Read Medumba Lukas 3 Bible Online

Lukas 3 - Medumba bible

Lukas 3

¹A lo be ngu'njù ntshob tàn gham, mba Kàsà Tibèrio jù fen nà, Pontio Pilato be ngomna Yudéa, Hèrodé be mfen Galiléa, Filibo mfèl i be mfen Ituria mba ngô Trakoniti, Lisania be mfen Abilèné,

²Ana mba Kaïfa be ghale'te Nsi tse ndùbndùb; num yen ngelaṅ nà, ntshob Nsi se' Yohané mén Sakaria, num kônkwa.

³Yohané nke nzin ntùm njoṅ ngô fa mbaṅ Yordan, ntshob nu nekwéntse ze nekaṅ ntù ndù Nsi lagte nukebwô benntùn.

⁴Mba bo kite ntùm ṅwa'ni ngatshob ntshob Nsi Esaya là ndù: Nze mèn kua' num kônkwa ndù: Bin nabte manze Tshùaben, ndate bon manze tse ngù a tsine.

⁵Bo nsi zwiagte njoṅ tômbo' fa, kôgte njoṅ mbat ndùbndùb boa tse nke'nke' fa, tsiagte nze ts'a ṅu'te là, ngù a tsin.

⁶Njoṅ benntùn fa nsi yen yôg s'a fe Nsi là.

⁷Yohané lo ke ntshob bwoṅ benntùn bo ke nse' ndù a nyu' yub ntse là ndù: Nzwit ngamnyu, we bèn ntswite zin nekù yantù z'a nsi se' l'à?

⁸Bin yam kua' ntàm nekaṅ ntù mi a ku'ni là; kà bin ke ntshob ntùm ntù tsin ndù: Abraham b'a tà yag; nummbe me tshob bin ndù Nsi ku' nekaṅ men ndoṅ ni, ngù bon Abraham yi.

⁹Ne mbe be, bo à yab njàm num ngatù. Bo nsi ke' njoṅ ntù fa mi a ke' be yam ntàm mebwô là, ma' ntùm mbwôge.

¹⁰Bwoṅ benntùn bètt'é ndù: Ke z'a bwô ndù bag ghù à?

¹¹A bùnte ntshob bo ndù: Mènntùn z'a ghù nzwe bàa là, ghabte bo mèn z'a ke' ghù là; mènntùn z'a ghù jujù là bèn ngù be ndaṅndaṅ.

¹²Mba ghakwéfé' se' yub ndù a nyu' yub ntse, ntshob yi ndù: Ngatswite, ke z'a bwô ndù bag ghù à?

¹³A tshob bo ndù: Kà bin kwé ju ntôg njoṅ i;

¹⁴mba ba soyé bètt'é yub ndù: Ke z'a bwô ndù bag ghù yag à? A tshob bo ndù: Kà bin ghùtni mènntùn nkwé ju i ntùm kubte, bin tsiaṅte num nkàbfa' zin.

¹⁵Mba njoṅ benntùn fa ke mbéb Kristô là, njoṅ yub fa kwate ntùm ntù tshob ndù mo' ndù Yohané b'a Kristô.

¹⁶Yohané bùnte ntshob njoṅ yub fa ndù: Yàm tu, me ke nyu' zin à ntse, là mo' mèn tshwèt nse' ndù a ta ntshùa àm; me ke' ku'ni neké'te nkù nketo' mi; tu wul i nsi nyu' zin à ntùm Ywèt Nelàne, mba mbwôge.

¹⁷A ghù ke'te i bu i num neke'te njoṅ nsa fa mi bo tsham nà yi. A nsi tse'te nsa ntùn, njab ntùm nta, là nton nga' mi ntùm mbwôg z'a ke' be bi là.

¹⁸A be fà men ntag yàm nà mba memo' mi a fute là, nsoṅ benntùn nkùn mebwô.

¹⁹Là mfen Hèrodé bèn nkwi'te nukebwô num tsemo'o, ngù bo ma' Yohané ndàtsha.

²⁰Nummbe a lo kam i num tu Hèrodia nzwi mfèl i boa njoṅ nukebwô fa ts'a ke ngù là.

²¹Ngelaṅ Yohané nyu' njoṅ benntùn fa mba Yésu ntse, Yésu nke nde'te Nsi là, kamànyam gha'.

²²Ywèt Nelàn swe', nse' num i ndù a tswe mba wut là, mba bwoṅsaṅ nà. Mo' nze fe kamànyam ntshob ndù: O b'a Mén àm ze me num nkô o, mbèn njab ntù àm fa num o là.

²³Yésu lo be to' fa' se ndù a kum nguan ngu' ṅam ntat. Mba bo ke nkwate ndù a b'a mén Yosèf, mén Hèli,

²⁴mén Matat, mén Lévi, mén Mèlki, mén Yanaï, mén Yosèf,

²⁵mén Matatia, mén Amos, mén Nahum, mén Esli, mén Nagai,

²⁶mén Maat, mén Matatia, mén Séméi, mén Yosèf, mén Yoda,

²⁷mén Yohanan, mén Rèsa, mén Zorobabél, mén Salatiél, mèn Nèri,

²⁸mén Mèlki, mén Adi, mén Kôsam, mén Elmadam, mén Hèr,

²⁹mén Yésu, mén Eliézer, mén Yôrim, mén Matat, mén Lévi,

³⁰mén Siméon, mén Yuda, mén Yosèf, mén Yônam, mén Eliakim,

³¹mén Mèdéa, mén Mèna, mén Matata, mén Natan, mén David,

³²mén Isaï, mén Obèd, mén Boaze, mén Salomon, mén Nahason,

³³mén Aminadab, mén Admin, mén Arni, mén Hesron, mén Pèrès, mén Yuda,

³⁴mén Yakob, mén Isak, mén Abraham, mén Tara, mén Nackor,

³⁵mén Sèruk, mén Rôgau, mén Falék, mén Héber, mén Sala,

³⁶mén Kainam, mén Arfaksad, mén Sém, mén Noa, mén Lamék,

³⁷mén Metusala, mén Hènok, mén Yaréd, mén Malélééd, mén Kainam,

³⁸mén Enôs, mén Sèt, mén Adam, mén Nsi.