Read Medumba Marko 2 Bible Online

Marko 2 - Medumba bible

Marko 2

¹A be tshùa tsemo' bon lé'njù, Yésu bèn ntsho Kapernaum; benntùn ju' ndù a b'a ntùm ndà.

²Benntùn yàm se', ntse'te ntùm ndà, ndune, mba njù; a nke ntshob ntshob Nsi bo.

³Tsemo' benntùn lo' mo' kekat, nke nse' yi ndù benntùn kuà kel i.

⁴Mba bo be ke ku' nekel i nèn nkum yi mbwe Yésu, nummbe benntùn lo yàm neshu là, bo tù' nkeb tô num tuba' Yésu be bwe là, ntshag kun kekat nô bwe là, njab mbwe Yésu.

⁵Yésu be yen bamntù yube, ntshob kekat là ndù: Mén àm, nukebwô tsho mi!

⁶Tsemo' ghalèn ṅwa'ni Nsi tse bo be bwe là nke nkwate ntùm ntù tshob ndù: Yen mèn ni tshob ndù numke? A tshwèt ntshabte Nsi.

⁷We z'a ku'ni nelagte nukebwô, kà ke nda' Nsi tù' i à?

⁸Be ndùse, Yésu lèn ntùm ywèt tse ndù bo kwate ndùlala ntùm ntù tshobe, ntshob bo ndù: Numke bin kwate ndùlala ntùm ntù tsin à?

⁹Zit nu z'a fùag neghù, netshob kekat ndù: Nukebwô tsho mi, ke netshob yi ndù: Lo tù, nket kun so nzin à?

¹⁰Là ndù bin lèn ndù Mén mèn ghù ngù' nelagte nukebwô ntùm njù li,

¹¹a tshob kekat là ndù: Me tshob wù ndù: Lo tù, nket kun su, nèn la' o.

¹²A lo tù nket kun se be ndùse, ntum ntshùa num miag njoṅ benntùn fa; njoṅ benntùn fa tshàm neshu, ngamte Nsi, ntshob ndù: Bag ke' yoṅ nto' yen yen lèn nu li.

¹³A bèn ntum kaṅ dibantse, njoṅ benntùn fa se' ntèl i, a nke ntswite yube.

¹⁴A be tshùa nèn mbwe, njen Lévi mén Alféo ndù a tswe dù' nekwé fé'. Yésu tshob yi ndù: Tam njam àm! Lévi lo tù, ntam njam i.

¹⁵Ngelaṅ Yésu tswe téblé ndà i là, ghakwéfé' mba ben kebwô yàm tswe bo à bo mba ghazi'te nu i, nummbe benntùn yàm lo bèn ntam njam i.

¹⁶Ghalèn ṅwa'ni Nsi tse bo na' mb'a num ze bag ba Férésia là, be yen mba Yésu tshwèt njù jujù boa ben kebwô mba ghakwéfé' là, mbètte ghazi'te nu i ndù: A ndùke?

¹⁷Yésu ju'; ntshob bo ndù: A ke' b'a benntùn tse bo tswe mebwô là ke ndiag nga ghù fu, là nda' ben tse bo tswe kebwô là. Me ke na' nse' netsiaṅ à ben netsine, là ben kebwô.

¹⁸Ghazi'te nu Yohané mba ba Férésia num ntswe nziku'u; tsemo' se' ntshob Yésu ndù: Ghazi'te nu Yohané mba ghazi'te nu ba Férésia num ntswe nziku'u, là tsho ghazi'te nu ke' be tswe yub numke?

¹⁹Yésu tshob bo ndù: A be shun ndungon tswe nziku' ngelaṅ boa ndungon ke' l'à ndùke? Njoṅ ngelaṅ fa boa ndungon ke' là, a ke' bwô bo tswe nziku'u.

²⁰Tsemo' bon lé'njù nsi be se'e, bo lo' ndungon netèt bo; a sen lé'njù là se bo nsi tswe nziku' là.

²¹Sàm mèn ke' be lo' kam nzwe nswe, nkwitte njwèn nzwe yi, nummbe nzwe nswe a' tshùb ze njwèn, ntsho't'é, tô se bèn mbag neshu.

²²Be mèn ke nebèn naṅ ndu' nswe ntùm ntu' njwèn; a be z'a ghù ndùlala là, mba ndu' a' tsit ntu', bo bi ndu' mba ntu', là ndu' nswe ntùm ntu' nswe.

²³A be mo' lé' Sabbat, Yésu tshùa ntùm nà ngefele, ghazi'te nu i be zin nke mfag ngefele.

²⁴Ba Férésia tshob Yésu ndù: Tshù, bo ke ngù ju ze ntshù' ke' bam nà lé'njù Sabbat numke?

²⁵A tshob bo ndù: Bin ke' yoṅ nsiaṅ ju ze David na' ngù ngelaṅ a na' mbwoṅ jujù, nziku' bèn nja i boa ben tse bo à bo na' mbe là,

²⁶mb'a na' ntsho Ndà Nsi ngelaṅ Abiatar na' mbe ngale'te Nsi ze ndùb, njù bàn le'te Nsi ze ntshù' be ke bam nejù kà ke nda' ghale'te Nsi là, mbèn mfà ze ben tse bo à bo be là ké?

²⁷Yésu bèn ntshob ndù: Bo nabte Sabbat à num mènntùn, bo ke nabte mènntùn à num Sabbat.

²⁸Ndùlala, Mén mèn b'a mba tà Sabbat.