Read Medumba Lukas 11 Bible Online

Lukas 11 - Medumba bible

Lukas 11

¹A lo be num mo' lé'njù, Yésu be mo' dù' nke nde'te Nsi. Ngelaṅ z'a miagte nele'te Nsi là, mo' ngazi'te nu i tshob yi ndù: Tshùaben, tswite yag nele'te Nsi mba Yohané na' ntswite ghazi'te nu i yi là.

²A tshob bo ndù: Ngelaṅ bin le'te Nsi là, bin tshob ndù: Tà, ghù lén so be nelàne, ghù nufen so se'e;

³fà yag jujù z'a ku' num bag njoṅ lé'njù fa là.

⁴Lagte nukebwô tshag bag, nummbe mba bag yag num ndagte njoṅ benntùn fa tse bo ghù njo bag à bo là. Kà tshag yag ntùm laṅte.

⁵A bèn ntshob bo ndù: Be tshob ndù mo' mèn netèt bin ghù nshun i, nèn la' i tshaṅ tèttswe' ntshob yi ndù: Nshun àm, tshwé' màm ntu' bàn ntat;

⁶nummbe mo' nshun àm z'a nèn katte là se' nkum ndà àm, me ke ghù ju ze me fà yi là;

⁷yen mèn ni tswe ntùm ndà, mbùnte ntshob ndù: Kà neghùtni àm, m'a fùn nzendà àm, bag à bon tshàm tù' b'a kunndà, be me ke bèn ndo tshàm nsi mfà bàn wù.

⁸A be z'a be ndùlala là, mba me tshob bin ndù: A be z'a ke' lo nsi mfà yi num mb'a be nshun i là, mb'a' lo nsi mfà ju z'a tshwèt nkwé là yi ndù k'a bèn neghùtni i.

⁹Mba me là, me tshob bin ndù: Bin lone, bo a' fà bin; bin diage, bin a' fon; bin ke'te, bo a' tsho' bin.

¹⁰Nummbe mèn z'a lon nà, mb'a' kwé; mèn z'a diag là, mb'a' fon; mèn z'a ke'te là, bo a' tsho' yi.

¹¹Zit tà netèt bin z'a ku'ni nefà loṅ mén i ngelaṅ z'a lon i bàn n'à? A be z'a bètt'é ngontse là, mb'a' fà nyu yi, ndo' mbate ngontse yi à?

¹²A be z'a lon bumngab là, mb'a' fà nenya'tshum yi à?

¹³A be ze ben kebwô mba bin num ndèn nefà tshu mebwô bon tsin nà, mba Tà zin mfe kamànyam nsi fà ze Ywèt Nelàn ben tse bo lon yi là ntshùa ndùlala!

¹⁴A lo be num mo' lé'njù, Yésu nke nta' ywètkebwô, a na' mb'a ywèt ketshob. Ywètkebwô tum, ketshob là to' netshobe; bwoṅ benntùn nke nyàmte yen nu là.

¹⁵Là tsemo' tshob ndù: A ke ndo' à Bèèzèbul, mfen ba ywètkebwô, nta' ba ywètkebwô yi.

¹⁶Tsemo' be diag nelaṅt'é, mbètt'é ndù a ghù nsà z'a fe kamànyam nà.

¹⁷Là, a lèn nkwatenu mube, ntshob bo ndù: Mba zit nufen no z'a num ngabte wul i là, ke nèn à nebi, mba' mi nke ngwùte, mo' kôg ngwù num mo'o.

¹⁸A be ze Satan ghabte wul i là, mba nufen se nsi tswe à ndùke? Mba bin tshwèt ntshob ndù me ke ndo' à Bèèzèbul, nta' ywètkebwô yi l'à?

¹⁹A be ze me num ndo' Bèèzèbul, nta' ywètkebwô yi là, mba bon tsin ke ndo' à we nta' yub yi à? A ndùlala bo nsi se' be tsin ghatsho'te ntsha.

²⁰Là, a be ze me num ndo' à ntubu Nsi, nke nta' ywètkebwô yi là, mb'a b'a ndù nufen Nsi se' tà nkum mbaṅ bin.

²¹Ngelaṅ ze mèn neta tshùb tshuntshùag, mbéb ndà i là, mba tshu tse a' tswe ntùm fite.

²²Là, ngelaṅ ze mo' mèn neta bèn ntum nta ntshùa mbwe i, nyu' i, nkwé tshuntshùag tse tse nkwatenu mi lo njab bwe là, mb'a' ghabte tshu ts'a lo' bwe là.

²³Mèn ze bag yi ke' bèn mbe là, mb'a b'a ngakeban àm; mèn ze bag yi ke' bèn ntse'te tshu là, mb'a ke nesate.

²⁴Ngelaṅ ze ywètkebwô tum ntù mèn nà, a nke nkatte ntùm dù' njum, nke ndiag dù' nefite ke fon, ntshob ndù: M'a' bèn njam ntùm ndà àm dù' ze me tum bwe là.

²⁵A be bèn njam, ntèt ndà ndù bo bé'te, mbèn nabt'é kua' mebwô.

²⁶Ndùlala, a bèn njam, nèn ndo' tsemo' sammbàa tse bo bag ntshùa ze tu wut là, bo à bo se' nke ntswe bwe, yôg yen mèn ni bèn mbag ntshùa mb'a na' mbe mbwe là.

²⁷Ngelaṅ a ke ntshob tshen nu li là, mo' mènnzwi tshob kua' mà neta netèt bwoṅ benntùn ndù: Ngafen b'a bam sen nà s'a na' nkel o mba mbùn men nà mi a nyô o là.

²⁸Là Yésu tshob ndù: Là ghafen bèn mbe ben tse bo num nju' ntshob Nsi, mbèn nke nze là.

²⁹Mba bwoṅ benntùn ke ntse'te là, a to' netshob ndù: Yen zwiaṅ benntùn ni b'a zwiaṅ ben kebwô, a tshwèt mbètte nsà; bo ke nsi bèn fà mo' nsà yi, k'a ke nda' nsà Yona.

³⁰Nummbe mba Yona na' mbe lèn ba Ninive là, Mén mèn nsi bèn be mo' lèn yen zwiaṅ benntùn ni.

³¹Mfen ze mènnzwi z'a fe mà ntèn nà nsi ghù lo tù ntùm ndàntsha boa benntùn num yen zwiaṅ benntùn ni, ghù bo vù ntsha, nummbe bo lo fe mo' bag njù, nse' neju' zenu Salomon. Tshù, mo' mèn nsen ni ndù a tshùa Salomon.

³²Ba Ninive nsi ghù tsin tù ntùm ndàntsha boa yen zwiaṅ benntùn ni, ghù a vù ntsha, nummbe ba Ninive lo kaṅ ntù tshob num ntshob Nsi mi Yona tshob bo là. Tshù, mo' mèn nsen ni ndù a tshùa Yona.

³³Sàm mèn ke' be te mbwôg num lambo, ndeme, ke nete num kàb lo, là, a ke nte i à num téblé ndù ben tse bo tsho ndà là yen nelàn i.

³⁴Lambo wut mèn b'a lag. A be ze lag so be mebwô là, mba wul o b'a ntùm nelàne, là, a be z'a ke' be mebwô là, mba njoṅ wul o fa b'a ntùm njame.

³⁵Ndùlala, bamnà ndù kà nelàn z'a be num o là, kaṅ ntù' njame.

³⁶A be ze njoṅ wul o fa b'a ntùm nelàne, ke bèn ngù mo' bag i ntùm njam nà, mb'a nsi be njoṅ i fa ntùm nelàne, mba bo num nte lambo, nkô mi ké' num o là.

³⁷Ngelaṅ Yésu ke ntshob là, mo' mén Férésia tsiaṅ i ndù bo yi jù jujù ndà i, Yésu tsho ndà, ntswe téblé.

³⁸Ze Férésia be yen mba Yésu jù jujù ke sôg mbu mi, mb'a be ntùm ntshù' ba mbwe là, ntshàm neshu.

³⁹Là Tshùaben tshob yi ndù: Bin ba Férésia, bin num nsôg njam mvèn ntu' mba nka, là ntù tsin be ndù a dun tshu tshô mba nukebwô.

⁴⁰Kagni, mèn z'a nabte njam njù ke bèn nabte mba ntùm bwe ké?

⁴¹Bin bwôgmbwe mfà tshu ts'a be ntùm bwe là num ywimte, mba bin nsi tù' kua' ben nelàne.

⁴²Là nge' num bin ba Férésia, nummbe bin be ndo' netshime, ntàmndoṅe, ywitngon, ngabt'é nze gham, mfà ta' bag i ghale'te Nsi, là njôg ngwag nunetsine, mba nkôni Nsi. A lo bwô neke nze yen ni, ke bèn nengwag yen nà.

⁴³Nge' num bin ba Férésia, nummbe bin be nkô netswe ndiaṅ ntùm ba sinagogue, mbèn nkô ndù benntùn ke ntsha'te zin num manze.

⁴⁴Nge' num bin, nummbe bin be à mba ntufi mi mo' ju ke tshwèt nda't'é, benntùn nke nzin num bwe ke lèn nà.

⁴⁵Mo' ngalèn ntshù' Nsi bùnte ntshob ndù: Ngatswite, o tshwèt ntshob ndùlala, nke ntshabt'a mba bag yag.

⁴⁶Yésu bùnte ndù: Nge' num mba bin ghalèn ntshù' Nsi, nummbe bin num njab tshu nelèt ts'a ta neket là tu benntùn, ke kwag mba nda' ntubu zin num tshen tshu là.

⁴⁷Nge' num bin nummbe bin num nke nkut ntufi ghatshob ntshob Nsi, ndù ba tà tsin na' mbèn nzwite yube.

⁴⁸Bin b'a ghakwénta, mbèn mbam ju ze ba tà tsin na' ngù là; bo lo zwite ghatshob ntshob Nsi, bin bèn nke nkut zin ntufi mube.

⁴⁹A b'a kua' ju z'a ghù kà zenu Nsi tshob ndù: Me nsi tum ghatshob ntshob Nsi mba ghantum bo: Bo nsi zwite tsemo' netèt bo, bèn tsho' nku tsemo' kebàn.

⁵⁰Ndùlala ndù lem njoṅ ghatshob ntshob Nsi fa tse bo fètte fe ngelaṅ nenabte njù là, bo bètte yen zwiaṅ benntùn ni yi;

⁵¹fe num lem Abél nèn nkum num tse Sakaria, ze bo na' nzwi i netèt tômbwôg nele'te Nsi mba Ndà Nsi là. Ṅ, me tshob bin ndù bo nsi bètte yen zwiaṅ benntùn ni yi.

⁵²Nge' num bin ghalèn ntshù' Nsi, nummbe bin fùn nzendà dù' nezi' zenu ke tsho bwe zin tu, mbèn nke ntshèt mba ben tse bo tshwèt ndiag netsho bwe là.

⁵³Ngelaṅ Yésu tum yen dù' là là, ghalèn ṅwa'ni Nsi mba ba Férésia to' neghùtni i, mbètt'é nu yàme, num bon nzenze nu yàme;

⁵⁴nke ndù' nkùnkù, ndiag neghom i ntùm ntshob mi a tum ntshu i là.