Read Medumba Lukas 13 Bible Online

Lukas 13 - Medumba bible

Lukas 13

¹Tsemo' benntùn se' be num yen ngelaṅ nà, nsoṅ Yésu nu num tshen ba Galiléa là tse Pilato zwite yube, ntamte lem tshob num tshob tshu nele'te Nsi là.

²Yésu bùnte ntshob bo ndù: Bin kwate ndù tshen ba Galiléa là, mba bo na' njen nge' ndùlala là, ba ben kebwô ntshùa tsemo' ba Galiléa ké?

³Me tshob bin ndù nga; là, a be ze bin ke' kaṅ ntù tsin nà, mba mba bin nsi bi be ndaṅndaṅ.

⁴Bin bèn nkwate mba ndù ben ntshob fom gham tse tuba' Siloé na' ngwù nzwite yub là na' mb'a ghantsha ntshùa ba Yérusalém bo tù' là ké?

⁵Me tshob bin ndù nga; là, a be ze bin ke' kaṅ ntù tsin nà, mba mba bin nsi bi be ndaṅndaṅ.

⁶A tshob yen tànkùt li ndù: Mo' mèn lo ghù tù mbatsi ntùm nà i, nèn nediag ntàm mi ke fon sàm ju.

⁷A tshob ngafa' ndù: Tshù, a ndonni ngu' tat mba me be nse' ndiag ntàm tù li ke fon nà; keb i, numke a nke ntshètte dù' banban à?

⁸Ngafa' bùnte ntshob yi ndù: Tshùaben, bèn mfaṅ i là mba num yen ngu'njù li, me nsi tswe' tun i diaṅ bume, naṅ mbètmbwe bwe.

⁹Mo' ndù a nsi be be ndù mànjam a yame; a be z'a ke' yam nà, k'o nkeb i.

¹⁰A lo be mum lé'njù Sabbat, Yésu nke ntswite ntùm mo' sinagogue.

¹¹Mo' mènnzwi lo be bwe ndù a ghù mo' ywèt ts'a na' ndo' i ngù nke'kèt yi tà fe ngu' ntshob fom gham nà. A lo ṅam i, k'a ke ku' nebù' wul i ntsin ndaṅndaṅ.

¹²Yésu lo be yen i ntsiaṅ i ntshob yi ndù: Mènnzwi, lo' o mi.

¹³A yab mbu mi num i. Be ngelaṅ mbile, a tsin ndaṅndaṅ, ngamte Nsi.

¹⁴Là ngalôte sinagogue ya ntù mba Yésu yate mèn lé'njù Sabbat là, bùnte ntshob bwoṅ benntùn ndù: Lé'njù ntôg num bwe, ts'a bwô nefa' fa' bwe là; bin ke nse' ntùm tshen lé'njù là ndù bo yate zine, ke b'a lé'njù Sabbat.

¹⁵Là Tshùaben bùnte yi ndù: Ghamfùm, mba we lo netèt bin ke' be kiag mfô i ke kekwèn i lo ntùm ndà nyàm, nèn yi a nu ntse lé'njù Sabbat ké?

¹⁶Yen mènnzwi li, mo' ngon Abraham ze Satan na' nkul i fe tà ngu' ntshob fom gham nà, a lo ke bwô ndù bo kiagt'é num yen nkù tùn nà lé'njù Sabbat ké?

¹⁷Ngelaṅ a tshob yen nu li là, tuswe ko ghakeban tse, njoṅ bwoṅ benntùn fa nke ntsiaṅte num njoṅ tshu nekuni fa tse Yésu ke ngù là.

¹⁸Yésu lo ke ntshob ndù: Nufen Nsi fut'a ke? Be me fà mfi' i à num ke?

¹⁹A fut'a lag mo' metsit tù se mo' mèn na' ndo' ma' ntùm nà i là; lag se bit, ntù' kua' ta' tù ndùb, kà nsaṅ mfe kamànyam nke mfite ntùm nkaṅ mi là.

²⁰A bèn ntshob ndù: Be me fà mfi' nufen Nsi à num ke?

²¹A fut'a ntsha' ze mo' mènnzwi na' ndo' ndem ntùm mfi' mbab bàn ntat, tà nkum ngelaṅ ze njoṅ i fa ko' là.

²²Yésu nke ntshùa ntùm ngô boa ntaṅla' nke ntswite. A nèn Yérusalém.

²³Mo' mèn tshob yi ndù: Benntùn tse bo nsi yôg là b'a metsili ké?

²⁴Là, a tshob bo ndù: Bin kagtùn num netsho à nzendà z'a fét là; nummbe me tshob bin ndù benntùn yàm nsi diag netsho bwe ke ku'ni.

²⁵Ngelaṅ ze tàndà nsi lo nsi fùn nzendà là, bin nsi se' tsin njù, bèn ke ke'te nzendà, tshob ndù: Tshùaben, Tshùaben, tsho' nzendà bag. A nsi bùnte tshob bin ndù: Me ke' lèn dù' bin fe là.

²⁶Bin nsi to' neke ntshob ndù: Bag lo jù, mbèn nu mbwe o, o bèn ntswite ntshob Nsi num tshag manze.

²⁷A nsi bèn tshob bin ndù: Me ke' lèn dù' bin fe là! Bin nèn tà ngùanesà mbaṅ àm, njoṅ zin fa ghaghù nukebwô.

²⁸Nekua' mba nefèt nsô nsi be yen ngelaṅ nà ze bin yen Abraham, Isak, Yakob mba njoṅ ghatshob ntshob Nsi fa ntùm nufen Nsi, mbe be ndù bo ma' zin njù là.

²⁹Benntùn yàm nsi fe bag ntumnyam, bag mbinyam, swe' tu, ko' mà ntèn, se' tswe num téblé ntùm nufen Nsi.

³⁰Tshù, tsemo' ba njam nsi kwé mbwe, tsemo' ba mbwe bèn ntshèt njam.

³¹Be num yen ngelaṅ nà, tsemo' ba Férésia se', ntshob Yésu ndù: Tume, lo ntùm yen dù' li, nummbe Hèrodé tshwèt nkô nezwi o.

³²A tshob bo ndù: Bin nèn ntshob tswenyàm nà ndù: Me tshwèt nta' ywètkebwô, nke miagte neyate ghangokèt sènni mba ndamnjù, a be mbatte lé'njù tat yôg sàm mi.

³³Là, a bwô ndù sènni mba ndamnjù ke mbatte lé'njù lo, me bèn ntam manze nummbe a ke' ku'ni ndù sàm ngatshob ntshob Nsi kwù dù' ghua kà ke b'a Yérusalém.

³⁴Yérusalém, Yérusalém, wù z'o num nke nzwite ghatshob ntshob Nsi, ntamte ben tse bo tum yub wù là ndoṅ nà, a yoṅ si' mba me diag netse'te bon tsho ndaṅndaṅ mba mà ngab be ntse'te bon tse tun mbàb mi, bin ke kô à?

³⁵Tshù, zin ba' a' tù' fam. Là me tshob bin ndù: Bin ke bèn neyen àm tà nkum lé'njù sen nà se bin ghù tshob ndù: Mbotni be mèn z'a tshwèt nse' num lén Tshùaben nà.