Read Medumba Lukas 23 Bible Online

Lukas 23 - Medumba bible

Lukas 23

¹Njoṅ bwoṅ benntùn fa lo nsi, ndo' Yésu nèn yi mbwe Pilato,

²bo to' netete nu tu i, ntshob ndù: Tshù mèn ze bag yen i, a nke mbagte tu benntùn ntùm ngô yag li; a num nke nto' ndù kà bo fà ntshub Kàsà, mbèn nke ntshob ndù tu wul i b'a Kristô, mbe mfen.

³Pilato bètt'é ndù: O b'a mfen ba Yuda ké? Yésu bùnte yi ntshob ndù: O tshob.

⁴Pilato tshob ghale'te Nsi tse ndùbndùb mba bwoṅ benntùn ndù: Me ke' fon sàm nu ze yen mèn ni fàn nà.

⁵Là bo bèn ntshob kua' neta ndù: A num nke ntshu' tu benntùn, nke ntswite ntùm njoṅ ngô Yudéa fa, mbe ndù a to' à fe Galiléa, nse' nkum nsen ni.

⁶Pilato be ju' ndùlala, mbètte nelèn a be ze yen mèn ni b'a mèn Galiléa là.

⁷Pilato be ju' ndù a b'a mèn ntùm bag nte' Hèrodé, ntum i Hèrodé ze mba ze tu wut na' mbe Yérusalém num tshen lé'njù li là.

⁸Hèrodé be yen Yésu, ntsiaṅte neshu, nummbe a lo ke nkô neyen i fe tà ndùke lo, nummbe a lo ju' nu tse bo ke ntshob num Yésu là, nke nkwate ndù Yésu a' ghù mo' nsa mbwe i.

⁹A bètte Yésu nu yàme, là Yésu ke bùnte sàm nu yi mba ntshù'.

¹⁰Là ghale'te Nsi tse ndùbndùb mba ghalèn ṅwa'ni Nsi lo be bwe, nke ntete nu num Yésu yàme.

¹¹Hèrodé boa soyé wag Yésu, ntshabt'é, ma' kum ṅwa'ṅwa' num i, mbèn ntum i Pilato.

¹²Hèrodé mba Pilato tù' shun num sen lé'njù là, nummbe a lo be mbwe bo nke mbàne.

¹³Pilato tsiaṅ ghale'te Nsi tse ndùbndùb, ghatsho'te ntsha mba ba ntùm ngô,

¹⁴ntshob bo ndù: Bin lo se' mfà yen mèn ni me ndù a num mbagte tu benntùn. Tshù, me nebètt'é nu be mbwe bin, ke fon sàm nu ze yen mèn ni fàn num njoṅ nu fa tse bin tete tu i là.

¹⁵Mba Hèrodé ke' bèn ne njene, nummbe a bèn ntum i be. Tshù, a ke' ghù sàm ju z'a ku'ni ndù bo zwi i là.

¹⁶Ndùlala, m'a' ghù bo lab i, nkag i, a nèn. [

¹⁷A lo ke mbwô ndù a kag ta' ngandàtsha num njoṅ lé'njù jùa fa.]

¹⁸Bo to' nekua' njoṅ yub fa ndù: Zwi yen mèn ni, nkag Baraba bag.

¹⁹Yen Baraba là, bo na' ma' i ndàtsha à num tshu'tu z'a tôg ntùm ngô mba num mb'a zwi mèn nà.

²⁰Pilato bèn ntshob bo mo' yoṅ i, nke nkô nekag Yésu.

²¹Là bo bèn nkua' ntshob ndù: Kwimte, kwimt'é.

²²Pilato tshob bo num mbatte yoṅ tat ndù: A ke lèn nukebwô z'a ghù à? Me ke' fon sàm nu z'a ghù k'a ku'ni neghù ndù bo zwi i là. Ndùlala, m'a' ghù bo lab i, nkag i a nèn.

²³Là bo bèn nkua' mà neta, mbètte ndù bo kwimte Yésu. Bo bèn nke nkua' nèn mbwe, kà mub ntshob jù.

²⁴Pilato bam bo ndù a nsi ghù ju ze bo bètte là.

²⁵A kag mèn z'a na' ma' i ndàtsha num tshu'tu mba num mb'a zwi mèn nà, mba bo bètte là. A fà Yésu bo mba bo ke nkô là.

²⁶Mba bo ke ndo' i nèn yi là, bo tshùb mo' Simon ze Kirinia z'a ke mfe tshwèt là, mfà fanta'tù yi ndù a ket njam Yésu.

²⁷Mo' mà bwoṅ benntùn yàm be njam Yésu, mba bwoṅ bènnzwi yàm tse bo ke ndab ntù tshob mbèn nke ndàn num i là.

²⁸Yésu kaṅ wul i njam ntshob bènnzwi ndù: Ngonngon Yérusalém, kà bin kua' num àm, bin kua' a be num tu wut tsine, mba num bon tsine.

²⁹Nummbe tsemo' lé'njù bwe nse'e, tse bo nsi tshob ndù: Ghafen b'a ba kebwe, mbam mi a ke' bwe mén, mba mbùn mi a ke' nyô mén nà.

³⁰Bo nsi to' neke ntshob mbat ndùbndùb ndù: Vù num bag; mbèn ntshob nkônga nke'nke' ndù: Kabte yage.

³¹Nummbe a be ze bo ghù ndù num tù fi là, mb'a nsi se' b'a ndùke num se njum à?

³²Bo lo' mba tsemo' ghaghù nukebwô bàa, nèn nzwi yub boa Yésu.

³³Ngelaṅ bo kum dù' ze bo ke ntsiaṅ ndù nkatu là, bo kwimt'é num fanta'tù bwe, boa ghaghù nukebwô bàa, mo' num bag bu i ze zwim, mo' num ze kwéb.

³⁴Yésu nke ntshob ndù: Tà, lagte bo, nummbe bo ke' lèn ju ze bo tshwèt ngù là. Bo ghabte nzwe tse ntam tô yi.

³⁵Njoṅ benntùn fa tswe bwe, nke ndôte. Là, kamkam nke ntshabt'é, ntshob ndù: A lo yôg tsemo' ben, a bwô a yôg tu wul i, a be z'a b'a Kristô, mèn ze Nsi tsho' i là.

³⁶Mba ba soyé tshabt'é, nkù'te nse' mbaṅ i, mfà tshùagkèt ndu' yi,

³⁷ntshob ndù: A be z'o b'a mfen ba Yuda là, o yôg tu wul o yu tu.

³⁸Bo lo kite mo' kam ṅwa'ni, ntaṅ tu fanta'tù ndù: Yen mèn ni b'a mfen ba Yuda.

³⁹Mo' mèn netèt ben kebwô bàa tse bo kwimte yub num fanta'tù là, tshabte Yésu ntshob ndù: O ke' b'a Kristô ké? Yôg tu wul o yu tu, mbèn njôg mba bag yag.

⁴⁰Là mo' tshobt'é, mbùnte ntshob ndù: O ke' be bwôg Nsi ké? Wù z'o b'a nganu mba yi là!

⁴¹Mba ze be tu là, a b'a nunetsine. Nummbe tshen nu li tsho be à num ju ze be ghù là, là yen mèn ni ke' ghù sàm nu z'a bag là.

⁴²A bèn ntshob ndù: Yésu, kwimt'àm ngelaṅ z'o nsi tsho ntùm nufen so là.

⁴³Yésu tshob yi ndù: Kua' nenùne, me tshob wù ndù: Sènni bag wù nsi be Paradis.

⁴⁴A na' mb'a nguan njagnyam, njam sèn ntùm njoṅ dù' fa, tà nèn nkum nyam tat mfetnjù.

⁴⁵Lagnyam tam njame, nzwe z'a be Ndà Nsi là bèt netèt bwe.

⁴⁶Yésu kua' kua' nze neta ndù: Tà, me yab Ywèt tshàm ntùm mbu mu. A tshob ndùlala nkwù.

⁴⁷Mfen ba soyé be yen ju z'a tshùa là, ngamte Nsi, ntshob ndù: Kua' nenùne, yen mèn ni na' mb'a mèn netsine.

⁴⁸Njoṅ bwoṅ benntùn fa tse bo na' nse' neyen nu z'a tshùa là, be bèn njam nke ndab ntù tshobe.

⁴⁹Njoṅ benntùn fa tse bo lèn Yésu mba bènnzwi tse bo tam njam i fe tà Galiléa là, tsin tà ngùanesà, nke ndôte tshen nu là.

⁵⁰Mo' mèn lén se Yosèf, mèn netèt ghafà ntage, se', a na' mb'a mèn netsine, mbe mèn nenùne.

⁵¹Ndù a lo ke bam tse nu ze bo na' nkutte, ke nu ze bo na' ngù num Yésu là lo. A na' mb'a ze Arimatia ngô ba Yuda; mba tu wul i lo ke mbéb nufen Nsi.

⁵²A nèn ntèt Pilato, ndon i fe Yésu.

⁵³A swe' fe i num fanta'tù, ndam i nzwe, mbèn njab i ntùm fi se bo na' nabte ntùm loṅ ke yoṅ njab fe mèn bwe là.

⁵⁴A na' mb'a lé'njù nenabte, kà lé'njù Sabbat to'o.

⁵⁵Bènnzwi tse boa Yésu fe Galiléa là tam njam Yosèf, bo yen fi, mbèn njen mba bo yab fe Yésu bwe là.

⁵⁶Bo bèn njam, nabte ba labinda nzenze. A be lé'njù Sabbat, bo fite, mb'a be ntùm ntshù' là.