Read Medumba Lukas 10 Bible Online

Lukas 10 - Medumba bible

Lukas 10

¹Yen nu là lo be tshùa, Tshùaben bèn ntsho' tsemo' ghazi'te nu i ntu ṅam sammbàa, ntum yub bàa bàa mbwe i, ntùm njoṅ ngô fa, bo dù' ze tu wul i nsi nèn bwe là;

²ntshob bo ndù: Tshu netsho' yàm, là ghafa' b'a metsili; bin le'te tàfa' ndù a tum tsemo' ghafa' ntùm dù' fa' se.

³Bin nène, tshù, me tum zin à mba bon njùmbwe netèt ba nzwimàntô là.

⁴Kà bin lo' mfi', ke lo' bàm, ke lo' nketo'o, ke nebèn ntsha'te mèn manze.

⁵Mba ntùm zit ndà lo ze bin tsho bwe là, bin bwôgmbwe ntshob ndù: Fite num yen ndà li.

⁶A be ze mèn fite be ntùm yen ndà là là, mba fite a' ghô num i; a be z'a ke' be là, mba fite zin a' bèn mbèn bin.

⁷Bin tswe ntùm yen ndà là, njù mbèn nu ju bo ghù là; nummbe ngafa' ku'ni nekwé ntsho'fa' mi, kà bin ke nzi ndà ndà.

⁸Mba zit ngô lo ze bin tsho bwe, bo lo' zin nà, bin jù ju ze bo fà bin nà,

⁹bin yate ghangokèt tse bo nsi be bwe là, ntshob bo ndù nufen Nsi à ghebte mbaṅ bin.

¹⁰Mba zit ngô lo bin nsi tsho bwe bo ke lo' zin nà, bin tum nèn dù' ntse'te be là, ntshob ndù:

¹¹Bag bé'te mba mbab mi a ṅab num nku mag ntùm ngô zin nà, mfaṅ bin. Bin yôg nendèn ndù nufen Nsi à ghebte.

¹²Me tshob bin ndù num sen lé'njù là, nu ngô Sodom nsi bwô tshùa ze yen ngô là.

¹³Nge' num wù me Korazin, nge' num wù me Bètsaida; nummbe nsà tse bo ghù netèt bin nà na' mb'a netèt Tiro mba Sidon, mba bo lo à kaṅ ntù tshobe, ntôg bàm, mbèn nse' bwembwôge.

¹⁴Mba nu Tiro mba Sidon nsi bwô ntshùa zin ngelaṅ netsho'te ntsha.

¹⁵Wù Kapernaum, o nsi ko' kà nèn nkum kamànyam ké? Bo nsi lo' o swe' yi tà nèn nkum ntùm ngô fe ben.

¹⁶Mèn z'a ju' zin nà, mb'a ju' àm, mèn z'a ghua' zin nà, mb'a ghua' àm; mèn z'a ghua' àm nà, mb'a ghua' mèn z'a tum àm nà.

¹⁷Ben ṅam sammbàa bèn njam ntùm tsiaṅte, ntshob ndù: Tshùaben, mba ba ywètkebwô fà wut nsi mbwe bag num lén su.

¹⁸Yésu tshob bo ndù: Me lo nke njen mba Satan swe' mfe kamànyam mba beba'mbaṅ, ngwù nsi là.

¹⁹Bin ju'u, me lo fà ngù' nenyiaṅ nyu nku, nenyiaṅ nenya'tshum mba netshùa neta ghakeban bin, ndù kà sàm ju ghùtni zine.

²⁰Là mba ndùlala, kà bin tsiaṅt'a mba ba ywètkebwô fà wut nsi mbwe bin nà, là, a bwô bin tsiaṅt'a num mba bo kite ndèn min mfe kamànyam nà.

²¹Be num yen ngelaṅ nà, Ywèt Nelàn ghù Yésu dun tsiaṅte, ntshob ndù: Me nyàmt'o me Tà, Tshùaben kamànyam mba nsitsha', wù z'o lem tshen nu li num miag ghazenu boa ben neta, nda't'a be nda' bônke' là. A b'a ndùlala me Tà, nummbe o yen ntùm yu nekô ndù à bwô ndùlala.

²²Tàa lo fà njoṅ tshu fa me; sàm mèn ke' lèn mèn ze Mén be yi là, mb'a nda' Tà; sàm mèn ke bèn ndèn mèn ze Tà be yi là, mb'a nda' Mén, mba mèn ze Mén kô nela't'é yi là.

²³Yésu kaṅ wul i mbaṅ ghazi'te nu i ntshob bo tù' bo ndù: Ghafen b'a miag mi bo tshwèt njen ju ze bin yen nà.

²⁴Nummbe me tshob bin ndù: Ghantum Nsi tse yàm mba fenfen yàm lo ke nkô neyen ju ze bin tshwèt njen nà, ke yen, neju' ju ze bin tshwèt nju' là ke ju'.

²⁵Tshù, mo' ngalèn ntshù' Nsi se' num nelaṅte Yésu ntshob ndù: Ngatswite, m'a' ghù à ke, kà ngù yàm bag i ntùm yôg matmat là?

²⁶Yésu bètt'é ndù: Ke ze bo kite ntùm ntshù' à? Ke z'o num nsiaṅ bwe à?

²⁷A bùnte ntshob ndù: Ke nkô Tàan Nsi o, njoṅ ntù o fa, njoṅ zwiag so fa, njoṅ nkwatenu mu fa, mba njoṅ yu neta fa, mbèn nkô mèn z'a ghebte mbaṅ o là, mba tu wul o là.

²⁸Yésu tshob yi ndù: O bùnte mebwô, ke ngù ndùlala o nsi yôge.

²⁹A diag nebe mèn netsine, ntshob Yésu ndù: Mèn z'a ghebte mbaṅ àm nà b'a we?

³⁰Yésu bèn ntshob ndù: Mo' mènntùn lo lo Yérusalém nke nswe' nèn mà Yériko, ngwù ntùm mbu ba fimntshu; bo kwé tshu tse fa, mbèn nke'te mfaṅ num i, a tù' nekwù, bo faṅ i nène.

³¹Mo' ngale'te Nsi swe' num manze là, njen i, mbémte ntshùa nze ghua, nèn tse.

³²Mo' mén Lévi kum num yen dù' là, njen i, ngù be ndaṅndaṅ, mbémte ntshùa nze ghua nèn tse.

³³Là mo' mén Samaria z'a ke nèn katte là, kum mbaṅ i, mbe yen i, ndèn mi ko i.

³⁴A kù'te nse' mbaṅ i, naṅ ndu' mba mfèt num nkeko' mi, nkule, njab i num nyàm i, ndo' i nèn yi tusô ba ghùn ntshwint'é.

³⁵Njù be làne, a sô denario bàa, mfà ngalôte tusô, ntshob yi ndù: Tù' nke ntshwint'é; ju z'o nsi tù' bagte num i tshùa yen ni là, me nsi ba' wù ngelaṅ me bèn njam nà.

³⁶A zit mèn netèt tshen ben tat li z'o kwate ndù a b'a mfèt mèn z'a vù ntùm mbu ba fimntshu l'à?

³⁷A bùnte ndù: A b'a mèn z'a nko ndèn mi là. Yésu tshob yi ndù: Nène, tsho nke ngù yu be ndaṅndaṅ.

³⁸Ngelaṅ ze bo be num manze là, Yésu tsho ntùm mo' ngô; mo' mènnzwi lén se Marta lo' i ntùm ndà i.

³⁹A lo ghù mfèl i ze mènnzwi lén se Maria, z'a tswe ze mbaṅ nku Tshùaben, nke nju' ntshob mi là.

⁴⁰Là Marta lo ke mfa' ndà yàme, num jujù. A se' ntshob ndù: Tshùaben, a ke' bag o mba mfèl àm faṅ njoṅ fa' fa me tù' me là ké? Tshob yi a se' njwimt'àm.

⁴¹Tshùaben bùnte ntshob yi ndù: Marta, Marta, o tshwèt ngùtni wul o, mbèn nke ndab wul o num tshu yàme.

⁴²Là tshu yàm ke' ywimte, ta' ju ntshù' ku'u. A b'a Maria bèn ntsho' bag i ze mebwô ze be bo ke bèn nkwé yi là.