Read Medumba Nebwôgte 26 Bible Online

Nebwôgte 26 - Medumba bible

Nebwôgte 26

¹Ndùs'o nsi tsho ntùm ngô ze Tshùaben Nsi o fà wù mba ntsi'i, k'a tù' yu o te bwe là,

²mb'o nsi lo' mbwe tshu, num njoṅ tshu fa tse tsha' fà ntùm ngô ze Tshùaben Nsi o fà wù là. O nsi yab njoṅ i fa ntùm ta' ntsi, nèn yi dù' ze Tshùaben Nsi o nsi tsho' nete lén se bwe là.

³O nsi nèn mbwe ngale'te z'a num fa' là tshob yi ndù: Me nese' tshob sènni mbwe Tshùaben Nsi o ndù me tsho ntùm ngô ze yi Tshùaben na' nsaṅlaṅ num bwe tà tshag ndù a' fà bag là.

⁴Ngale'te nsi kwé ntsi bu o, te mbwe tômbwôg Tshùaben Nsi o.

⁵O nsi bèn tshob mbwe Tshùaben Nsi o ndù: Tàa na' mb'a ze Aram, ngakag nyàm. A lo swe' nèn Egipto nte bwe. Ben tse lo ke yàm. Là, a tsho bwe njàm kà ntù' b'a ngô ndùb, ben neta, ndù bo yàm neshu.

⁶Ba Egipto lo ma'ni yage, ngùtni yage, ndo' yag nkaṅ kuan yi kua' kebwô.

⁷Ndùlala bag kua' ntsiaṅ Tshùaben, Nsi tà tshage, a ju' nkua' mage, njen ntobni yag, njen ngùtni yag mba nge' yag.

⁸Tshùaben lo' yag ntum yi Egipto. A tshùa à njam bu i ze neta bo ngù' z'a ntùm bu i là, mba njam tshu netshàm boa nsà nekuni.

⁹A lo lo' yag nse' yi yen dù' li, mfà yen ngô li bag, ngô ze mbùn bo ṅwa' be nké nswe' bwe là.

¹⁰Tshùaben, ndonni me se' fà a mbwe tshu tse tsha' ts'o fà me fà là wù. O nsi te tshen tshu là mbwe Tshùaben Nsi o, te nkekwi' mu mbwe Tshùaben Nsi o.

¹¹Yen nà mbe tôg o tsiaṅte bin mèn Lévi mba ngùn z'a be netèl o là, num njoṅ tshu mebwô fa tse Tshùaben Nsi o fà wù mba tunndà o là.

¹²Ndùs'o nsi miagte nelo' ta' nze ju ntshù' num tse gham, num njoṅ tshu fa ts'o ghù là, mba mbatte ngu'njù tat, o nsi fà tshu ts'o lo' là mèn Lévi, fà ngùn, ménntse mba mfôg mènnzwi; bo nsi jù kà ywèt ntshundà o.

¹³O nsi tshob mbwe Tshùaben Nsi o ndù: Me sô ju ze me yab wù là ndà àm, mfà mèn Lévi, ngùn, ménntse mba mfôg mènnzwi. Me ghù a ndaṅndaṅ mb'o na' nkite me ntùm njoṅ ntag mu fa là. Me ke' fàn ke lagte sàm ntshù' num ba ntshù'.

¹⁴Me ke' jù sàm ju num tshen tshu là mba ndùse me be nsi vù là, ke ghù sàm ju bi num bwe, ke fa' sàm ju z'a sagte là yi. Me ke' lo' sàm ju bwe mfà fe mèn. Me ju' nze Tshùaben Nsi àm, ngù a be kua' mb'a kite ntùm ntag mi là.

¹⁵Tsin mfe kamànyam, ntùm dù'ntswe o ze nelàn ndôte yu nzwit mèn Israél, ntam ntse yi mba ngô z'o fà bag là. Ghù kua' mb'o na' nsaṅlaṅ bwe tà tshag là. Mbùn bo ṅwa' be nké nswe' ntùm yen ngô là.

¹⁶Sènni Tshùaben Nsi o tshwèt mbètt'o ndù o ke nze men ntshù' là boa men ntag là; o nsi ke tshùbe, ke ze njoṅ i fa njoṅ ngô ntù o fa mba njoṅ zwiag so fa.

¹⁷Sènni, o lèn Tshùaben Nsi o mba nda' ta' Nsi o là. O bù yi mb'o a' ke nju' ntshu i, nze ntshù' mi fa, nke ngù kua' mb'a bètte là.

¹⁸Sènni Tshùaben bam wù ndù o be kua' ze nzwit mèn, mb'a na' nka' wù là. A tshwèt mbètte ndù o ke nze ntshù' mi fa.

¹⁹A nsi ghù o zi ntshùa tsemo' ngô ts'a nabte là. O nsi tshùa yub lén, ghamte mba nkuni, be nzwit mèn nelàne, nzwit mèn Tshùaben Nsi o mb'a na' ntshob wù là.