Read Medumba Nebwôgte 16 Bible Online

Nebwôgte 16 - Medumba bible

Nebwôgte 16

¹Ghamte Tshùaben Nsi o, ndùs'o tshwèt njù Pasa ntùm ṅwù nefag tshu là. Nummb'a na' mb'a ntùm yen ṅwù là z'a na' nsô o Egipto mo' tèttswe' là.

²O nsi nèn dù' Tshùaben tsho' nete lén se bwe là, wat yu nyàm jule'te Pasa Tshùaben Nsi o bwe, nyàm ndùb bo nyàm nke'e.

³O nsi fèt mbàb tshen nyàm nà, ke fèl à bo bàn bo te ywibte se là, o nsi jù bàn ke te ywibte se lé'njù sammbàa, bàn nge' nummb'o lo be tum Egipto nke nànte. O nsi ke ghù ndùlala, lo' kwimte yôg s'a na' mbe lé'njù o tum ngô Egipto là.

⁴A ke' bwô ndù ntsha' bàn diaṅ ntùm yu ngô fafa num lé'njù sammbàa; kà sàm ju zi ndà num nyàm z'o nsi wat num mfetnjù mbwe lé'njù là.

⁵A be o ke jù Pasa a mba zit dù' num dù' tse Tshùaben Nsi o nsi fà wù là;

⁶là, a nsi b'a dù' yen nà z'a tsho' nete lén se bwe là. A yen dù' là z'o nsi jù Pasa bwe, mfetnjù, ndùse lagnyam bi là. A bwô a b'a num ngelaṅ z'o ke ntum Egipto là.

⁷O nsi na nyàm z'o wat là, mfèl i num dù' ze Tshùaben Nsi o nsi tsho' là. Njù nsi làn o ku'ni nebèn njam, nèn ntùm tsho ntàb.

⁸O nsi jù bàn ke te ywibte se num lé'njù ntôge. A be kum mbatte lé'njù sammbàa, mbumte ndùb be num neghamte Tshùaben Nsi o bwe. O ke nsi fa' sàm ju sen lé'njù là.

⁹O nsi siaṅ ngabnjù sammbàa, neto' ndùs'o to' nekeb nsa là.

¹⁰Yen nà mbe tôg o jù jùa ba ngabnjù, ndo' ngamte Tshùaben Nsi o yi. O nsi fà tshu bwôntù, fà a num mfi' ze Tshùaben Nsi o lo' ntam ntse wù yi num mfa' mu là.

¹¹O nsi tsiaṅte ntùm dù' ze Tshùaben Nsi o tsho' nete lén se bwe là, mbwe tu wul i, wù bin nshum o, ngon o, ngafa' o ze mandum mba ze mènnzwi, mén Lévi z'a la' o là, ngùn, ménntse mba mfôg mènnzwi tse bo be ndà o là.

¹²Kwimte mb'o lo be nkuan Egipto; ndùlala nke ntshùbe, mbèn nke nze men ntshù' li.

¹³Ndùs'o ṅwat nsa fa mi o tshame, ṅwat mfèt mi o tshab là, mb'a bwô ndù o jù jùa ntàb num lé'njù sammbàa.

¹⁴A bwô ndù o tsiaṅte num sen jùa li, wù bin nshum o mba ngon o, ngafa' o ze mandum mba ze mènnzwi, mén Lévi z'a la' o là, ngùn, ménntse mba mfôg mènnzwi tse bo be ndà o là.

¹⁵O nsi jù jùa num lé'njù sammbàa, ghamte Tshùaben Nsi o yi num dù' z'a tsho' nete lén se bwe là; tsiaṅte nummbe Tshùaben Nsi o a' tam ntse num tshu tsho mba num mfa' mbu mu fa. Tsiaṅte kua' mebwô num bwe.

¹⁶Mba zit mandum no nsi se' mbwe Tshùaben Nsi o yoṅ tse tat tamngu', num dù' ze Tshùaben nsi tsho' là num men njùa li: Jùa bàn ke te ywibte se, jùa ba ngabnjù bo jùa ntàb. Kà mèn se' mbwe Tshùaben ke be ndù a tshùb ju bu i.

¹⁷Mba we lo fà mb'a ku'ni là, mfà mfi' mba Tshùaben Nsi o lo' ntam ntse yi yi là.

¹⁸Israél, o nsi yabte ghasa'kam boa tsemo' kamkam ntùm mba sit tusô lo se Tshùaben Nsi o fà wù là, njabte yub à mba nzwit lo' ntete yi là. Bo nsi ke tsho'te ngô ntùm nenùne.

¹⁹A ke' bwô nete ku tu nunetsine, ke ke mfi' benntùn; kà ke nkwé nda', nummbe nda' num nkag fù miag ghazenu, nke nte ku tu ben netsine.

²⁰A bwô ndù o te lag num nunetsin kua' mebwô, a tshùa ndùlala o yôge, ngù ngô ze Tshùaben Nsi o fà wù là.

²¹O ke nsi te sàm neto mbaṅ tômbwôg s'o nsi bom num lén Tshùaben Nsi o là.

²²A ke' bwô ndù o te ba bebun tse nu tshob be mbag Tshùaben Nsi o là.