Read Medumba Nebwôgte 11 Bible Online

Nebwôgte 11 - Medumba bible

Nebwôgte 11

¹O nsi ke kô Tshùaben Nsi o, ke ze ntag mi, ntshù' mi, ntag mi boa nkàn mi njoṅ ndù fa.

²Ndonni, bin kwimte ju ze bin lène, ke b'a bon tsin tse bo ke' lèn ke yen nà, ndù Tshùaben Nsi zin lo zi'te zine; bin siaṅte ndèn mba Nsi lo' nzi yi là, ndèn neta bu i, bu i ze neta mbit z'a nyit là,

³ndèn tshu netshàm boa ntsho ts'a ma' ngô Egipto yi bo Faraon mfen mba ba la' tse fa là;

⁴bin lèn mb'a ghù ntshu ntsho ba Egipto, nyàmdiaṅ tse boa nkalig mi, mb'a na' naṅ yub ntùm dibantse meba ndùse bo ke nta' zine, mbiagte yub matmat là.

⁵Bin lèn ju z'a ghù bin num kônkwa tà nse' nkum yen dù' li bin be bwe là;

⁶bin lèn ju z'a ghù num Datân bo Abirâm, tse nshum Eliab, nshum Rubèn nà; bin lèn mba tsha' na' nga' ntshu i mi yub boa mba' mube, ntàb tshob boa mba ke lo z'a be njam bwe, netèt njoṅ ba Israél fa là.

⁷Nummbe miag min lo yen tshu ndùbndùb fa tse Tshùaben na' ngù là.

⁸A ndùlala, bin nsi ze njoṅ nkàn fa mi me tshwèt nkite bin sènni là, tshùa ndùlala ghù neta ze bin a' lo' ndo' ngô bin nsi tsho bwe a tù' zin nà yi là;

⁹tshùa ndùlala lé'njù tsin tènte ntùm ngô ze Tshùaben na' nsaṅlaṅ bwe tà tsin nefà bo mba nzwit yub là. Mbùn bo ṅwa' be nké nswe' ntùm yen ngô là.

¹⁰Nummbe ngô z'o tshwèt nèn tsho bwe a tù' yu là ke' b'a mba ngô Egipto dù' z'o tum nà, dù' o ke njwit yu ju ntùm nà, mfa' yàm nke nzwi' i ntse, mba bo num nzwi' nka' njab là.

¹¹Là ngô z'o a' tsho bwe là b'a ngô mbat boa ntômbo'o, ngô z'a be nu ntse mbaṅ z'a swe' mfe tù là;

¹²a b'a ngô ze Tshùaben Nsi o be mbébe, ngô ze Tshùaben Nsi o be nte lag bwe njoṅ ndù fa, neto'te mba ndùse ngu'njù tshwèt mi là.

¹³Ndùlala, a be ze bin ze nkàn mi me tshwèt nkite bin sènni là, a be ze bin kô Tshùaben Nsi zin, nke mfa' yi ngô ntù zin fa, njoṅ zwiag sin fa là,

¹⁴mba m'a' ke ngù mbaṅ ndo ntùm zin ngô ngelaṅ i, mbwe mbaṅ bo miagte mbaṅ nke mbe, o nke nkeb nsa, nke ndiaṅ ndu', nke ntshab mfèt;

¹⁵m'a' ghù nenà bit ntùm tsho nà num jujù nyàm tsho, o bèn ngù jujù ndùse nziku' ya o là.

¹⁶Bin zete nefaṅ bo lo' ntù zin nsô zin njam Tshùaben, bin so wut num tsemo' nsi, nke mfa' bo, nke nte nkekwi' mbwe bo.

¹⁷A be ndùlala mba yantù Tshùaben nsi kam num bin, a fùn kamànyam, mbaṅ be ke bèn ndo; tsha' be ke mfà ntàm mi, bin yoṅ nkwùte ndende ntùm ngô ntùn ze Tshùaben fà bin nà.

¹⁸Bin yab men ntshob li me tshob bin nà ntù bin, ntùm zwiag sine. Bin ke ntaṅ men ntshob là num mbu mine, ntaṅ i num nkonse zin mba keki là, a ke ntswe netèt miag mine.

¹⁹Bin tswite bon tsin yi, nsoṅ yub nu bwe. Israél, ndùs'o nsi be ndà o, be tshwèt nkatte, nô nsi zi mba ndùs'o nsi bam nà, tswite mbèn nsoṅ bon tsin nu bwe.

²⁰O nsi kite men ntshob là num mbatndà tsho boa nzendà tsho.

²¹Yen ngelaṅ nà, lé'njù tsin boa tse bon tsin yàm ntùm ngô ze Tshùaben na' nsaṅlaṅ bwe tà tsin nefà bo là. Bin nsi tswe mba num zit ngelaṅ no ze kamànyam ke' mfe tù là.

²²Nummb'a be ze bin tshùb men nkàn ni me tshwèt nkite bin, nke nze njoṅ i fa, nkô Tshùaben Nsi zin, nke nzin num tse manze fa, nke nso wut zin num i là,

²³mba yi Tshùaben nsi ta' njoṅ tshen ngô là mbwe bin, bin tù' ghatô ngô tse bo ghu'u, nta ntshùa zin nà.

²⁴Mba zit dù' lo ze ku zin te bwe là nsi tù' zine; ndùnsi zin nsi lo kônkwa nèn kum Liban, lo num ta'ntse Efrat nèn kum dibantse z'a mbinyam nà.

²⁵Sàm mèn ke bù' tu nsi num o me Israél. Tshùaben Nsi zin nsi kag bwôg bo fétwut mum ngô ze bin nsi nèn bwe, mb'a na' ntshob là, mba zit ngô lo ke mbwôg o.

²⁶Tshù, sènni me yab mbotni bo ndon mbwe o, ndù o tsho' yen ni ke yen nà lo.

²⁷Mbotni a be ze bin ze nkàn Tshùaben Nsi zin mi me kite bin sènni là;

²⁸ndon a be ze bin ke' ze nkàn Tshùaben Nsi zin, nsô wut num manz'é ze me la'te bin sènni, nèn nke mfa' tsemo' nsi tse bin ke' lèn yub là.

²⁹Ndùse Tshùaben Nsi o nsi ghù o tsho ntùm ngô z'o nsi lo' a tù' yu là, o nsi tshob mbotni num mbat Garizim, tshob ndon num mbat Ebal.

³⁰Tshen mbat là b'a mo' yoṅ Yordan, njam manze z'a mbinyam nà, ntùm ngô Kanaan tse bo num ntswe tômbo'o, mbwe Guilgal là. Yen dù' là b'a mbaṅ ntù mbwe' z'a Moré là.

³¹Nummbe bin a' dut Yordan kà ntsho ntùm ngô ze Tshùaben Nsi zin fà bin nà; bin nsi tswe bwe, a tù' zin ngô.

³²Bin tshùbe, ke ze njoṅ ntshù' fa boa ntag mi me tshwèt nkite bin sènni là.