Read Medumba Lukas 8 Bible Online

Lukas 8 - Medumba bible

Lukas 8

¹Yen nu là lo be tôge, Yésu nke nzin ntùm ngôngô boa ntaṅla' nke ntshob, mbèn nke nsoṅ nkùn mebwô nufen Nsi. Boa tse ntshob bàa gham na' mbèn mbe;

²mba tsemo' bènnzwi tse Yésu yate ngokèt tshobe, nta' ywètkebwô num bo là: Maria ze bo ke mbèn ntsiaṅ Madelèna ze ywètkebwô sammbàa tum num i là;

³Yohanà nzwi Kusà, ngalôte tshu Hèrodé, mba Susànà, mba tsemo' tse yàme, tse bo ke ndo' tshu tshob njwimte Yésu boa ghazi'te nu i yi là.

⁴Mba mo' mà bwoṅ benntùn tse'te mbaṅ i, benntùn bèn nse' yi, mfe ntùm ngô nzenze, a tshob yen tànkùt li ndù: Ngama'nsa lo tum nke nèn nema' nsa mi,

⁵ngelaṅ z'a ke ma' là, mo' bag i vù nkaṅ manze; benntùn nyiaṅte nku; bon nsaṅ mfe kamànyam se' mfèl'é.

⁶Mo' bag i vù num ndoṅ, mbile, mbèn njum be kua' ndende, nummbe dù' nefite lo ke be.

⁷Mo' vù netèt ngumndot; ngumndot ko' bo yi, mfam i.

⁸Mo' bag i vù ntùm dù' tsha' mebwô, mbile, mbèn njame, tsha i ghù miag nkù. A be tshob ndùlala, ntshob neta ndù: Mèn z'a ghù ntoṅ mi à neju' yi là, a ju'.

⁹Ghazi'te nu i bètt'é tun yen tànkùt là.

¹⁰A tshob bo ndù: A bin nà tse bo fà tsham nufen Nsi bin nà. Mbe se' mba tsemo' ben nà, bo la'te njoṅ i fa bo à ntùm tànkùt, ndùlala ndù bo ke njen ke yen; nju' ke tshùb.

¹¹Tshù tun yen tànkùt là li: Nsa b'a ntshob Nsi.

¹²Ba kaṅ manze b'a ben tse bo num nju' ntshob Nsi, là Satan se' be ndende nsô ntshob là ntùm ntù tshob ndù kà bo bam, ngù nse' njôg là.

¹³Ba num ndoṅ b'a ben tse bo num nkwé ntshob Nsi ntùm tsiaṅte ngelaṅ bo ju'u, là ke ghù nga tse, bamntù yub ze keta fam ngelaṅ metsit laṅte se' bo là.

¹⁴Nsa mi a vù dù' ngumndot là b'a benntùn tse bo ju' ntshob Nsi, là nelab wut, nu neghù tshu yàm se', mfam yub num manze, bo ke yam sàm tàm nà.

¹⁵Nsa mi a vù ntùm dù' tsha' mebwô là b'a benntùn tse bo ju' ntshob Nsi, ntshùb ntùm ntù mebwô mba ntù nenùne, nke njam ntàm ntùm nefènte là.

¹⁶Sàm mèn ke' be te mbwôg num lambo, mbèn ndo' kab nkabte yi, ke nete lakunndà lo, là, a ke nte i à num téblé ndù ben tse bo tsho ndà là yen nelàn i.

¹⁷Mo' ju ke' be z'a na' ndeme, mbe ndù a ke nsi tswite wul i là; mo' ju ke' be z'a na' mbe ntùm tsham, mbe ndù bo ke nsi lène, mbe ndù a ke nsi tum njù mbwôgtshù là.

¹⁸Bin bam nà num mat ze bin num ndo' nju' yi là. Nummbe mba we lo z'a ghù là, mba bo a' fà yi; là mba we lo z'a ke' ghù là, mba bo a' kwé mba z'a tshwèt nkwate ndù a ghù là.

¹⁹Mà Yésu mba fèt tse se' neyen i, là ke ku'ni nenèn nkum mbaṅ i, nummbe benntùn lo yàme.

²⁰Bo soṅ i ndù: Màan mba fèt tsho num njù, nke nkô neyen o.

²¹A bùnte ntshob bo ndù: Mà mba fèt tshàm b'a ben tse bo num nju' ntshob Nsi, nke nze là.

²²A be num mo' lé'njù a tsho kenu boa ghazi'te nu i, ntshob bo ndù: Be dut nèn mo' yoṅ diaṅnkat ntse; bo lo nke nène.

²³Ngelaṅ ze bo ke ndut là, Yésu nke nzi. Mo' fetmbaṅ ndùb lo num ntse; ntse dun ntùm kenu, bo tù' b'a benntùn nebi.

²⁴Bo kù'te nse' mbaṅ i, mbam i, ntshob ndù: Tà, bag bi li! A bam, ntshobte fetmbaṅ mba fetntse, bo tsin, dù' tswe ndù kam.

²⁵A tshob bo ndù: Bamntù zin b'a yà? Bwôg tshùb yube, bo nyàmte yen nu là, nke ntshob bo bo ndù: Yen mèn ni b'a ndùke? A num ntô fetmbaṅ mba ntse, bo nke nju'ni yi.

²⁶Bo kum kaṅ ntse ntùm ngô ba Gérasa, z'a be mbwe Galiléa là.

²⁷Yésu yoṅ mbe tum kaṅ ntse, mo' mènntùn ntùm ngô z'a na' ngù ba ywètkebwô yàm num i là, se' mbwe Yésu. Fe ngelaṅ yàme, a lo ke bèn neket nzwe, ke bèn nke ntswe ndà, là, a ke ntswe à ntàb tufi.

²⁸A be yen Yésu, nkua' neta, mbèn ngwù num nku mi, ntshob nze neta ndù: Ke z'o ghù ntùm yàm nu Yésu Mén Nsi mfe tù? Me le't'o kà ghùtni àm.

²⁹Nummbe Yésu lo ke ntshob ywètkebwô ndù a tum num yen mèn nà; nummbe a lo ke ntô i fe ngelaṅ yàme; bo lo ke nkul i nkù tùne, nke mbéb i, a be'te nkù tùne, ywètkebwô nke ndo' i nèn yi kônkwa.

³⁰Yésu bètt'é ndù: Lén so b'a we? A bùnte Yésu ndù: Légion, nummbe ywètkebwô yàm lo tsho num i.

³¹Tshen ywètkebwô là bu' mbu Yésu ndù k'a bam ndù bo nèn ntùm gheme.

³²Tshù, mo' bwoṅ ngùnyàm lo be num yen kônga là, nke njù dù', ba ywètkebwô bu' mbu Yésu ndù a bam bo tsho num tshen ngùnyàm nà. A bam bo.

³³Bo be tum num mèn nà, ntsho num tshen ngùnyàm nà; bwoṅ ngùnyàm nà tsho num tu mbale, ngwù ntùm diaṅnkat ntse, nkwùte fa.

³⁴Benntùn tse bo ke mbéb nyàm nà, yen mba yen nu là tshùa là, nkù, mbèn nèn nsa yen nu là ntùm ngô mba tshwèt.

³⁵Benntùn tum neyen ju z'a tshùa là, nkum mbaṅ Yésu, njen mèn ze ywètkebwô tum num i là, ndù a ma' nzwe num i, ntswe mbaṅ nku Yésu, mbèn nke ntshob nu a làn. Bo bwôg.

³⁶Ben tse bo yen yen nu li là, soṅ yub mba ngaghù ywètkebwô lo njate là.

³⁷Njoṅ benntùn fa ntùm bag ngô Gérasa le'te Yésu ndù a tum ntùm ngô yube, nummbe bwôg lo tshùb yub kua' yàme. Yésu bèn ntsho ntùm kenu, mbèn njam.

³⁸Mèn ze ywètkebwô tum num i là le'te Yésu neghô njam i, là Yésu tshob yi ndù a nène, ntshob yi ndù:

³⁹Bèn njam la' o, nsoṅ ju ze Nsi ghù wù là. A nèn, nsoṅ ju ze Yésu ghù yi là ntùm njoṅ dù' fa ntùm ngô.

⁴⁰Yésu be bèn njam, bwoṅ benntùn lo' i, nummbe bo lo ke mbéb i.

⁴¹Tshù, mo' mèn lén se Yairô, z'a na' mb'a ngalôte sinagogue là, se' ngwù nsi num nku Yésu, mbèn mbu' mbu yi ndù a tsho ntùm ndà i;

⁴²nummbe a lo ghù nkwi ngon i ntshù' z'a na' mbe nguan ngu' ntshob bàa gham nà, ndù a tù' nekwù. Ngelaṅ Yésu ke nèn bwe là, bwoṅ benntùn nke mfét dù' k'a nke mfam tèt bwe.

⁴³Mo' mènnzwi z'a na' ngù ntsekebwô fe ngu'njù ntshob bàa gham, mbagte njoṅ tshu tse fa mbu ghaghù fu, sàm ta' i ke yat'é là,

⁴⁴se' njamnjam nkwag tôg nzwe Yésu. Be ndùse lem a ke ntum num i là keb.

⁴⁵Yésu tshob ndù: We z'a kwag àm à? Njoṅ benntùn fa nke nta, Pétro mba ben tse bo à bo be là tshob ndù: Tà, bwoṅ benntùn diaṅ o mbume, mbèn nke ntèn o.

⁴⁶Là Yésu tshob bo ndù: Mènntùn kwag àm, nummbe me ju' mba mo' neta tum num àm nà.

⁴⁷Mènnzwi là lo be yen ndù a be a ke lemte wul i mvèle, nse' ngwù num nku Yésu, nsoṅ mbwe njoṅ benntùn fa, ju z'a lo ngù k'a nkwag i là, mba mat a lo ndo' njate yi be ndùse là.

⁴⁸Là, a tshob yi ndù: Ngon àm, bamntù o yôg o, nèn fite.

⁴⁹Mb'a ke nke' ntshob là, mo' mèn fe ju ngalôte sinagogue, ntshob ndù: Ngon o à kwù, kà bèn neghùtni ngatswite.

⁵⁰Là Yésu z'a ju' yen nu là là, tshob Yairô ndù: Kà bwôg, bam nda' nebame, ngon o a' yôg.

⁵¹A kum ndà, mbam be nda' Pétro, Yohané mba Yakobo tsho, mba tà mén bo màab.

⁵²Njoṅ benntùn fa nke nkua'a, nke ndab wut tshob num ngon nà; a tshob bo ndù: Kà bin nekua'a, a ke' kwù, là, a nezi.

⁵³Bo zwi i, nummbe bo lèn ndù a kwù.

⁵⁴Là Yésu tshùb bu i, ntshob kua' neta ndù: Mén àm, lo tù.

⁵⁵Ywèt tse bèn mbèn njam. Be ndùse, a lo tù, Yésu tshob ndù bo fà jujù yi a jù.

⁵⁶Ntù tàab bo màab tum, Yésu tshob ndù kà bo soṅ sàm mèn mba ntshù' nu z'a lo netshùa là.