Read Medumba Nebwôgte 24 Bible Online

Nebwôgte 24 - Medumba bible

Nebwôgte 24

¹Be tshob mbe ta' mandum so mènnzwi, ntum mànjam nu mènnzwi ke bèn nebwô i, nummb'a fon mo' nu tuswe num i, mb'a bwô ndù a kite ṅwa'ni nefagte nandà mfà mènnzwi nta' i ndà i.

²A be ze mènnzwi tum nèn tse là, mb'a ku'ni neghù mo' ndu i ze ghua.

³A be ze yen mbatte bàa li kô neta' i, nkite ṅwa'ni nefagte nandà, mfà bu i kà nta' i là, ke ndù yen mandum ni a na' ndo' i kwù lo là,

⁴mb'a be mbwe ndu i z'a na' nta' i là ke ku'ni nebèn nso i mba nzwi i là, nummbe bo yà sagt'é. Nummbe lèn yen nu là b'a tshùaya'nu mbwe Tshùaben, kebwô ndù o so nukebwô ntùm ngô ze Tshùaben Nsi o fà wù mba mu ntsi' là.

⁵Ndùse ta' mandum yôg nelo nandà là, mb'a ke' bwô ndù a nèn tshwèt ntsho, ke bèn mbwô ndù bo yab mo' lèt tu i; bo ke nsi bètt'é sàm ju num tamngu', num nu tunndà z'a te nsi là. Yen nà nsi ghù bo mènnzwi z'a so là ghage.

⁶A ke' bwô nefo nkwé loṅ bàn bo ngo' i num tshwèt, ke nekwé ngo' lo. Nummb'o ghù ndùlala mb'o tù' bètt'a yôg ng'é mba tshwèt là.

⁷A be ze bo yen ta' mèn ndù a yi mo' mfèl i, mèn Israél ngù nkuan i yi, ke neswèn i lo là, mb'a bwô nezwi ntshô. A nsi tshùa ndùlala o sô nukebwô netèl o.

⁸Zete num keko' nkine, ndùlala ndù o ze njoṅ tshu fa tse ngale'te, ben Lévi nsi tswit'o yi là, a bwô ndù bin ke nzin à kua' mba me na' ntshob bo là.

⁹Kwimte ju ze Tshùaben Nsi o na' ngù Maria num manze ndùse bin ke ntum Egipto là.

¹⁰A be z'o fo ju mfèl o là, mb'a ke' bwô ndù o tsho ndà i ntshùb ju i num tshwèt;

¹¹a bwô o tsin à ntshundà kà mèn z'o fo ju yi là lo' tshwèt nse' mfà wù ntshundà.

¹²A be ze ng'é b'a mbwoṅ nà mb'a ke' bwô ndù o zi ke be ndù o ba' tshwèt yi;

¹³a bwô neba' yi ndùse nyam tshwèt mbi là, ndùlala ndù a zi bo nzwe i num i, nke nyàmt'o; Tshùaben Nsi o nsi siaṅte yen nà wù mba nunetsin nà.

¹⁴O ke nsi ma'ni ngafa' z'a be mbwoṅ ju ke be yi là, k'a b'a mo' mfèl o ke mo' ngùn netèt tse bo be ntùm yu ngô, ntùm la' so lo là.

¹⁵A bwô nefà nkàbfa' i yi mba sit lé'njù lo kà nyam mbi, nummb'a b'a mbwoṅ, nke nsiaṅte z'a nda' num bwe. A ntag ndùlala mb'a' kua' Tshùaben num nu tse; o ket nukebwô num bwe.

¹⁶Ba tà ke nsi kwù num nukebwô bon tshobe, bon ke kwù num nukebwô tà tshobe; mba we lo nsi bèn kwù num nukebwô tse.

¹⁷Kà te ku num ju ze ngùn bo ménntse ghù ntsha bwe là, ke bèn nkwé nzwe mfôg mènnzwi num tshwèt.

¹⁸Kwimte mb'o lo be nkuan Egipto, Tshùaben Nsi o tshu' o; a ndùlala me fà men nkàn ni wù ndù o ke nze.

¹⁹Ndùs'o nsi tsho' tshu num nà o, lag ju num nà là, mb'o ke nsi bèn njam lo' o: Yen nà nsi b'a ze ju ngùn, ze ménntse mba ze mfôg mènnzwi. A nsi tshùa ndùlala Tshùaben Nsi tam ntse num mfa' mbu mu.

²⁰Ndùs'o kàb tshom nà, mb'o ke nsi lénte nkwela mi a tù' tù là: Men nkwela mi là b'a mi ngùn, mi ménntse mba mi mfôg mènnzwi.

²¹Ndùs'o nsi kàb ntàm ntù ndu' mu là, mb'o ke nsi lénte nkwela mi mi a tù' là: Men nkwela mi là b'a mi ngùn, mi ménntse mba mi mfôg mènnzwi.

²²Kwimte mb'o lo be nkuan Egipto. A ndùlala me fà men nkàn ni wù ndù o ke nze.