Read Medumba Nebwôgte 2 Bible Online

Nebwôgte 2 - Medumba bible

Nebwôgte 2

¹Bag bèn nkaṅ wut, nèn kônkwa, ntshùa a num manze dibantse meba mba Tshùaben na' ntshob me là; bag lam mbat Seir mbum num ngelaṅ yàme.

²Tshùaben tshob me ndù:

³Bin lam yen mbat li num ngelaṅ yàm neshu. Bin kaṅ wut zin nèn nze tu.

⁴A bwô o fà men ntshob li ngô. Bin a' dut ndùnsi fèt tsine, tse bon Esau tse bo num ntswe Seir là. Bo a' bwôg zine; là, a bwô bin zete.

⁵Kà bin kam yube; nummbe me ke nsi fà mba nda' dù' nete ku zin bwe bin ntùm ngô yube. Me lo fà Seir Esau a tù' ze ju.

⁶Bin nsi lo' nkàb jun jujù yi bo kà jù, lo' nkàb jun mba ntse yi bo kà nu.

⁷Kua' nenùn Tshùaben Nsi o tam ntse wù num mfa' mo fa me Israél. A lo ke mbéb o ndùs'o ke nzin num yen mà zi kônkwa là là. A be ndonni à ngu'njù ṅam nkuà mba bin Tshùaben Nsi o ke mbe là: O ke' to' bwoṅ sàm ju mba ntshù'.

⁸Bag be tshùa na' nde' fèt tshag bon Esau tse bo num ntswe Seir là, ntshùa à num manze z'a be tômbo' là, nze Elat bo Etsjon-Guéber, ndo bwe ntshùb nze z'a tshwèt nèn kônkwa Moab là.

⁹Tshùaben tshob me ndù: Kà kam Moab, ke tsho tshwèt ntsho bin yi, nummbe me ke nsi fà sàm ju wù ntùm ze ngô. Me na' mfà Ar a bon Lot k'a tù' yub ju.

¹⁰Ben Emim na' mbèn nke ntswe bwe mbwembwe. A na' mb'a nzwit mèn ndù a zi neshu, nsage, njàm nga' mbu. Bo b'a mba ben Anak là.

¹¹Mba bo yub na' nke mfut'a b'a ben Refaim mba tse ben Anak là; là ba Moab nke ntsiaṅ yub ben Emim.

¹²Ben Hor na' mbèn nke ntswe Seir mo' ngelaṅ; bon Esau na' mbèn nta' yub bwe, mbiagte yub kà nte num yub dù'. Bo ghù a mba Israél na' ngù ntùm ngô ze Tshùaben na' mfà yi là.

¹³Ndonni bin lo nsi, be dut fub Zérèd. Bag dut fub Zérèd.

¹⁴Ngelaṅ ze bag yab nelo Kadèsh-Barnéa nkum nedut fub Zérèd là be ngu'njù ntshob fom ṅam ntat, kà nkum ndùse njoṅ zwiaṅ ghama' ntsho fa kwùte ntùm mbàn kua' mba Tshùaben tshob kà nsaṅlaṅ bwe là.

¹⁵Mba kua' bu Tshùaben lo be num bo, num nebiagte yub ntùm mbàn tà nkum ndùse bo mi fafa là.

¹⁶Ndùse njoṅ ghama' ntsho fa mi netèt ngô, ndù bo nekwùte là,

¹⁷Tshùaben tshob me ndù:

¹⁸O nsi dut ndùnsi Moab sènni Ar,

¹⁹ghebte num bon Ammon. Kà kam yube, ke tsho tshwèt ntsho bin a bo, nummbe me ke nsi fà sàm ju wù ntùm ngô bon Ammon. Me na' mfà yen ngô l'a bon Lot k'a tù' yub ju.

²⁰Bo na' nke ndo' mba yen ngô l'a mba ngô Refaim nà; ben Refaim na' mbèn nke ntswe bwe mbwembwe, ben Ammon nke ntsiaṅ yub Zamzummin.

²¹A na' mb'a nzwit mèn ndù a zi neshu, nsage, njàm nga' mbu. Bo b'a mba ben Anak là. Tshùaben lo biagte yub mbwe ben Ammon tse bo ta' yub nte num yub dù' là.

²²Tshù mba Tshùaben na' ngù num bon Esau tse bo num ntswe Seir, ndùs'a biagte ben Hor mbwe bo là; bo ta' yube, nte num yub dù' tà nse' nkum sènni.

²³Ben Kaftor tum mbiagte ben Ar tse bo ke ntswe ntùm ba ngô tà nèn nkum Gaza, nte num yub dù'.

²⁴Bin lo nsi nèn ndut fub Arnon. Tshù, me swèn Sion mfen Hesbon ze Amor bo ngô i mum mbu mine. To' nelo' la', kam i ntsho.

²⁵Fe sènni m'a' ghù fétwut bo bwôg ghom njoṅ nzwit benntùn fa num lén so bam kamànyam. Nge' nsi kab mbu num bo, bo vètte ndùse bo nsi ju' tshô lén so là.

²⁶Me tum ba ntum Sion mfen Hesbon, ntum yub a boa ntshob fite. Me tsin kônkwa Kedémot kà ntum yube. Me tshob bo tshob yi ndù:

²⁷Faṅ me tôg ntùm yu ngô; m'a' tshùa a num manze ndùb, ke nèn bu zwim ke bu kwéb lo.

²⁸O nsi swèn jujù ze me jù là me, swèn ntse mi me nsi nu là me, kwé nkàb; faṅ me tôg ntùm ngô o nku.

²⁹A ju ze bon Esau tse bo num ntswe Seir boa ba Moab tse bo num ntswe Ar na' mbam me là. A bwô mba wù yu bam me tà nkum ndùse me nsi dut Yordan tsho ntùm ngô ze Tshùaben Nsi yag fà bag là.

³⁰Là Sion mfen Hesbon ke faṅ bag tshùa la' i; nummbe Tshùaben Nsi o, lo kag sagntù yi, ndù a tshùa njam bwe nswèn i ntùm mbu mu, mb'o tshwèt njen sènni là me Israél.

³¹Ndùlala Tshùaben tshob me ndù: Yen mb'a bwô me swèn Sion mum mbu mu ndende bo ze ngô. A bwô o kab mbu num i, ndo' i fa.

³²Sion tum bo ze ngô fa num nele' yag ntsho Yahats.

³³Tshùaben Nsi yag lo ghù bag tshùa ntsho, bag lo ma' ntsho ntshùa i, ntshùa bon tse mba njoṅ ze ntshu ntsho fa.

³⁴Bag lo' njoṅ ntusô mi fa, ntam ntshù' bwe, num bandum, bènnzwi boa bontsit bônke' fa, ke faṅ sàm mèn tum ntshu vùkob.

³⁵Nda' ndù bag lag ntsha' ntusô mi bag kab mbu bwe là, ndo' nyàm ngù tshag yi.

³⁶Neto' fe Aroer nèn nkum nkaṅ fub Arnon bo tusô s'a tômbo' là tà nèn nkum Galad, sàm ngô ke be z'a ta ntshùa yag là. Tshùaben Nsi yag lo swèn njoṅ i fa mum mbu mage.

³⁷Là, o lo ke ghebte mum ngô bon Ammon, num nkaṅ fub Jabbok, ke ghebte num ntusô mi a num mbat là, ke ghebte num njoṅ dù' fa tse Tshùaben Nsi be na' nto' ndù k'o kam yub là me Israél.