' ben netèt benntùn tse bo be bwe là tshob bo ndù: Bin ghù à ke nsen nà, kà nke nké' kekwèn à?

⁶Là bo tshob mba Yésu lo ntshob bo là. Bo faṅ bo nèn yi.

⁷Bo lo' mén kekwèn, nse' mfà Yésu, ma' nzwe tshob num i, a tswe num i.

⁸Benntùn yàm nyit nzwe tshob num manze, tsemo' bèn naṅ ntshùantù mi bo keb ntùm nà là bwe.

⁹Ben tse bo be mbwe mba tse bo be njam nà, kua', ntshob ndù:

¹⁰Mbotni be nufen tà yag David, z'a tshwèt nse' là. Hôsanna tà mfe tù!

¹¹Yésu tsho Yérusalém ntùm Ndà Nsi, ndôte njoṅ tshu fa. Mba njù ke nsèn nà, a tum nèn Bètania boa tse ntshob bàa gham.

¹²Bo be tum Bètania nkebnjù, nziku' ya Yésu.

¹³A yen tù mbatsi ngùanesà ndù mfu mi yàm, a nèn nelôte a be ze ntàm mi be bwe là. Ngelaṅ a kum mbaṅ bwe là, a ke fon sàm ju k'a ke nda' mfu mi, nummbe a lo ke b'a ngelaṅ z'a num njam nà.

¹⁴A ndùlala, Yésu tshob tù mbatsi là ndù: Be mèn ke bèn njù ntàm mu mba yoṅ ntshù'! Ghazi'te nu i ju' men ntshob là.

¹⁵Bo zin nkum Yérusalém. Ngelaṅ a tsho Ndà Nsi là, a to' neta' ben tse bo ke nswèn tshu mba ben tse bo ke njun tshu ntùm Ndà Nsi là, ntèn téblé ghabate nkàb mba ndiaṅ ghaswèn mbwoṅsaṅe, ntamte nsi.

¹⁶A ke bam sàm mèn ket ju ntshùa yi ntùm Ndà Nsi.

¹⁷A tswite yub ntshob ndù: Bo lo ke kite ndù: Bo nsi tsiaṅ ndà àm, ndà le'te Nsi num njoṅ nzwit benntùn fa ké? Là bin ghù à kaṅ ntù' ngab ba tshô.

¹⁸Ghale'te Nsi tse ndùbndùb mba ghalèn ṅwa'ni Nsi ju', nke ndiag mba bo nsi zwi i là; là bo bwôg i, nummbe njoṅ benntùn fa lo ke nyàmte nu z'a ke ntswite là neshu.

¹⁹Njù lo be sène, Yésu tum ntùm ngô.

²⁰Bo be tshùa mo' nkebnjù, njen tù mbatsi ndù a jum fe num nga tse.

²¹Pétro kwimte ntshob yi ndù: Rabbi, tshù, tù mbatsi s'o lo nso ndon tu i là jum.

²²Yésu bùnte, ntshob bo ndù: Bin ghù bamntù num Nsi!

²³Kua' nenùne, me tshob bin ndù: A be ze mèn tshob yen mbat li ndù: Tsho' nsen nà, ngwù ntùm dibantse, mbe ndù a ke' ghù magte ntù i, là mbam ndù ju z'a tshob là a' bumte là, mb'a nsi be be ndaṅndaṅ num i.

²⁴A ndùlala, me tshob bin ndù: Njoṅ tshu fa tse bin num ndon ntùm nele'te Nsi là, bin bam ndù bin a' kwé, mb'a nsi be be ndaṅndaṅ num bin.

²⁵Ngelaṅ bin tsin tù nele'te Nsi là, bin lagte nu tse benntùn ghù bin nà, ndùlala ndù Tà zin z'a be kamànyam nà lagte ze min mfànnu. [

²⁶A be ze bin ke' lagte là, mba Tà zin z'a be kamànyam nà ke nsi lagte ze min mfànnu.]

²⁷Bo bèn nèn Yérusalém. Ngelaṅ Yésu ke nzinte Ndà Nsi là, ghale'te Nsi tse ndùbndùb, ghalèn ṅwa'ni Nsi mba ghakwé mbwe nse' mbaṅ i,

²⁸ntshob yi ndù: O ke ngù tshen nu li à ntùm zit ngù' à? We bèn mfà yen ngù' neghù tshen nu li wù à?

²⁹Là Yésu bùnte bo ndù: Mba me nsi bètte zin ta' nu ntshù'. Bin bùnte me, mba m'a' soṅ zin ngù' z'a be ngù me ghù tshen tshu là là.

³⁰Kwéntse Yohané fe à kamànyam k'a fe à benntùn à? Bin bùnte me.

³¹Bo kwate, ntshob netèt bo ndù: A be ze be tshob ndù a fe à kamànyam nà, mb'a' tshob ndù: Bin na' mbe ke bam i numke?

³²Là, a be ze be bèn netshob ndù: A fe à benntùn nà, bo bwôg bwoṅ benntùn, nummbe njoṅ benntùn fa ke ndo' Yohané à mba kua' ngatshob ntshob Nsi là.

³³Bo bùnte, ntshob Yésu ndù: Bag ke' lèn. Yésu tshob bo ndù: Mba mba me yàm ke nsi tshob ngù' ze me be ngù tshen tshu là yi là bin.