Read Medumba Nebwôgte 21 Bible Online

Nebwôgte 21 - Medumba bible

Nebwôgte 21

¹Be tshob mbe bo tèt fe ta' mèn ntùm ta' nà ndù bo nezwi i, ntùm ngô Tshùaben Nsi o fà wù là, mèn ke lèn mènntùn z'a zwi i là.

²Mb'a bwô ndù tsho kam boa ghasa'kam tum nèn mfi' laṅ dù' z'a be nelo dù' fe mèn be tà nèn nkum ntusô mi a ghebte là.

³Ndùse bo yen tusô s'a ghebte là mbaṅ fe mèn nà, mba ghakwé mbwe ntùm sen tusô là a' lo' metshab mfô z'a ke' yoṅ mfa' sàm ju, ke bèn njoṅ nket lèt là.

⁴Bo nsi lo' yen metshab mfô là nèn yi mbaṅ ta' fub se ntse ke' be jumte bwe, bo ke bèn ndù' sàm ju bwe là; bo nsi dù' ntô metshab mfô ntùm sen fub là.

⁵Yen nà a' be tshùa ghale'te, tse nshum Lévi ghebte; nummb'a Tshùaben Nsi o lo tsho' yube, ndù bo ke mfa' yi mbèn nke ntam ntse num lén Tshùaben. A kua' bo bèn nke ntshob nu ndùse tantshu be nsi num nu mfaṅ nà.

⁶Njoṅ ghakwé mbwe fa ntùm sen tusô là s'a ghebte num fe mèn nà nsi sôg mbu mub num metshab mfô bo dù' ntô mi ntùm fub là,

⁷tshob ndù: A ke mbu mag bèn mfètte tshen lem ni, lag sag ke' bèn njen mèn z'a fètte tshen lem nà là.

⁸Tshùaben, a bwô o lagte yen nu là yu nzwit mèn Israél z'o na' ntshu' i là. Kà bètt'é lem mbu'u,

⁹a nsi tshùa ndùlala o ghù lem mbu' tum netèl o, o ghù nu ndaṅndaṅ num miag Tshùaben.

¹⁰Ndùs'o nèn tshwèt ntsho le' ghakeban tsho ntsho là, a be ze Tshùaben fà yub num mbu mu, k'o lo' yub ngù ghandàtsha yi là,

¹¹mb'o ghù neso mènnzwi ntùn z'o tèt bwe ndù se i làn nà, a be ze ntù o yab num i là.

¹²A mbe ndùlala o lo' i nèn yi ntùm ndà o. A bwô ndù a kom tu i, kebte nkib mbu mi,

¹³a nsi sô nzwe ts'a lo mbe num i ndùse bo lo ngom i là, ghô ntùm ndà o, nke ndàn tàab bo màab num ta' maṅwù ntùn. Yen nà mbe tôg o nèn mbaṅ i ndo' i a tù' nzwi o.

¹⁴A be z'a ke' bèn nebwô o là, mb'o a' faṅ i a nèn dù' z'a kô là, o ke' ghù neswèn i nkwé nkàb, ke bèn ndo' i mba nkuan nà, nummb'o ghù ndùlala mb'o tam tuswe tu i.

¹⁵Be tshob mbe ta' mandum ghù zwi tse bàa, nke nkô mo' neshu, ke ke nkô mo' yàme, ngù bonnshum boa bo, tuswe i b'a nshum mènnzwi z'a ke' be kô i yàm nà.

¹⁶A ke' bwô ndù ngelaṅ z'a tshwèt ngabte tshu tse nshumnshum tse là, a lo' nshum mènnzwi z'a num nkô i neshu là mba tuswe i là num ze dù' nshum mènnzwi z'a ke' be kô i yàm nà.

¹⁷Là, a nsi lo' a nshum mènnzwi z'a ke' be kô i yàm nà mba tuswe i là, bèn fà ze ju a yoṅ tse bàa num tshu tse, nummbe yen nshum i là b'a kua' ze mbwe ngù', mbe ndù nu nga'nze lôt'a kua' yi.

¹⁸Be tshob mbe ta' mèn ghù nshum i a ke be ju' ntshu, mbe mén ngatatu, ke be ju' ntshu tàab ke ze màab lo, ke ju' ntshu yub mba ndùse bo naṅ ntsha tu i là,

¹⁹mb'a bwô ndù tàab bo màab lo' i nèn yi mbwe ghakwé mbwe ntùm se tusô, num nsém tusô s'a be ntswe bwe là.

²⁰Bo nsi tshob ghakwé mbwe se tusô ndù: Tshù nshum yag li, a ke' be ju' ntshu, mbe mén ngatatu; a ke' be ju' ntshu yage, yôg se b'a se kebwô, a b'a mbum ndu'.

²¹Yen ngelaṅ nà njoṅ benntùn fa ntùm se tusô nsi tamt'é ndoṅ a kwù. A nsi tshùa ndùlala o sô kebwô netèl o, njoṅ ba Israél fa ju' ndùlala nke mbwôge.

²²A be ze ta' mèn ghù ju z'a bwô ndù bo zwi i, k'o taṅ i a num ta' tù là,

²³mb'a ke' bwô ndù fe i zi num tù; a bwô o tshoṅ fe i be lé' se, nummbe mèn ze bo taṅ i tù là b'a ju ndon mbwe Nsi, ke bwô ndù o sagte ngô ze Tshùaben Nsi o fà wù mba mu ntsi' là.