Read Medumba Lukas 14 Bible Online

Lukas 14 - Medumba bible

Lukas 14

¹A lo be num mo' lé'njù Sabbat, Yésu tsho ndà mo' nkam ba Férésia, nejù jujù bwe, tshen ben ni te miag num mi, nke ndôt'é.

²Tshù, mo' ngangokèt lo be mbwe i.

³Yésu bùnte ntshob ghalèn ntshù' Nsi mba ba Férésia ndù: Ntshù' bam ndù bo ke njate ngangokèt lé'njù Sabbat ké, ke nga à? Bo mi ntswe.

⁴Ndùlala Yésu tshùb ngangokèt njat'é, mbèn ndé't'é,

⁵ntshob bo ndù: A b'a we netèt bin ze mén i ke na' i lo vù ntùm tàm lé'njù Sabbat mb'a ke nsi sô i à?

⁶Bo ke ku'ni nebùnte sàm nu yi.

⁷Yésu be yen ndù ben tse bo tsiaṅ yub num nejù jujù là num nke ndiag be dù' mebwô, ntshob mo' tànkùt bo ndù:

⁸Ngelaṅ ze mèn tsiaṅ o ntùm dù' tsiaṅte nandà là, kà tswe num mbwe dù', mbwôg ndù mo' ndù mo' mèn z'a tshùa o là num netèt ben tse bo tsiaṅ yub là.

⁹Ndùlala ndù kà mèn z'a tsiaṅ o bin yi là, se' ntshob wù ndù: Faṅ yu dù' yi. Tuswe nsi ko o ngelaṅ z'o nsi nèn tswe num miagte dù' là.

¹⁰Là ngelaṅ ze bo tsiaṅ o là, o nèn ntswe num miagte dù', ndù mèn z'a tsiaṅ o là se' ntshob wù ndù: Nshun àm, nèn tà mfe mbwe. Yen nà nsi b'a ghamte wù num miag njoṅ benntùn fa tse bin à bo tswe num téblé là.

¹¹Nummbe mèn z'a num ndo' wul i nèn yi tù là, bo nsi tèn i fà nsi; mèn z'a num ndo' wul i nèn yi nsi là, bo nsi bù' i fà tù.

¹²Yésu tshob mba mèn z'a tsiaṅ i là ndù: Ngelaṅ z'o tshwèt ntsiaṅ benntùn ndù bo jù jujù ndà o, ke nkebnjù, ke mbwôgtshù lo là, kà tsiaṅ shun tsho ke fèt tsho, ke tàan bo màan, ke ba ndùla' o tse bo be ghankàb là, mbwôg ndù kà bo bèn njagte ju z'o ghù là be ndaṅndaṅ.

¹³Là ngelaṅ z'o num ntsiaṅ benntùn nà, tsiaṅ à bwoṅbwoṅ, ba kam nku, ba nke'kèt boa ba mfùmiag.

¹⁴O nsi b'a mènfen, nummbe bo ke' ku'ni neyagte wù. Bo nsi yagte wù ngelaṅ ze ben netsin nsi bam num vù là.

¹⁵Mo' mèn netèt ben tse bo tsiaṅ yub là, be ju' men ntshob là, ntshob Yésu ndù: Mènfen b'a mèn z'a nsi be num téblé ntùm nufen Nsi là.

¹⁶Yésu tshob yi ndù: Mo' mèn lo nabte jujù yàme, ntsiaṅ benntùn yàme;

¹⁷ngelaṅ nejù jujù ku', a tum tshe' i ndù a nèn ntshob ben ts'a tsiaṅ yub là ndù, bin se'e, njoṅ tshu fa ku'u.

¹⁸Là tshen ben ni to' nelé'te ntshù' ntshù'. Mbwe i tshob yi ndù: Me lo jun mo' dù' nà, a bwô ndù me nèn njene, me le't'o, tsho ndé'te me.

¹⁹Mo' tshob ndù: Me lo jun nyàm bàa bàa nze tàn, me nenèn zwi'te yube; me le't'o, tsho ndé'te me.

²⁰Mo' bèn ntshob ze ndù: Me yôg nelo na ndà, ndùlala me ke' ku'ni nenène.

²¹Yen ngafa' li bèn njam, nsoṅ tàab njoṅ mbùnte ntshob fa. Tàndà ya ntù, ntshob tshe' i ndù: Nèn ndende num manze mba num mfagte manze ngô, ndo' bwoṅbwoṅ, ba kam nku, ba mfùmiag, ba nke'kèt, nse' yi nsen ni.

²²Tshe' i tshob yi ndù: M'a ghù ju z'o tshob là, nda' ndù dù' banban ke'e.

²³Tà tshob yi ndù: Nèn num manze mba ntùm mfé'kàb, nànte benntùn bo se' ntsho ndà, tà ndà àm dune.

²⁴Nummbe me tshob bin ndù: Netèt ben tse me na' ntsiaṅ yub là, mba ze ntshù' ke nsi zwi'te yàm jujù.

²⁵Mba bwoṅ benntùn yàm ke nzin num manze boa Yésu là, a kaṅ wul i njam, ntshob bo ndù:

²⁶A be ze mèn se' me ke gha tàab, màab, nzwi i, mba kua' se yôg là, mb'a ke' ku'ni nebe ngazi'te nu àm.

²⁷Mèn z'a ke' ket ze fanta'tù mbèn nzin num yàm manze là, ke' ku'ni nebe ngazi'te nu àm.

²⁸A be ze mèn netèt bin kwate nekut ba' là, mb'a ke bwôgmbwe ntswe nsi, ndôte ju z'a bagte, num neyen a be z'a ghù ju nemiagte yi là,

²⁹mbwôg ndù k'a ma' tun ba' ke ku'ni nekut ba' kà miagte, mba ndù kà ba tshùanze to' netshabt'é,

³⁰ntshob ndù: A mèn z'a to' nekut ba' ke ku'ni nemiagte là ké?

³¹Be ndaṅndaṅ a zit mfen z'a be a to' nele' ntsho bo mo' mfen ke be ndù a bwôgmbwe ntswe nsi, njen ndù a ku'ni nele' ben ntsha' ṅam mbàa boa tse ben ntsha' gham à?

³²A nenyà ke be ndùlala, mb'a nsi tum nganze yi bo fenkaṅ, ngelaṅ ze ngakeban ke' tà ngùanesà là;

³³ndùlala, mèn z'a netèt bin ndù a ke' ghua' tshu fa ts'a ghù là, ke' ku'ni nebe ngazi'te nu àm.

³⁴Ngwa b'a kua' ju mebwô neshu; là, a be ze ngwa ghua' ndùm mi là, mba bo nsi bèn ghù à ndùke k'a bèn ndùm à?

³⁵A ke' bèn mbwô tse mba num tsha'a, mba num ju netshàb nà yi; a bwô nema' i njù. Mèn z'a ghù ntoṅ mi a neju' yi là, a ju'.