Read Medumba Nebwôgte 17 Bible Online

Nebwôgte 17 - Medumba bible

Nebwôgte 17

¹O ke nsi fà sàm jule'te Tshùaben Nsi o, z'a be nyàmna', ke njùmbwe lo z'a ghù lo' num i ke mo' dù' netsi num i lo; o ghù ndùlala mb'a b'a tshùaya'nu num miag Tshùaben Nsi o.

²A be ze mo' tum la' o, ntùm mo' tusô netèt mi Tshùaben Nsi o fà wù, mandum ke mènnzwi lo, ngù kebwô num miag Tshùaben Nsi o, mbagte kàn se,

³nèn nke mfa' tsemo' nsi, nke ngwù mbwe bo: Mbwe nsi lagnyam ke nsi maṅwù, ke mbwe ntshu ntsho mfe kamànyam no, nke nsate mba me yab njoṅ nu fa nka là; a be ze bo soṅ nu bwe ke neju' lo là, mb'a bwô ndù o diag ntun bwe kua' mebwô.

⁴A be z'o ju' yen nu là, mb'a bwô ndù o diag nelèn a be z'a b'a nenùne, ndù lèn yen tshùaya'nu là tôg ntùm ngô Israél là,

⁵mb'a bwô ndù bo soṅ yen mandum nà ke yen mènnzwi lo là z'a ghù lèn yen nukebwô là là, nèn yi num nsém, ntamt'é ndoṅ ke nezwi lèn yen mandum nà ke yen mènnzwi là lo.

⁶Mèn z'a be ngavù ntsha là, mb'a bo a' zwi i ndùse ben bàa ke tat lo kwé nta là. A ke' bwô nezwi i ndùse ta' mèn bèn nkwé nta là.

⁷Ghakwé nta nsi bwôgmbwe bù' bu num i ndù bo zwi i; là, kà ngô yôg mbù' bu nsi. A nsi tshùa ndùlala o sô nukebwô netèl o.

⁸A be ze mo' neta ntsha lo z'o tsho' te kebàn, nu nezwi mèn, ntanta, nu mfaṅ ke mo' ntsha lo num yu nsém no là, mb'a bwô ndù o ko' nèn dù' ze Tshùaben Nsi o nsi tsho' là.

⁹O nsi nèn tèt ghale'te, ben Lévi, mèn z'a be num fa' yen ngelaṅ nà, mbe ngasa'kam nà. Bètte yub bo bèn nsoṅ o mb'o keb kam yi là.

¹⁰A bwô ndù o tsin à num nu ze bo tshob wù là, nzin à mba bo tswite wù là ndùs'o nsi tsin dù' ze Tshùaben nsi tsho' là.

¹¹O nsi tsin à num ntshù' bo nsi tswit'o yi là, mba num keb ntsha ze bo tshob wù là. Kà sô ku o num nu bo tshob wù là nèn bu zwim ke ze kwéb lo.

¹²Mèn z'a lo' ko'tewut ke ju' ntshu ngasa'kam ze Tshùaben Nsi o yab i num kam, ke negha neju' ntshu ngasa'kam no là, mba o nsi zwi yen mèn nà. A nsi tshùa ndùlala o sô nukebwô netèl o me Israél,

¹³a nsi tshùa ndùlala ngô ju'u, mba we lo bwôge, ke bèn nke ngua' wul i ntùm ko'tewut.

¹⁴Ndùs'o nsi tsho ntùm ngô ze Tshùaben Nsi o fà wù, k'a tù' yu, t'o ke ntswe bwe là, o nsi tshob ndù: Me kô neghù ta' mfen a ke ntô àm, mba ngô tse bo lam àm mbum nà;

¹⁵a bwô ndù o lo' a mfen ze Tshùaben Nsi o tsho' là; o nsi lo' mfen a netèt fèt tsho. A ke' bwô ndù o lo' a ngùn ngù mfen yi num o, k'a ke b'a mo' ta' mfèl o.

¹⁶Là, a ke' bwô ndù a ghù nyàmdiaṅ yàme, ke bwô ndù a bèn ndo' ngô mbèn yi Egipto mb'a ghù nyàmdiaṅ nà, nummbe Tshùaben tshob bin ndù: Bin ke nsi bèn tshùa à num yen manze là kà bène.

¹⁷A ke' bwô ndù mfen ghù bènnzwi yàme, mbwôg ndù kà ntù i kaṅ; a ke' bwô ndù a kùmte silba bo gol yàme.

¹⁸Ndùs'a tù' mfen nà, mb'a bwô ndù a kite yen ntshù' là ntùm ṅwa'ni, mb'a be ntùm ṅwa'ni ntshù' ze ghale'te, ben Lévi ghù là.

¹⁹A bwô yen ṅwa'ni ntshù' là ke mbe yi, a ke nsiaṅ njoṅ ndù fa, ntshùa ndùlala nzi'te nebwôg Tshùaben Nsi i, nke ntshùb mbèn nke nze ntshob men ntshù' là fa boa men ntag là fafa.

²⁰A nsi tshùa ndùlala ntù i be ke ka'te mbwe fèt tse, a be ke bèn nsô ku i nèn bu zwim ke ze kwéb lo. A nsi tshùa ndùlala lé'njù tse tènte mum ze nufen, yi mba bon tse netèt bon Israél.