Read Medumba Lukas 20 Bible Online

Lukas 20 - Medumba bible

Lukas 20

¹A lo be num mo' lé' netèt tshen lé'njù là, mba Yésu ke ntswite benntùn ntùm Ndà Nsi, mbèn nke ntshob nkùn mebwô là, ghale'te Nsi tse ndùbndùb mba ghalèn ṅwa'ni Nsi se' boa ghakwé mbwe.

²Ntshob yi ndù: Soṅ yag ngù' z'o be ngù tshen nu li yi là; we bèn mfà yen ngù' là wù à?

³A bùnte ntshob bo ndù: Mba m'a' bètte zin yàm nu, bin tshob me.

⁴Kwéntse Yohané fe à kamànyam k'a fe à benntùn à?

⁵Là bo kwate ntshob netèt bo ndù: A be ze be tshob ndù a fe à kamànyam nà, mb'a' tshob ndù: Bin na' mbe ke bam i numke?

⁶Là, a be ze be bèn netshob ndù: A fe à benntùn nà, mba njoṅ benntùn fa nsi tamte ben ndoṅ, nummbe bo yen kua' ndù Yohané na' mb'a ngatshob ntshob Nsi.

⁷Bo bùnte ntshob ndù bo ke' lèn dù' z'a fe là.

⁸Yésu tshob bo ndù: Mba mba me yàm ke nsi tshob ngù' ze me be ngù tshen nu là yi là bin.

⁹Yésu to' netshob yen tànkùt li benntùn ndù: Mo' mèn lo bwe nkùa njab ghadiaṅ nkùa ntùm bwe, nèn katte, ntsho ntswe ngelaṅ yàme.

¹⁰Ngelaṅ ku', a tum mo' tshe' i ghadiaṅ nkùa ndù bo fà mo' bag tshu nkùa yi. Là ghadiaṅ nkùa lab i, nta' i, a nèn mbu mbu.

¹¹A bèn ntum mo' tshe' i, bo lab mba yen nà, ntshabt'é, nta' i, a nèn mbu mbu.

¹²A bèn ntum mo' tshe' i mbatte tat, mba yen nà ze, bo be't'é, ma' i njù.

¹³Ngankùa tshob tu wul i ndù: M'a' ghù à ndùke? M'a' tum mén àm ze me num nkô i là; mo' ndù bo nsi bwôg i.

¹⁴Là ngelaṅ ghadiaṅ nkùa yen i là, bo tshob bo bo ndù: Yen ni b'a njùndà, be zwi i ndù ntsi' tù' mi be.

¹⁵Bo tèn i, ntum ntùm nkùa, nzwi i. Ngankùa nsi ghù à ndùke?

¹⁶A nsi se' ghù bo zwite tshen ghadiaṅ nkùa là, a bèn mfà nkùa tsemo' tse ghua. Bo be ju' yen nu là, ntshob ndù: Kà Nsi bam yen nu là!

¹⁷Là Yésu te miag num njoṅ yub fa, ntshob bo ndù: Men ntshob li mi bo na' nkite là bagt'a ndùke? Loṅ se ghabomndà na' ngua' là, kaṅ ntù' loṅ ntôgndà.

¹⁸Mèn z'a nsi vù num sen loṅ nà be'te wul i bwe; a be ze sen loṅ nà bèn ngwù num mèn nà, mb'a' nywi't'é.

¹⁹Ghalèn ṅwa'ni Nsi mba ghale'te Nsi tse ndùbndùb lo ke ndiag netshùb Yésu be ngelaṅ mbile, là nke mbwôg benntùn. Bo lèn kua' ndù Yésu ke ntshob yen tànkùt là mfà à num bo.

²⁰Bo to' netom Yésu, mbèn ntum ba ntom yi. Tshen ben ni nke ngù mba bo b'a ben netsin nà, nke ndiag netshùa num ta' ntshob Yésu kà ntshùb i, mfà ghatô ngô, mba bu ngomna.

²¹Bo bètt'é ntshob ndù: Ngatswite, bag lèn ndù ntshob mu mba yu netswite b'a netsine; o ke' be lôte tsho mèn, là o num ntswite manze Nsi ntùm nenùne.

²²Ntshù' bam bag ndù bag fà ntshub Kàsà ké, ke nga à?

²³Yésu lèn nkùnkù yub ntshob bo ndù: Bin lo' denario ntswite me.

²⁴A bètte yub ndù: A tu we li num bwe mba lén we? Bo bùnte ndù: Kàsà.

²⁵Yésu tshob bo ndù: Tshu Kàsà, bin fà Kàsà; tshu Nsi, bin fà Nsi.

²⁶Bo ke ku'ni nelo' ntshob mi mbùn i yi mbwe benntùn; njoṅ yub fa tshàm num ze nebùnte, mi ntswe.

²⁷Tsemo' ba Sadukaï tse bo ke nga ndù nelo num vù ke' be là bèn nse' mbètt'é yen nu li ndù:

²⁸Ngatswite, Mosé lo kite bag ntùm ntshù' ndù: A be ze mfèt mèn ghù mènnzwi, nkwù ke faṅ mén nà, mb'a bwô ndù mfèl i so mfôge, mbwe bon ngù nzwit mfèl i yi.

²⁹Tshù, tsemo' fèt sammbàa lo be bwe, mbwe i z'a ghù mènnzwi là kwù ke ghù bon.

³⁰Mbatte bàa,

³¹mba mbatte tat so yen mfôg mènnzwi là, mba njoṅ yub sammbàa fa. Njoṅ yub sammbàa fa kwù ke faṅ bon.

³²Mba mènnzwi bèn nkwù ze.

³³Ndùlala, ngelaṅ ze nelo num vù nsi ku' là, yen mènnzwi là nsi b'a nzwi we netèt bo, mba njoṅ yub sammbàa fa so i l'à?

³⁴Yésu tshob bo ndù: Bon ntùm yen njù li num nso bènnzwi, mbèn mfà ngonngon tshob ntùm nandà.

³⁵Là ben tse Tshùaben yen ndù bo ku'ni neghù yub bag i ntùm njù z'a nsi se' là, mba ntùm nelo num vù là, ke nsi so bènnzwi, ke bèn mfà ngonngon tshob ntùm nandà.

³⁶Nummbe bo ke nsi bèn kwù, bo tù' à mba ba Angél là; bo bèn mb'a bon Nsi, ndù bo bam num vù.

³⁷Là fe ben num mbam num vù mba Mosé na' nda'te ntùm dù' z'a be ntùm dù' z'a num ntshob tsho tswe'fiaṅe, ngelaṅ z'a num ntsiaṅ Tshùaben Nsi Abraham, Nsi Isak mba Nsi Yakob là.

³⁸Nsi ke' b'a Nsi fe ben, là, a b'a Nsi ben bo be ntùn nà; nummbe njoṅ benntùn fa b'a ntùn num ze tu.

³⁹Tsemo' ghalèn ṅwa'ni Nsi bùnte, ntshob yi ndù: Ngatswite, o tshob kua' mebwô.

⁴⁰Bo ke bèn mfèn ntù nebètt'é sàm nu.

⁴¹Yésu tshob bo ndù: Bo ke ntshob ndù Kristô b'a mén David à ndùke?

⁴²Tu wut David lo tshob ntùm ṅwa'ni Yobkwi ndù: Tshùaben tshob Tshùaben àm ndù: Tswe num bag bu àm ze zwim,

⁴³tà nkum ngelaṅ me nsi ma' ghakeban tsho nsi, bo tù' nko' nku mu là.

⁴⁴Mba David tsiaṅ i Tshùaben nà, be a bèn mbe mén i à ndùke?

⁴⁵Ngelaṅ njoṅ benntùn fa ke nju' i là, a tshob ghazi'te nu i ndù:

⁴⁶Bin bam nà num ghalèn ṅwa'ni Nsi, tse bo num nkô neket ngale, nkatte, nkô ndù benntùn ke ntsha'te yub num manze, nkô netswe mbwe ndiaṅ ntùm ba sinagogue, mba mbwe dù' ntùm dù' jujù là.

⁴⁷Bo num nke nkwé jujù fôg bènnzwi, mbe tatte benntùn, nke nde'te Nsi a sag. Bo a' se' ngwù ntsha z'a tshùate là.