Read Medumba Nebwôgte 10 Bible Online

Nebwôgte 10 - Medumba bible

Nebwôgte 10

¹Num yen ngelaṅ nà, Tshùaben tshob me ndù: Tshua'te ntafèt ndoṅ mbàa mba mi mbwe là, nko' nse' num mbale, a bwô ndù o kom mba ta' Koṅ.

²Me nsi kite ntshob mi a na' mbe num mbwe ntafèt mi o tsit là num men ntafèt là, o yab ntùm Koṅ.

³Me lo' ntshwèn bù nkom Koṅ yi, ntshua'te ndoṅ mbàa mba mi mbwe là, nko' nèn num mbat bag ntafèt mbàa mum mbu màm.

⁴Tshùaben kite ju z'a be num mbwe ntafèt là num men ntafèt li. Ntshob gham mi a na' ntshob bin num mbale, ndù a tsin netèt mbwôge, num lé'njù mbumte là; a bèn mfà yub mum mbu màm.

⁵Me swe' num mbat mbèn njam, njab ntafèt ntùm Koṅ se me na' nkom nà, bo tswe a bwe kua' mba Tshùaben tshob me là.

⁶Bon Israél lo Béerot-Béné-Jaakan nèn Moséra. Aron na' nkwù a bwe, bo tshoṅ i a bwe; nshum i Eléazar jù ndà, ndo' ze dù' ntùm fa' Nsi.

⁷Bo lo nsen nà nèn Gudgoda, ndo Gudgoda nèn Jotbata, ngô ze nta'ntse yàm bwe là.

⁸Num yen ngelaṅ nà Tshùaben sô ze nzwit Lévi, mfà neke nket Koṅ Kàn Tshùaben yi, mba neke ntsin mbwe Tshùaben nke mfa' yi, mbèn nke ntam ntse ngô num lén Tshùaben. A fa' se bo fa' tà nse' nkum sènni là.

⁹Ndùlala bèn ngù kà Lévi ke ghù ju ke ntsi' lo boa fèt tse. Tshùaben bèn mbe mi ntsi' mba Tshùaben Nsi o tshob yi là me Israél.

¹⁰Me tswe num mbat mba me na' ngù mbwe là, lé'njù ṅam nkuà, mbwôgtshù bo tèttswe'. Tshùaben bèn nju' le't'àm mba yen yoṅ i li, ntshob mb'a ke nsi biagt'o me Israél.

¹¹Tshùaben tshob me ndù: Lo nsi ntshùb tu mbwe ngô, bo nèn ndo' ngô ze me na' nsaṅlaṅ bwe tà tshob nefà bo là a tù' yube.

¹²Israél, ndonni ke ze Tshùaben Nsi o tshwèt mbètte ndù o ghù k'a ke b'a nda' ndù o bwôg i, nke nzin num tse manze fa, nkô i nke mfa' yi Tshùaben Nsi o ngô ntù o fa bo njoṅ zwiag so fa à!

¹³A ke b'a nda' ndù o ze nkàn mi boa ntshù' mi, mi me tshwèt nkite wù sènni là, ntswe mebwô ké?

¹⁴Yen mbe Tshùaben Nsi o bèn ngù kamànyam fafa, tsha' boa tshu ts'a num bwe là.

¹⁵Là, lèn ndù Tshùaben na' nkô a nda' tà tsho nso wut num bo; bo be tôg yub a bèn nkô a nzwit yub, bin ts'a tsho' zin netèt ntumntum, mba bin tshwèt njen sènni là.

¹⁶Ndùlala, a bwô bin kaṅ ntù zine, ke bèn nke ntùn be tu nèn mbwe.

¹⁷Nummbe Tshùaben Nsi zin b'a Nsi tsemo' nsi, mbe Tshùaben tsemo' tshùaben, Nsi z'a zi neshu, nta nkuni là; a ke ntùm nu nyu' miag; ke ke nkwé nda';

¹⁸a be ngù nu ndaṅndaṅ ménntse bo mfôg mènnzwi, nke mfà jujù boa nzwe ngùn, nke nkô i.

¹⁹Bin ke nkô ngùn nummbe mba bin lo be ghùn ntùm ngô Egipto.

²⁰Israél, o nsi ke bwôg Tshùaben Nsi o, ke fa' yi, so wut num i, ke lo' lén se kàn mfe yi.

²¹A b'a mu nkuni, mbe yu Nsi. A yi na' ngù tshen tshu ndùb tse miag mu yene, ndù a kuni là netèl o.

²²Tà tsho lo swe' nèn Egipto, benntùn ntu ṅam sammbàa, ndonni Tshùaben Nsi o lo' o ngù ta' bwoṅ benntùn yi, z'a yàm mba nsa maṅwù là me Israél.