Read Medumba Nebwôgte 25 Bible Online

Nebwôgte 25 - Medumba bible

Nebwôgte 25

¹Ndùse ben bàa ghù ntanta, nse' ndà ntsha ndù bo tsho'te yub là, mba bo nsi kag mbu'u, naṅ ntsha tu ngafànnu.

²A be z'a bwô ndù bo lab ngafànnu à nelab là, mba ngasa'kam nsi ghù a nô num tsha' bo lab i njoṅ ntshu shua' mi bo lab i yi l'a mbwe i. Bo nsi lab i nshua' à njoṅ z'a ku'ni num nu z'a fàn nà.

³A ke' bwô ngasa'kam ghù bo lab i ntshu nshua' a tôg ṅam nkuà, mbwôg ndù kà bo lab i tôgte ndùlala, yi mfèl o tù' ju banban num miag mu.

⁴A ke' bwô nekut ntshu nyàmna' z'a tshwèt mfa' dù' netsham nsa là.

⁵Ndùse fètfèt bàa tswe dù' ntshù', mo' kwù mfaṅ nzwi i ke be ndù a ghù nshumnshum nà, mb'a ke' bwô ndù mfôg mfe nandà bo ta' ngùn, là a bwô mfèt mfe ndu i nèn mbaṅ i, ndo' i ngù nzwi i yi.

⁶Mbwe nshum ze yen mènnzwi là nsi bwe là nsi jù ndà mfe, lo' lén se, ndùlala ndù kà lén mfe bi ntùm ngô Israél.

⁷A be ze mfèt mfe ke' kô nelo' mfôg là, mba mfôg a' ko' nèn mbwe ghakwé mbwe num nsém, ntshob bo ndù; mfèt ndu àm gha tse nebù'te lén mfèl i, ke kô nelo' àm tse fôge.

⁸Ghakwé mbwe ntùm tusô nsi tsiaṅ i tshob nu yi. A be z'a saṅlaṅ nga nelo' i fôge, ntshob ndù:

⁹me ke' kô tshàm nelo' i fôg là, mba mfôg mfèl i nsi ghebte mbaṅ i mbwe ghakwé mbwe, sô keto' ku mfèt mfe ndu i, tôg ntsi num se i, tshob yen ngelaṅ nà ndù: Tshù mb'a nsi be num mèn z'a gha nebù'te lén mfèl i là.

¹⁰Bo nsi ke tsiaṅ ze tunndà ntùm ngô Israél ndù tunndà mèn ze bo sô keto' mi là.

¹¹Ndùse ben bàa ke nzwe zwe', nzwi mo' ghebte nefagte yub nkwé ndu i bu z'a tshwèt ndab là, a be ze mènnzwi là ghom mèn z'a tshwèt ndab ndu i num dù' kebwô là,

¹²mb'o nsi keb bu i kà ke ghù sàm kondèn num i.

¹³A ke' bwô ndù o ghù ndoṅ kilô bàm o mbàa, se ndùb bo se nke'e.

¹⁴A ke' bwô ndù o ghù nkesoṅ tshaṅ bàa ntùm ndà o, se ndùb bo se nke'e.

¹⁵A bwô so loṅ kilô b'a se ntùn, mbe s'a tsin nà. A nsi tshùa ndùlala lé'njù tsho tènte ntùm ngô ze Tshùaben Nsi o fà wù là.

¹⁶Nummbe mba we lo z'a ghù tshen tshu là, mba we lo z'a fàn nu là, ghù tshùaya'nu num miag Tshùaben Nsi o.

¹⁷Kwimte ju ze Amalék na' ngù wù num manze, ndùs'o ke ntum Egipto là.

¹⁸Kwimte mb'a na' mbumte bin yi num manze, ntsho' ngwù num o njamnjam, ke ghù sàm bwôg num Nsi là. A lo tsho' ngwù num ben tse bo be njam o ndù bo yub là, mbe be ndùlala ndù mba kua' tu wul o bot.

¹⁹Ndùse Tshùaben Nsi o nsi tshu' o bu njoṅ ghakeban tsho fa tse bo lam o mbume, fà fite wù ntùm ngô z'a fà wù mba mu ntsi' là, mb'a bwô ndù o biagte lén Amalék bam kamànyam. A ke' bwô nelagte yen nu là.