Read Medumba Nebwôgte 14 Bible Online

Nebwôgte 14 - Medumba bible

Nebwôgte 14

¹Bin b'a bon Tshùaben Nsi zin, Kà bin lem wut zin, ke bèn nkom tu zin ndùse bin be nsivù là.

²Israél lèn mb'o b'a nzwit z'a làn nà, mb'a ze nzwit Tshùaben Nsi o; lèn mbe Tshùaben Nsi o lo tsho'o, ndù o be ze nzwit mèn netèt njoṅ nzwit benntùn fa num nsitsha'a.

³O ke nsi jù sàm ju z'a ke' làn, ndaṅndaṅ mba Tshùaben tshob wù là.

⁴Tshù nyàm ts'a be bin nke mfèt li: Nyàmna', nzwi njùmbwe, mbwe,

⁵nyatnyàm, ngabnyàm bo shutnyàm; mbwe-tshwèt, shutmbàb, nga'nyàm bo njuanyàm.

⁶Bin nsi ke fèt mba zit nyàm no ze ndô mi ghabte, kib ku i ghù neta' i, a nke mfèt nenà ndé' ntshu i kà mbèn mfèt là. A ke nkam nenà njwe'e mbèn mfèt là.

⁷Tshù ba nyàm tse bin ke nsi fèt mbàb yub, netèt nyàm ts'a num mfèt nenà, mi, mbèn njwe'e nkame mfèle, mba tse ntshua' nku mi fag ta' bàa li: Kamél, kwinyàm, mbàbndun, nummbe bo num mfèt nenà mi mbèn njwe'e mfèle nda' ndù ntshua' nku mube ke fag ta' bàa. Bo b'a nyàm nesagte. Bin yen tshen nyàm n'a mba tse nesagte là.

⁸Ngùnyàm b'a lèn tshen nyàm nà, ntshua' nku mi fag ta' bàa, nda' ndù, a ke be kam nenà mi mbèn njwe'e mfèle. Yen nyàm nà sagte kà bin fèt mbàb i, ke kwag mba fe i.

⁹Tshù nyàm tse bin nsi fèt netèt nyàm ts'a ntùm ntse li: Bin nsi fèt njoṅ tshen nà fa tse bo ghù ju neke' mèn yi, ngù nga' num bo là.

¹⁰Là bin ke nsi fèt sàm ta' i mba ntshù' z'a ke' ghù ju neke' mèn yi bo nga' num i là. Bin yen tshen nà mba tse nesagte là.

¹¹Bin nsi fèt mba sit saṅ no s'a be se nelàn nà.

¹²Là tshù mi bin ke nsi fèt yub li:

¹³Ghammàtat, bebabsa' bo ghammàtat dibantse; sa'mbu'u, fôgtab mbu'u, mba saṅ s'a fut'é là;

¹⁴màla boa njoṅ mfuni mi fa;

¹⁵saṅ mbwe, bwe'e, saṅ na', sa'mbu' bo s'a be mfuni mi là;

¹⁶ntshum, saṅ s'a ke ntsho' nde ndù ntshu i béte là bo tutu;

¹⁷mo' saṅ nà s'a be mfute ngab ntse, ndù kekol i sag là, mo' saṅ nà s'a be ngù mo' bàm num ntshu i, nke ndem ngontse bon tse num bwe là, mo' saṅ nà s'a be ntswe kaṅntse ndù a fute màla là;

¹⁸saṅ nyàmna', nkendoṅ boa njoṅ mfuni mi fa; maṅwin bo neleme.

¹⁹Bin yen mba zit nyàm no z'a tshwèt nsoṅ bam se nsi, nke mfùt là mba ze nesagte là. Kà bin fèt yen nà.

²⁰Bin nsi fèt mba sit saṅ no s'a be se nelàn nà.

²¹Bin ke nsi fèt sàm fe nyàm; bin nsi fà ngùn z'a be la' bin nà ndù a fèle, ke neswèn ngùn no; nummb'o b'a nzwit nelàne, mbe nzwit Tshùaben Nsi o. O ke nsi na mén mbwe ntùm mbùn màab me Israél.

²²Israél, o a' ghù ngabte tshu ts'a tum num tshu ts'o ywit là nze gham mfà ta' nz'é, ngù be ndaṅndaṅ num tshu ts'o tsho' mum nà o ta' tamngu' là.

²³Yen nà ntôg o nèn num ta' dù' ze Tshùaben Nsi o tsho' num neke mfa' yi bwe là; tsin bwe num miag mi njù ju z'o sô num nzwit tshu tsho là: Ju z'o sô num nsa, ndu' mu, mfèt mu, mbwe bon nyàm tsho tse ndùb mba tse nke' là. A nsi tshùa ndùlala o zi'te neke mbwôg Tshùaben Nsi o.

²⁴Là, a be ze dù' z'o be sag neket tshen tshu là nèn yi dù' Tshùaben tsho' neke mfa' yi bwe, mb'a tam ntse wù là,

²⁵mb'a bwô ndù o swèn tshen tshu là ndo' nkàb i nèn yi yen dù' là Tshùaben Nsi o tsho' nefa' yi bwe là.

²⁶O ntsho bwe o lo' nkàb là njun mba ke lo z'o kô là yi: Ba nyàmna', ba mbwe, ndu' boa neta ndu', mba ke lo z'a bwô o là, njù mbwe Tshùaben Nsi o, ntsiaṅte bin yu tunndà.

²⁷Nda' ndù o ke nsi ghua' a mèn Lévi z'a be la' o là, nummb'a ke' ghù tsha' ts'a be mi ntsi' là mba wù là.

²⁸A mbe kum mbatte ngu'njù tat, o sô njoṅ tshu fa ts'o ghabte nze gham ndé' ta' nze là nse' yi ntùm la' so.

²⁹Yen ngelaṅ nà mèn Lévi z'a ke' ghù tsha' ts'a be mi ntsi' mba wù là, ngùn, ménntse bo mfôg mènnzwi nsi se' la' o, jù kà ywèle, a tshùa ndùlala Tshùaben Nsi o tam ntse wù num mba ke lo z'a be mbu mu fa' là.