Read Medumba Nebwôgte 12 Bible Online

Nebwôgte 12 - Medumba bible

Nebwôgte 12

¹Tshù ntshù' boa ntag mi bin tshùbe, ke ze njoṅ ndù fa bin ke' ntùn ntùm ngô ze Tshùaben Nsi tà tsin fà bin a tù' zin ni:

²Bin a' sate njoṅ dù' fa tse ngô bin nsi ta' yub ke ngamte tshob nsi bwe là. Tshen dù' là b'a num mbat ts'a sag là, num nkônga, bam ntù fi.

³Bin sate ntômbwôg mi bo bom nà, mbiagte ndèn mube num tshen dù' là.

⁴Bin ke nsi ghù a ndùlala num miag Tshùaben Nsi zin.

⁵Là bin nsi ke diag i a ntùm ze dù'ntswe, ke nèn dù' ze Tshùaben Nsi zin nsi tsho' netèt njoṅ nzwit tsin fa num nete lén se bwe là.

⁶A bwe là ze bin nsi ke ton tsin nyàm bwe, ke fà tsin tshule'te bwe, fà zin ta' nze ju ntshù' num tse nze gham, fà tsin mbwe tshu, fà tsin tshu bwôntù num nezwiagte nka'ni yi là. A bwe là ze bin nsi ke fà tsin tshu bwôntù mb'a ko' ntù bin boa mbwe bon nyàm tsin tse ndùb boa tse nke' là.

⁷A bwe là ze bin a' ke njù mbwe Tshùaben Nsi zin, bin mba tunndà tsine, ngù tsiaṅte ntù bin num ju ze mbu min diage, ndù Tshùaben Nsi zin bèn naṅ mbotni bwe là.

⁸Ndùlala bin ke nsi bèn ghù mba bag bin tshwèt ngù nsen ni, mba we lo nke ngù mb'a ko' ntù i là.

⁹Nummbe bin ke' yoṅ nzin nkume, nkum ntùm dù' fite mba ntùm ntsi' mi Tshùaben Nsi zin fà bin nà.

¹⁰Là bin nsi dut Yordan, tswe ntùm ngô ze Tshùaben Nsi zin, nsi fà bin, a tù' zin nà; a nsi fà fite bin, ndùs'a nsi tshu' zin bu ghakeban tsin tse bo lam zin mbum nà. Bin nsi te yen ngelaṅ n'a ntùm mbétni.

¹¹Yen ngelaṅ nà Tshùaben Nsi zin nsi tsho' ta' dù' ze lén se nsi ke tswe a bwe là. A bwe là ze bin nsi nèn tshu tse me nsi tshob bin bwe là: Nyàm tse bin ton nà; tsin tshule'te, ta' nze ju ntshù' num tse nze gham, tsin mbwe tshu, tsin tshu bwôntù tse bin tswitte lo' zwiagte min nka'ni yi mbwe Tshùaben nà.

¹²A bwe là ze bin nsi tsiaṅte mbwe Tshùaben Nsi zin, bin, tsin nshum mba tsin ngon, ghafa' tsin tse bandum mba tse bènnzwi, mba mén Lévi z'a be la' bin nà; nummbe bin à bo ke bèn ngù ju ke ntsi' lo.

¹³Zete neton tsho nyàm mba num zit dù' lo netèt ts'o nsi yen nà.

¹⁴Là, o a' ton tsho nyàm à num dù' ze Tshùaben a' tsho' netèt mo' zin nzwit là. A bwe là z'o nsi ghù mba ke lo ze me tshob wù là, me Israél.

¹⁵Mba tà ndùlala, o ghù nezwi nyàm ndùs'o kô là mfèt mbàb i la' o, kua' mba Tshùaben Nsi o bam wù dù' z'o be là. Mèn nesagte bo mèn z'a làn nà ku'ni nefèle, ndaṅndaṅ mba bo num mfèt mbàb njuanyàm bo ze ngabnyàm nà.

¹⁶Nda' ndù a ke' bwô nefèt lem. O nsi fètte lem num tsha' mba ntse là.

¹⁷A ke' bwô ndù o jù ta' nze ju ntshù' num tse nze gham, ntùm ndà o, num nsa mu, ke ndu' mu bo mfèt mu lo, ke mbwe bon nyàm tsho tse ndùb boa tse nke'e, ke mo' ta' yu ju bwôntù ze nezwiagte nka'ni yi lo, ke tsho tshu bwôntù ts'a ko' à ntù o lo, ke tsho mbwe tshu lo la' o.

¹⁸Là, a b'a mbwe Tshùaben Nsi o z'o nsi jù bwe là, mb'a kua' dù' z'a tsho' là. O nsi jù à bwe bin nshum o, ngon o, ngafa' o ze mandum mba ze mènnzwi, mba mèn Lévi z'a be la' o là; a b'a mbwe Tshùaben Nsi o z'o tsiaṅte bwe num bon tshu ntùn ts'o ghù ndù Tshùaben bèn mfà wù là.

¹⁹Zete là newag mèn Lévi mba zit ngelaṅ no z'o nsi ke' ntùn ntùm yu ngô là.

²⁰Ndùse Tshùaben Nsi o nsi gha'te yu ndùnsi, mb'a na' mbù wù là, nzi nefèt mbàb nsi ko' ntù o, o tshob ndù: Me tshwèt nkô nefèt mbàb. O ghù nefèt kua' mb'o kô là.

²¹A be ze dù' Tshùaben Nsi o tsho' nete lén se bwe sag là, mb'o ghù nezwi nyàm ndùb bo ze nke'e, mba me na' nkite wù là; o ghù nefèt mbàb mb'a ko' ntù o là.

²²O nsi fèt mbàb yub mba bo num mfèt mbàb njuanyàm bo ze ngabnyàm nà. Mèn z'a sagte là, bo mèn nelàn nsi fèt ntu tshob bàa fa.

²³Nda' ndù a bwô o zete nefèt lem, nummbe lem b'a zwiag; o ke nsi fèt mbàb bo zwiag ntùm bwe.

²⁴O ke nsi fèt lem, a bwô ndù o fètte lem num tsha' mba ntse là.

²⁵O ke nsi fèt lem, ndùlala ndù o be mebwô, wù bin à bon tsho, mba ndùs'o nsi tôg là. A nsi tshùa ndùlala o ke ngù nu ndaṅndaṅ num miag Tshùaben.

²⁶Là tshu ts'o yab Tshùaben Nsi boa tshu bwôntù num nezwiagte ta' nka'ni yi là nsi nèn à dù' ze Tshùaben tsho' là.

²⁷O nsi ton tsho nyàm a mbàb boa lem tse num tômbwôg Tshùaben Nsi o. Mbe se' num tshule'te o fètte lem num tômbwôg Tshùaben Nsi o, mfèt mbàb.

²⁸Tshùbe mbèn nke nze tshen tshu là tse me tshwèt ntshob wù là. A nsi tshùa ndùlala o ke ngù nu ndaṅndaṅ num miag Tshùaben Nsi o.

²⁹Ndùse Tshùaben Nsi miagte neta' ngô tse bo mbwe o, k'o lo' tshob tsha' nte bwe, ngô yub tù' yu là,

³⁰mb'a bwô ndù o zete nefi'te yub mba ndùse bo yà sate yub num miag mu là. Zete nediag nsi tshob nke mbètte ndù: Tshen ngô li na' nke ngamte nsi tshob a ndùke, me ghamte yub yàm à?

³¹Kà ghù mba bo là num miag Tshùaben Nsi o, nummbe ju ze Tshùaben num mbàne, ju z'a num mbag i là, tshen ngô là lo ghù tshen tshu là nsi tshobe, nke nton mba tshob nshum boa tshob ngon ndo' ngamte yub yi.