Read Medumba Lukas 19 Bible Online

Lukas 19 - Medumba bible

Lukas 19

¹Yésu tsho Yériko, ntshùa netèt ngô.

²Tshù, mo' mèn lo be bwe, lén se Sakiô, tà ghakwéfé', mbèn mbe ngankàb.

³A lo ke ndiag neyen Yésu lèn mèn z'a be yi là, là ke ku'ni num bwoṅ benntùn, nummbe a na' mb'a mekam mèn.

⁴A kù nde nèn mbwe, nko' num mo' tù fènngab num neyen Yésu, nummbe a nsi tshùa bwe.

⁵Yésu kum num yen dù' là, mbù' miag mi tù, ntshob yi ndù: Sakiô, swe' nsi ndende, nummbe sènni a bwô ndù me zi à ndà o.

⁶Sakiô swe' nsi ndende, ndo' Yésu ntùm tsiaṅte.

⁷Njoṅ yub fa be yen yen nu là, ntshobte tun tô, ntshob ndù: A nèn ntsho ndà ngaghù nukebwô nzi bwe.

⁸Sakiô tsin tù, ntshob mbwe Tshùaben ndù: Tà, tshù, me nsi fà mo' bag tshu tshàm bwoṅbwoṅ; a be ze me na' nkubte mèn nkwé ju yi là, mba m'a' ba' yi nze tse kuà.

⁹Yésu tshob yi ndù: Sènni yôg tsho ntùm yen ndà li, nummbe mba yen mèn ni be z'a mo' mén Abraham.

¹⁰Nummbe Mén mèn se' à nediage, bèn yôg z'a na' mbi là.

¹¹Yésu bèn ntshob mo' tànkùt ben tse bo lo neju' tshen nu li là, nummbe a lo ke ngebte Yérusalém mba nummbe bo lo ke nkwate ndù nufen Nsi tù' nese'e.

¹²A tshob ndù: Mo' mèn ndùb lo ke nèn ntùm mo' ngô z'a sag là, ndù bo yo' i fen k'a bèn njam.

¹³A ghù bo tsiaṅ tshe' tse gham, a fà minà bo gham, ntshob bo ndù: Bin nèn nta, njù bin tà nkum ngelaṅ me nsi bèn njam nà.

¹⁴Là ba la' lo ke mbàn i; ngelaṅ a nèn nà, bo tum bo nèn ntshob ndù: Bag ke' kô ndù yen mèn nà tô yage.

¹⁵Ngelaṅ z'a bèn njam ndù bo yo' i fen nà, a ghù bo tsiaṅ tshe' tse ts'a fà nkàb bo là neyen njoṅ bin ze mba we lo ta njù là.

¹⁶Mbwe i tsin mbwe i, ntshob ndù: Tshùaben, minà o tsho nta njù tse gham.

¹⁷A tshob yi ndù: A bwô me ngafa' ze mebwô, mb'o be mèn nenùn num metsit nu là, o nsi ke tô ngô gham.

¹⁸Mbatte bàa se' ntshob ndù: Tshùaben, minà o tsho nta njù tse tàn.

¹⁹A tshob yen ni be ndaṅndaṅ ndù: O nsi tô yu à ngô tàn.

²⁰Mo' se' ntshob ndù: Tshù minà ze me na' nkutte ntùm kam nzwe ndé' li.

²¹Nummbe me lo ke mbwôg o, nummbe o b'a tshùagkèt mèn; o num ndo' ju z'o ke' yab là, nke ntsho' tshu ts'o be ke ywit là.

²²A bùnte yi ndù: Ngafa' ze kebwô, me nsi lo' à be kua' ntshob mu kà tsho't'o yi. O lo lèn ndù me b'a tshùagkèt mèn, nke ndo' ju ze me ke' bèn njab là, nke ntsho' tshu tse me ke' bèn njwit là.

²³Numk'o na' mbe ke yab nkàb àm dù' ze bo num ndé' nkàb l'à? Mba me be bèn njam nsô bin i.

²⁴A tshob ben tse bo be bwe là ndù: Bin kwé yen minà là yi, mfà mèn z'a ghù minà gham nà.

²⁵Bo tshob yi ndù: Tà, a ghù minà gham.

²⁶A bùnte bo ndù: Me tshob bin ndù: Bo nsi fà mèn z'a ghù là; là mèn z'a ke' ghù là, bo a' kwé mba z'a ghù là;

²⁷mbe se' mba ghakeban tshàm tse bo na' mbe ke kô ndù me be mfen nà, bin lo' yub nse' yi nsen ni mbwe àm, nkebte ntô mube.

²⁸Yésu tshob ndùlala, ntshùa mbwe num neko' nèn Yérusalém.

²⁹Yésu be ghebte Bètfagé mba Bètania mbaṅ mbat ntene, ntum tsemo' ghazi'te nu i bàa,

³⁰ntshob ndù: Bin nèn ntùm yen ngô là z'a be mbwe là, bin a' be tsho bwe, njen mén kekwèn ndù bo taṅ i, ze mèn ke' yoṅ nto' ko' num i là. Bin ké' i ndo' i nse' yi.

³¹A be ze mèn bètte zin ndù: Numke bin nké' i à? Bin bùnte ndù: Nummbe Tshùaben tshwèt ndiag i.

³²Ben tse Yésu tum yub là nèn njen be ndaṅndaṅ mba Yésu tshob bo là.

³³Mba bo ke nké' yen mén kekwèn nà, ben tse bo ghù i là tshob ndù: Numke bin nke nké' yen mén kekwèn n'à?

³⁴Bo bùnte ndù: Nummbe Tshùaben tshwèt ndiag i.

³⁵Bo nèn yi mfà Yésu, ma' nzwe tshob num mén kekwèn ngù Yésu ko' num i.

³⁶Mb'a ke nèn nà, bo nke nsate nzwe tshob num manze.

³⁷Mb'a ke ngebte mbaṅ Yérusalém dù' swe'swe' num mbat nten nà, njoṅ bwoṅ ghazi'te nu i fa dun tsiaṅte, nto' neke nyàmte Nsi kua' neta num njoṅ nsà tse bo na' njen nà.

³⁸Ntshob ndù: Mbotni be mfen z'a tshwèt nse' num lén Tshùaben nà. Fite be kamànyam, mba ghamte be tà mfe tù.

³⁹Tsemo' ba Férésia tse bo be netèt bwoṅ benntùn nà tshob Yésu ndù: Ngatswite, tshobte ghazi'te nu o.

⁴⁰A bùnte ntshob ndù: Me tshob bin ndù: A be ze bo mi' là, mba ndoṅ nsi kua'a.

⁴¹Ngelaṅ z'a ke ngebte là, a yen ngô, nkua' num i, ntshob ndù:

⁴²A lo mbe ndù mba wù yu ntùm sen lé'njù li, lèn ju z'a be a ghù o tswe fite là! Là yen nu là lem num miag mu.

⁴³Tsemo' lé'njù nsi se' num o, ghakeban tsho nsi diaṅ o mba nsam nà, fél o, bèn tshètt'o bag bag.

⁴⁴Bo nsi bagt'o, wù bin à bon tsho ts'o ghù là, ke bèn mfaṅ mo' loṅ num mo'o, nummbe o ke' lèn ngelaṅ yen nà ze Nsi se' nelôt'o là.

⁴⁵Yésu tsho ntùm Ndà Nsi, nto' neta' ghatantàne;

⁴⁶nke ntshob bo ndù: Bo lo kite ndù: Ndà àm nsi b'a ndà nele'te Nsi; là bin ghù a kaṅ ntù' ngab ba fimntshu.

⁴⁷Yésu lo ke ntswite njoṅ lé'njù fa ntùm Ndà Nsi, ghale'te Nsi tse ndùbndùb, ghalèn ṅwa'ni Nsi mba ba mbwe benntùn ntùm ngô nke ndiag nezwi i.

⁴⁸Là bo ke lèn mb'a bwô ndù bo ghù là, nummbe njoṅ benntùn fa tse bo ju' i là lo lat num i.