Read Medumba Lukas 12 Bible Online

Lukas 12 - Medumba bible

Lukas 12

¹A be num yen ngelaṅ nà, bwoṅ benntùn bèn ntse'te yàme, kà tsemo' nke nyiaṅte tsemo'o, Yésu to' netshob ghazi'te nu i ndù: Bin bam nà num ntsha' ba Férésia z'a b'a mfùm nà.

²Mo' ju nelem ke' be z'a ke nsi tum njù mbwôgtshù là; mo' ju ke' bèn mbe ntùm tsham ze bo ke nsi lèn nà;

³mba ju ze bin nsi tshob ntùm dù' njam nà nsi tum ntùm dù' tàyage; ju ze bin tagte toṅ mèn ntùm ndà là, bo nsi tsin num tuba' kà tshobe.

⁴Là me tshob bin tse bin b'a shun tshàm nà ndù: Kà bin bwôg ben tse bo num nzwi mbàb wut, là ke bèn nku' neghù mo' ju ntshùa yen nà là.

⁵M'a' tswite mèn z'a bwô ndù bin bwôg i là bin: Bin bwôg mèn z'a num nzwi yôg mèn, mbèn ngù ngù' nema' i ntùm dù' mbwôg là. Ṅ, me tshob bin ndù bin bwôg i, bin bwôg yen mèn nà.

⁶Bo ke' be swèn ntôgzin ntàn nkeba mbàa ké? Là bin lèn ndù Nsi ke' be lagte sàm ta' i mba ntshù'.

⁷Mbèn mbe, bo siaṅ njoṅ ntàn nyiaṅtu tsin fa, kà bin bwôg sàm ju, bin tanjoṅ ntshùa ntôgzin yàme.

⁸Là me tshob bin ndù njoṅ benntùn fa tse bo nsi bam àm mbwe benntùn nà, mba Mén mèn nsi bam yub ze mbwe ba Angél Nsi.

⁹Mèn z'a gha àm mbwe benntùn nà, me nsi gha i mbwe ba Angél Nsi.

¹⁰Mèn z'a nsi tshob ntshob kebwô num Mén mèn nà, bo nsi lagte yi; là bo ke nsi lagte tshabte Ywèt Nelàne.

¹¹Ngelaṅ bo nsi lo' zin nèn yi ntùm ba sinagogue, mbwe ghatsho'te ntsha, ke mbwe ghatô ngô lo là, kà bin lab wut tsin mfà num nu ze bin tshob kà kwé wut tsin yi, mba mat ze bin tshob yi là.

¹²Nummbe Ywèt Nelàn nsi tshob ju ze bin tshob là bin be num ngelaṅ mbile.

¹³Mo' mèn netèt bwoṅ benntùn tshob Yésu ndù: Ngatswite, tshob mfèl àm ndù bag yi ghabte ntsi' tà yag.

¹⁴A bùnte yi ndù: We z'a yab àm netèt bin mba ngatsho'te ntsha, mbèn mbe ngaghabte tshu à?

¹⁵A bèn ntshob bo ndù: Bin bamnà, nzete num ze'te, nummbe yôg mènntùn ke' yé't'a num tshu tse, a be z'a ghù a yàm mba neyàm nà.

¹⁶A tshob mo' tànkùt bo ntshob ndù: Nà mo' ngankàb lo fà tshu yàme.

¹⁷A kwate tu i, ntshob ndù: M'a' ghù à ndùke? Nummbe me ke' ghù dù' neyab tshu tshàm bwe.

¹⁸A tshob ndù: Tshù ju me nsi ghù li: M'a' kam njoṅ tshàm nta fa, nkaṅ nkut tse ndùbndùb yi, ntse'te njoṅ nsa màm mba njoṅ tshu tshàm fa ntùm bwe;

¹⁹ntshob ntù àm ndù: Ntù àm! O ghù tshu ts'o lé' num ngu'njù yàm nà yàme, fite wul o, njù, nu, mbèn ntsiaṅte tsho.

²⁰Là Nsi tshob yi ndù: Nkagni, be num yen tèttswe' li, bo nsi bètt'o ntù o; we z'a nsi ghù tshu ts'o nabte l'à?

²¹A nsi se' b'a be ndaṅndaṅ num mèn z'a be ntse'te nkàb num tu wul i, ke be ngankàb num miag Nsi là.

²²A bèn ntshob ghazi'te nu i ndù: A b'a ju z'a ghù kà me tshob bin ndù: Kà bin lab wut tsin num yôg sine, num ju ze bin jù là, num ju ze bin ma' num bin nà.

²³Yôg tanjoṅ ntshùa jujù, wut bèn ntanjoṅ ntshùa nzwe.

²⁴Bin lôte màla njene, bo ke' be ywit ke bèn ntsho'o, ke ghù nta mba kandà; mba ndùlala Nsi num nkém yube. Bin ke' tanjoṅ ntshùa bon nsaṅ ké?

²⁵We z'a netèt bin ndù a ku'ni nekwi'te mo' mfi' num ntsewul i njam nelab wul à?

²⁶A be ze bin ke' ku'ni num bontsit tshu là, numke bin nke ndab wut tsin num tsemo' à?

²⁷Bin lôte nsàm nenà njene; bo ke' be se' ndeb, ke bèn mba' nzwe, mba ndùlala, me tshob bin ndù mba Salomon ntùm nkuni mi fa, lo ke ket nzwe mba ta' i netèt bo là.

²⁸A be ze Nsi num ma' nzwe num yen nenà li, z'a be sènni, bo ma' i mbwôg ndamnjù là mb'a ke' ku'ni nema' nzwe mba num bin zin ké, ghabamntù metsili?

²⁹Kà bin ke ndiag ju ze bin nsi jù là, mba ju ze bin nsi nu là; kà bin ghùtni wut tsin num tshen tshu là.

³⁰Njoṅ tshen tshu là fa, a b'a ghakelèn Nsi tse ntùm yen njù li bèn nke ndiag ndùlala. Tà zin lèn ndù bin bwoṅ tshen tshu là.

³¹Bin bwôgmbwe ndiag nda' nufen se, njoṅ tshen tshu là fa nsi se' bin njam bwe.

³²Kà bwôg me metsit bwoṅ njùmbwe, nummbe Tà lo yen ndù a bwô nefà nufen se bin.

³³Bin swèn njoṅ tshu tsin fa, njwimte bwoṅbwoṅ yi. Bin ghù mbàm mi a ke' be ywèn nà, ngù nkàb tanjoṅ z'a ke' be mi là mfe kamànyam, dù' ze tshô ke' ku'ni neyi, dù' ze mbé' ke' ku' nebagte là.

³⁴Nummbe dù' ze nkàb zin be là, mba ntù tsin bèn mb'a bwe.

³⁵Bin taṅ kob tun bin, mbèn nte mbwôg num ndambo mine.

³⁶Bin be ndaṅndaṅ mba ben tshen nà tse bo tshwèt nke mbéb tà yub z'a fe nandà yoṅ tsho' nzendà yi, ngelaṅ z'a nsi se' ke'te là.

³⁷Ghafen b'a ghafa' tse tà yub nsi se' tèt yub ndù bo tswe ke ke nzi là, kua' nenùne, me tshob bin ndù a nsi taṅ kob se, ghù bo tswe téblé, a se' mfa' bo.

³⁸Ghafen b'a ghafa' tshen nà tse be tà yub bèn mbe bèn njam num mbatte bàa ke mbatte tat lo, ntèt yub bo nke nzi tshùalo là.

³⁹Bin lèn yen nu li ndù: A be ze tàndà lèn nyam ze ntshô nsi se' là, mb'a nsi zi tshùalo ke faṅ ndù bo to ndà i.

⁴⁰Mba bin zin, bin be tswe, nke mbébe, nummbe Mén mèn nsi se' à num nyam ze bin ke' kwate ndù a' se' là.

⁴¹Pétro bètte, ntshob ndù: Tshùaben, o tshob yen tànkùt li à bag k'o tshob à mba tsemo' benntùn yub à?

⁴²Yésu tshob ndù: A zit ngalé' tshu ze nenùn mbèn mbe ngazete ze be tàfa' faṅ ben tse yi ndù a ke mfà bàn bo kua' njoṅ ze bo kô là ngelaṅ i à?

⁴³Ngafen b'a yen ngafa' là ze tàfa' nsi be bèn njam tèl i, a ke ngù ndùlala là.

⁴⁴Kua' nenùne, me tshob bin ndù mb'a nsi faṅ njoṅ tshu tse fa yi, a ke ndé'é.

⁴⁵Là, a be ze yen ngafa' li tshob ntù i ndù: Tàa nsi be se' sène, nto' nelab tsemo' ghafa' tse bandum mba tse bènnzwi, njù, nu, mbèn mbume,

⁴⁶tàfa' se' mum lé'njù s'a lo mbe ke ke mbéb là, mba num nyam z'a ke' lèn nà, mfagt'é, njab ze bag i boa tse bo ke' be ben nenùn nà.

⁴⁷Yen ngafa' z'a lèn ju ze tàfa' kô, mbe tswe ke ke mbébe, ke bèn ngù ju z'a kô là, bo nsi tsham i nto' yàme.

⁴⁸Là mèn z'a ke' lèn yen nekô là, nzin mat mb'a lo mbwô ndù bo tsham i nto' yàm nà, bo nsi tsham i à nda' metsili. Mèn ze bo fà yi yàm nà, bo nsi kwé yi yàme; mèn ze bo lé' yi yàm nà, bo nsi bèn bètt'é yi yàme.

⁴⁹Me se' nema' à mbwôg ntùm njù, me tshwèt nekô ndù a kù ndende.

⁵⁰Mo' ntse bwe mi bo nsi nyu' àm bwe là, là me tswe à ntùm nge' tà nkum ngelaṅ z'a nsi bumte là.

⁵¹Bin kwate ndù me lo' à fite nse' yi num tsha' ké? Me tshob bin ndù nga, là nda' fagte.

⁵²Lo sènni, a be ze benntùn tàn be ntùm ta' ndà là, mba bo nsi fagte, tse tat bàn tse bàa, tse bàa bèn mbàn tse tat.

⁵³Tà nsi ke mbàn mén, mén bèn nke mbàn tà; mà bàn ngon i, ngon bèn mbàn mà; màndu bàn nzwimén i, nzwimén bàn màndu i.

⁵⁴Yésu bèn nke ntshob mba bwoṅ benntùn ndù: A num mbe ngelaṅ bin yen ndot lo bag mbinyam nà, bin yoṅ ntshob ndù: Mbaṅ nsi lo. A yoṅ mbumte.

⁵⁵Bin num ntshob ngelaṅ ze fetmbaṅ fe mà ntèn kà ntshu' là ndù: Nyam nsi tà kua' neta, a yoṅ mbe be ndaṅndaṅ.

⁵⁶Ghamfùm, bin lèn mba ntshù' nsitsha' mba kamànyam be là; ke z'a ghù bin ke lèn yen ngelaṅ ni à?

⁵⁷Numke bin ke be lôte zin tu, njen ju z'a be netsin n'à?

⁵⁸Ngelaṅ z'o tshwèt nke nèn mbwe ngatsho'te ntsha bin ngakeban o là, kagtùn ndù bin yi miagte ntsha num manze, mbwôg ndù k'a soṅ o nèn yi mbwe ngatsho'te ntsha, ngatsho'te ntsha fà o ngabéb ndàtsha, ndù kà ngabéb ndàtsha ma' o ndàtsha.

⁵⁹Me tshob wù ndù o ke nsi tum bwe, ke be ndù o fà nkàb tà nèn nkum num miagte keba.