Read Medumba Marko 9 Bible Online

Marko 9 - Medumba bible

Marko 9

¹A bèn ntshob bo ndù: Kua' nenùne, me tshob bin ndù: Tsemo' benntùn netèt ben tse bo be nsen ni là, ke nsi kwù tà nkum ngelaṅ bo yen nufen Nsi se' ntùm neta là.

²Lé'njù ntôg lo be tshùa, Yésu lo' Pétro, Yakobo mba Yohané, bo à bo nèn nda' tù' bo num mo' mbat ndù a sage, wul i kaṅ mbwe bo.

³Nzwe tse tù' ṅwa'ṅwa' fôgtab, ze sàm ngasôg nzwe ntùm njù li ke' ku' neghù a fôg mba tse là.

⁴Elia mba Mosé ṅwag mbwe bo, nke ntshobte boa Yésu.

⁵Pétro bùnte, ntshob Yésu ndù: Rabbi, a bwô bag à bin ghô nsen ni, ndùlala be kut ntàb tat, mo' be yu, mo' be ze Mosé, mo' bèn mbe ze Elia.

⁶A lo ke bèn ndèn nu z'a tshob là, nummbe bo lo ke mbwôg nebwôge.

⁷Mo' ndot se', ndam yub mbume. Ntùm ndot là, nze mèn tshob ndù: Yen ni b'a Mén àm ze me num nkô i là, bin ke nju' i.

⁸Be ndùse, bo lôte mbaṅ bo ndiaṅ mbume, ke yen sàm mèn k'a ke nda' Yésu z'a tù' bo à bo là.

⁹Bo be swe' num mbale, a tshù' yub ndù kà bo soṅ sàm mèn ju ze bo lo neyen nà, tà nkum ngelaṅ Mén mèn nsi lo num vù là.

¹⁰Bo lem men ntshob là, là nke ndiag netèt bo nelèn ju ze nelo num vù be yi là.

¹¹Bo bètt'é, ntshob ndù: Ghalèn ṅwa'ni Nsi num nke ntshob ndù a bwô Elia bwôgmbwe nse' numke?

¹²A tshob bo ndù: Ṅ, Elia bèn mbwôgmbwe nse' num neyab njoṅ nu fa nka i. Bo lo kite num Mén mèn ndùke? Ndù a' yen nge' yàme, bo bèn ngwag i.

¹³Là me tshob bin ndù: Mba mba Elia a' se'e, bo ghù num i mba bo kô là, ndaṅndaṅ mba bo na' nkite mfà num i là.

¹⁴Bo be kum mbaṅ ghazi'te nu i, njen mà bwoṅ benntùn mbaṅ bo mba ghalèn ṅwa'ni Nsi bo à bo nke nsoṅte nu netèt bo.

¹⁵Be ndùse, njoṅ bwoṅ benntùn fa yen Yésu, ntshàme, nkù nde nèn mbaṅ i, ntsha't'é.

¹⁶A bètte yub ndù: Bin à bo soṅt'a nu ke?

¹⁷Mo' mèn netèt bwoṅ benntùn bùnte yi ndù: Ngatswite, me lo ndo' à mén àm nse' yi wù, a ghù ywètkebwô, ke be tshob.

¹⁸Mba zit dù' lo a ke ntshùb i là, a tam i nsi, ngù nendù tum ntshu i, a fèt nsô mi, mbèn nsaṅe. Me lo ntshob ghazi'te nu o ndù bo ta' i kà bo ke ku'ni.

¹⁹Là Yésu bùnte ntshob bo ndù: Zwiaṅ ba ke ghù bamntù, me nsi tswe bag à bin tà kum ngelaṅ ndùke? Me nsi fènte zin tà kum ngelaṅ ndùke? Bin lo' i nse' yi mbwe àm.

²⁰Bo lo' i nèn mfà Yésu. Ngelaṅ ywètkebwô yen i là, be ndùse a nyi'te mén nà, a vù num tsha'a, mbwoṅte wul i nsi, nendù nke ntume.

²¹Yésu bètte tàab ndù: A tswe njoṅ ndùke mba yen ngokèt li tshùb i à? A bùnte yi ndù: Fe ngelaṅ a be mônke' là.

²²A num nke ma' i ngelaṅ yàm ntùm mbwôge, mba ntùm ntse, ndùlala ndù a bi. Là, a be z'o ku'ni neghù ju là, o ko ndèn mage, njwimte yage.

²³Là Yésu tshob yi ndù: Me se' a be z'o ku'ni là, njoṅ nu fa num mfùag mèn z'a bam nà.

²⁴Be ndùse tà mén nà kua' neta, ntshob ndù: Me bam, ywimte ntù àm z'a ke' be bam nà.

²⁵Yésu be yen mba bwoṅ benntùn tshwèt nkù nde nse' là, ntshobte ywètkebwô, ntshob ndù: Ywèt ketshob mba keju', me tshob wù ndù: Tum num i, kà bèn nebèn njam num i.

²⁶A kua' neta, nyi't'é, ntum num i. Mén nà tù' mb'a kwù là, kà tsemo' benntùn yàm nke ntshob ndù: A kwù.

²⁷Là Yésu tshùb bu i, mbù' i, a lo tù.

²⁸Ngelaṅ Yésu tsho mo' ndà là, ghazi'te nu i bètt'é tù' bo ndù: Numke bag num mbe ke ku'ni yag neta' i à?

²⁹A tshob bo ndù: Yen lèn ywètkebwô li ke' ku' netum num mo' mat ghua k'a ke nda' le'te Nsi.

³⁰Bo be tum yen dù' là, nja' Galiléa. A ke kô ndù sàm mèn lène.

³¹Nummbe a lo ke ntswite ghazi'te nu i, mbèn ntshob bo ndù: Bo fà Mén mèn mum mbu benntùn, bo nsi zwi i; ngelaṅ bo nsi zwi i là, a be tshùa lé'njù tat, a lo num vù.

³²Là bo ke ju' men ntshob là, mbwôg nebètt'é.

³³Bo kum Kapernaum. A bètte yub ngelaṅ a be ntùm ndà là ndù: A nu ke ze bin ke nkwate num manze à?

³⁴Bo mi ntswe, nummbe bo lo soṅte num manze num nelèn mèn z'a kwé mbwe netèt bo là.

³⁵A tswe nsi, ntsiaṅ tse ntshob bàa gham, ntshob bo ndù: A be ze mèn kô nebe nkwé mbwe là, a bwô ndù a tù' ntshèt njoṅ benntùn fa, mbèn mbe ngafa' njoṅ benntùn fa.

³⁶A lo' metsit ménfi, nte i netèt bo, ntat'é mum mbu mi, ntshob ndù:

³⁷Mèn z'a nsi lo' mo' metsit mén netèt tshen ni num lén sàm nà, mba ng'é lo' à me; mèn z'a lo' àm nà, mb'a ke lo' à me, là mb'a lo' à mèn z'a tum àm nà.

³⁸Yohané tshob yi ndù: Ngatswite, bag lo yen mo' mèn z'a num nta' ywètkebwô num lén so, ke tam njam bag là, bag to' i, nummbe a lo ke tam njam bag.

³⁹Là Yésu tshob ndù: Kà bin to' i. Sàm mèn ke bwe z'a be a lo' lén sàm, ngù nsà yi, mbèn ntshob kebwô num àm nà.

⁴⁰Mèn z'a ke' be le' be ntsho là, b'a ze be mèn.

⁴¹Mén z'a nsi fà ntu' ntse bin num lén sàm, mba ndù bin b'a njam Kristô là, me tshob bin kua' nenùn ndù yen mèn nà ke nsi bi ze nda'.

⁴²Mèn z'a nsi ghù mo' metsit mèn netèt tshen ni tse bo num mbam àm nà vù ntùm ywi' là, mb'a bwô ndù bo kut loṅ bàn tô i, ma' i ntùm dibantse.

⁴³A be ze bu o ghù ndù o vù ntùm ywi' là, o keb i: A bwô wù netsho ntùm yôg bu ntshù' ntshùa mb'a be o ghù mbu mbàa nse' ntsho ntùm mbwôge, ntùm mbwôg z'a be nkù ke mi là. [

⁴⁴Dù' ze mbé' z'a num ntshôg mèn ke' be kwù, mbwôg bèn nke nkù bwe à ke mi là.]

⁴⁵A be be ze ku o ghù ndù o vù ntùm ywi' là, o keb i: A bwô wù netsho ntùm yôg ku ntshù' ntshùa mb'a be o ghù nku mbàa, bo ma' o ntùm mbwôge là. [

⁴⁶Dù' ze mbé' z'a num ntshôg mèn ke' be kwù, mbwôg bèn nke kù bwe à ke mi là.]

⁴⁷A be ze lag ghù ndù o vù ntùm ywi' là, o tsho' i ngua'a: A bwô wù netsho ntùm nufen Nsi lag ntshù' ntshùa mb'a be o ghù miag mbàa, bo ma' o ntùm mbwôge là,

⁴⁸dù' ze mbé' tshob ke' be kwù, mbwôg ke bèn mbi là.

⁴⁹Nummbe bo nsi lo' mbwôg mba ngwa là, zwi'te mba zit mèn no yi.

⁵⁰Ngwa b'a mbwô ju, a be ze ngwa ke' bèn nedùm nà, mba bin a' fà ke yi k'a ndùm à?

⁵¹Bin ghù ngwa num bin, mbèn ntswe fite bin bin.