Read Medumba Lukas 18 Bible Online

Lukas 18 - Medumba bible

Lukas 18

¹Yésu tshob bo tànkùt, ndo' nda'te mb'a bwô ndù mèn ke nde'te Nsi ke bot njoṅ ngelaṅ fa là.

²Mo' ngatsho'te ntsha lo be ntùm mo' ngô ke be bwôg Nsi, nke ngwag njoṅ benntùn fa.

³Mo' mfôg mènnzwi bèn mbe ze ntùm yen ngô là, nke nse' ntèl i, ntshob ndù: Ghù nunetsin me, nkwé àm bu ngakeban àm.

⁴Num ngelaṅ yàme, a ke kô, là, a tshob tu wul i mo' lé'njù ndù: Me ke' be bwôg Nsi, mbèn nke ngwag njoṅ benntùn fa.

⁵Là ndonni, mba yen mfôg mènnzwi li num ngùtni àm nà, m'a' keb ntsha i, mbwôg ndù k'a bèn nse' ntshu' tu àm.

⁶Tshùaben tshob ndù: Bin ju' mba yen ngatsho'te ntsha ketsin li tshob là ké?

⁷Nsi ke' ku'ni neghù nunetsin ben ts'a tsho' yube, tse bo num nkua' yi tèttswe' mba mbwôgtshù là ké? A ke nsi fènte yub ké?

⁸Me tshob bin ndù mb'a' ghù nunetsin bo be kua' ndende. Là ngelaṅ ze Mén mèn nsi se' là, a nsi fon bamntù num nsitsha' ké?

⁹A tshob mba mo' tànkùt mfà num ben tse bo num nke ndo' wut tshob mba ben netsine, nke ngwag tsemo' benntùn nà.

¹⁰Ben bàa lo ko' nèn ndà Nsi num nele'te Nsi, mo' na' mb'a mén Férésia, mo' be ngakwéfé'.

¹¹Mén Férésia tsin tù, nde'te Nsi num tu wul i, ntshob ndù: Nsi àm, me labt'o mba me ke' be tshàm à mba tsemo' benntùn, tse bo b'a ba fimntshu, ben nu tshob ke' tsin nà, ghaghù màndà, ke bèn mbe tshàm à mba yen ngakwéfé li là.

¹²Me num nzi nziku' yoṅ bàa ntùm ta' ngabnjù; me num nga ngabte tshu tshàm fa nze gham, mfà bag i ntshù' num lén so.

¹³Là ngakwéfé' tsin ze tà ngùanesà, ke ku'ni nebù' miag mi ndôte mfe kamànyam. A tù' lab be ntù i ntshob ndù: Nsi àm, ko ndèn màm ze me be mèn kebwô là.

¹⁴Me tshob bin ndù: Yen mèn ni lo be bèn njam ndà i ndù nu i tsin, ze mo' ke tsin. Nummbe mèn z'a num ndo' wul i nèn yi tù là, bo nsi tèn i fà nsi; mèn z'a num ndo' wul i nèn yi nsi là, bo nsi bù' i fà tù.

¹⁵Bo lo' mba bonfi nse' yi ndù Yésu kwag yube. Ghazi'te nu Yésu be yen ndùlala, ntshobte yube.

¹⁶Là Yésu tsiaṅ yub mbaṅ i, ntshob ndù: Bin faṅ bontsit bônke' bo se' ntèl àm, kà bin tshèt yube, nummbe nufen Nsi b'a ze ben tse bo be ndaṅndaṅ mba bo là.

¹⁷Kua' nenùne, me tshob bin ndù: Mèn z'a ke nsi kwé nufen Nsi à mba metsit mén nà, ke nsi tsho bwe.

¹⁸Mo' nkam bètte Yésu ndù: Ngatswite ze mebwô, m'a' ghù à ke kà ngù yàm bag i ntùm yôg matmat là?

¹⁹Là Yésu tshob yi ndù: Numk'o ntsiaṅ àm mèn mebwô à? Sàm mèn ke mèn mebwô k'a ke nda' Nsi tù' i.

²⁰O lèn ntshù' Nsi: Kà ghù màndà, kà zwi mèn, kà yi tshô, kà kwé nta tatte, ke nku'ni tàan mba màan.

²¹Yen mèn nà bùnte ndù: Me lo à ze men ntshù' Nsi là fe ngelaṅ me be mônke' là.

²²Yésu be ju' mb'a tshob là, ntshob yi ndù: Ta' ju bèn mbwoṅ wù ntshù'. Swèn njoṅ tshu fa ts'o ghù là, mfà nkàb bwoṅbwoṅ, o nsi se' ghù junkàb tanjoṅ mfe kamànyam; mbèn nse' ntam njam àm.

²³Là, a be ju' ndùlala nyamte se i, nummbe a lo ghù tshunkàb yàme.

²⁴Yésu lôt'é, ntshob ndù: Mi' a ta neshu ben tse bo ghù tshu yàm nà netsho ntùm nufen Nsi.

²⁵A fùag kamél netôg tô nto ntshùa mb'a be ngankàb tsho ntùm nufen Nsi là.

²⁶Ben tse bo ke nju' i là tshob ndù: Kà we z'a ku'ni neyôg à?

²⁷A bùnte ndù: Ju z'a num ntshùa benntùn nà ke' be tshùa Nsi.

²⁸Là Pétro tshob yi ndù: Tshù, bag lo faṅ tshu tse bag ghù là, ntam njam o.

²⁹Yésu tshob bo ndù: Kua' nenùne, me tshob bin ndù: Mèn ke bwe z'a na' mfaṅ ndà i, nzwi i, fèt tse, tàab mba màab, ke bon tse lo num nufen Nsi là,

³⁰z'a ke nsi kwé tshen tshu là kua' yàm fe ndonni ntùm yen njù li, bèn kwé yôg matmat ntùm njù z'a nsi se' là.

³¹Yésu lo' tse ntshob bàa gham tù' bo, ntshob bo ndù: Tshù, bag bin tshwèt nko' nèn Yérusalém, njoṅ nu fa tse ghatshob ntshob Nsi na' nkite mfà num Mén mèn nà nsi bumte.

³²Bo nsi fà Mén mèn mbu ghakelèn Nsi, bo tshabt'é, ngùtni i, ntôg nkekùà num i,

³³ndab i nshua'a, nzwi i; a be be mbatte lé'njù tat a bam num vù.

³⁴Ghazi'te nu i ke ju' sàm ju num yen nu là; men ntshob li lo lemte mbwe bo, ntun mi bèn nke ndemte num zenu yube.

³⁵Mba Yésu ke ngebte Yériko là, mo' mfùmiag tswe nsi nkaṅ manze nke ndon tshu.

³⁶A be ju' mba bwoṅ benntùn tshwèt ntshùa là, mbètte ju z'a tshwèt ntôg là.

³⁷Bo bùnte yi ndù: A Yésu ze Nazarèt bèn nke ntshùa.

³⁸A kua' neta ndù: Yésu Mén David, ko ndèn màm!

³⁹Ben tse bo ke nzin mbwe là, nke ntshobt'é ndù a mi ntswe, là, a bèn nkua' kua' neta ndù: Mén David ko ndèn màm!

⁴⁰Yésu tsin ngù bo lo' i nse' yi; ngelaṅ ze mfùmiag ghebte mbaṅ i là, a bètt'é, ntshob ndù:

⁴¹Ke z'o kô ndù me ghù wù à? Mfùmiag bùnte ndù: Tshùaben, ghù me yen nze.

⁴²Yésu tshob yi ndù: Yen nze, bamntù o yôg o.

⁴³Be num yen ngelaṅ nà, a yen nze, ntam njam Yésu nke ngamte Nsi. Njoṅ benntùn fa be yen yen nu là, mfà ghamte Nsi.