Read Medumba Lukas 15 Bible Online

Lukas 15 - Medumba bible

Lukas 15

¹Njoṅ ghakwéfé' fa mba ben kebwô fa kù'te nse' mbaṅ Yésu num neju' i.

²Ba Férésia mba ghalèn ṅwa'ni Nsi nke ntshobte tun tô ntshob ndù: A num ndo' ben kebwô nke njù jujù bo à bo.

³A tshob yen tànkùt li bo ntshob ndù:

⁴A zit mèn netèt bin z'a ghù njùmbwe nkù, ta' i ze ntshù' bi, mb'a ke faṅ tse ntshob bwe'e ṅam bwe'e num kônga, nèn ndiag z'a bi là tà nkum ngelaṅ z'a fon i l'à?

⁵Ngelaṅ a fon i là, a kel i ntùm tsiaṅte, njab num nkembe' i;

⁶mbèn njam la' i, ntsiaṅ shun tse mba ba ndùla', ntshob bo ndù: Bag à bin tsiaṅte me, nummbe me bèn mfon njùmbwe àm z'a na' mbi là.

⁷Me tshob bin ndù: Be ndaṅndaṅ, tsiaṅte nsi be mfe kamànyam num ta' mèn kebwô z'a kaṅ ntù i là, ntshùa mb'a be tsiaṅte be num benntùn ntshob bwe'e ṅam bwe'e tse netsine, tse nekaṅ ntù ke' ywimte yub là.

⁸Zit mènnzwi z'a ghù nkàb gham, ta' i ze ntshù' bi, mb'a ke nànte nte mbwôg num lambo, mbé'te nsindà, ndiag kua' mebwô tà nkum ngelaṅ z'a fon i l'à?

⁹Ngelaṅ a fon i là, a tsiaṅ shun tse mba ba ndùla' ntshob ndù: Bag à bin tsiaṅte me, nummbe me bèn mfon nkàb ze me na' ngua' là.

¹⁰Be ndaṅndaṅ, me tshob bin ndù tsiaṅte nsi be netèt ba Angél Nsi num ta' mèn kebwô z'a kaṅ ntù i là.

¹¹A bèn ntshob ndù: Mo' mèn lo ghù bon tse bàa.

¹²Ntù'njam tshob yi ndù: Tà, fà yàm bag tshu ts'a nsi ghù be yàm nà. A ghabte tshu tse bo.

¹³Tsemo' bon lé'njù be tshùa, ntù'njam tse'te njoṅ tse tshu fa, ndo nèn ntùm mo' ngô ba tum tà ngùanesà, ntsho bwe, nke njôg yôg kebwô, mbagte tshu tse.

¹⁴Ngelaṅ z'a bagte njoṅ i fa là, mo' nziku' ndùb vù ntùm ngô là, a to' neke mbwoṅe.

¹⁵A nèn njèn wul i la' mo' mèn ntùm ngô. Yen mèn nà tum i mà tshwèt ndù a ke mbéb ngùnyàm tse.

¹⁶A nke ndiag nejù mba jujù ze ngùnyàm num njù là, là sàm mèn ke fà yi.

¹⁷A lo' ntù i nèn tsham yi, ntshob ndù: Ghafa' be la' tà à si' tse bo ghù jujù yàme! Là tu wul àm me tshwèt nkwù nziku' nsen ni!

¹⁸M'a' lo tù, nèn ntèt tàa, ntshob yi ndù: Tà, me lo ghù nukebwô num miag Nsi mfe kamànyam mba num miag mu.

¹⁹Me ke' ku'ni mb'a b'o bèn ntsiaṅ àm mén o là, tù' lo' àm mba mo' mèn netèt ghafa' tsho là.

²⁰A lo, nèn ntèt tàab, mb'a ke nse' tà ngùanesà là, tàab yen i, ndèn mi ko i. A kù nde, ngwù num tô i, ntat'é, nyô nge' mi.

²¹Mén tshob yi ndù: Tà, me lo ghù nukebwô num miag Nsi mfe kamànyam mba num miag mu. Me ke' ku'ni mb'a b'o bèn ntsiaṅ àm mén o là.

²²Là tàab tshob kuan tse ndù: Bin lo' kum s'a be kua' se mebwô là, nse' ma' num i ndende, bin so kwa bu i, mba nketo' nku mi;

²³bin lo' mén mfô z'a ghù nzit là nse' yi, bin zwi, be fèle, mbèn ntsiaṅte.

²⁴Nummbe yen mén ni lo kwù, a bèn njôge; a lo bi, a bèn mbèn njam. Bo to' neke ntsiaṅte.

²⁵Ntshùambwe na' mb'a mà tshwèt. A be fe, mbe kum mbaṅ la', nju' bo nke njob kwi, mbèn nke nyiaṅe.

²⁶A tsiaṅ mo' ngafa' mbètt'é ndù: A nu ke mfe la' à?

²⁷Ngafa' tshob yi ndù: Mfèl o bèn nse' kà tàan nzwi mén mfô z'a ghù nzit là, nummbe a bèn mbe yen i ndù a be ntùn.

²⁸Ntshùambwe to' neya ntù, ke kô netsho ndà. Tàab tum mbu' mbu yi.

²⁹Là, a bùnte ntshob tàab ndù: Tshù, a ndonni ngu'njù yàm mba me tshwèt nke mfa' wù, ke to' fàn ntshù' mu mba nda' yoṅ ntshù' là, o ke' to' fà mén mbwe me ndù me tsiaṅte yi bag à shun tshàm.

³⁰Là ngelaṅ ze yen mén o li z'a bagte tshu tsho boa kattù bènnzwi se' là, o zwi mén mfô z'a ghù nzit là yi.

³¹Tàab tshob yi ndù: Bag wù bèn nke mbe njoṅ ngelaṅ fa, njoṅ tshu fa tse me ghù là b'a tsho.

³²Là, a bwô neṅwate, mbèn ntsiaṅte, nummbe yen mfèl o li lo kwù, a bèn njôge, a lo bi, a bèn mbèn njam.