Read Medumba Nebwôgte 27 Bible Online

Nebwôgte 27 - Medumba bible

Nebwôgte 27

¹Mosé boa ghakwé mbwe Israél tshob men ntshob li ngô ndù: Bin ke nze njoṅ nkàn fa mi me kite bin sènni là.

²Ndùse bin nsi dut Yordan tsho ntùm ngô Tshùaben Nsi o fà wù là, mb'o nsi te ndoṅ ndùb tù lo' mbem yo' yub yi.

³O nsi kite njoṅ ntshob ntshù' fa num men ndoṅ nà ndùs'o nsi dut Yordan tsho ntùm ngô Tshùaben Nsi o fà wù là. Mbùn bo ṅwa' be nké nswe' ntùm yen ngô là kua' mba Tshùaben Nsi tà tsho na' ntshob wù là.

⁴Ndùse bin nsi dut Yordan nà, bin nsi te men ndoṅ nà num mbat Ebal mba me tshwèt ntshob bin sènni ndù bin te là, ndo' mbem njo' yub yi.

⁵A bwe là z'o nsi kut ta' tômbwôg ndoṅ Tshùaben Nsi o là. O ke nsi yab tùn num men ndoṅ nà;

⁶o nsi lo' à ndoṅ mi bo ke' tshua'te là kut tômbwôg yi Tshùaben Nsi o. O nsi ton tshule'te Tshùaben Nsi o num sen tômbwôg là;

⁷o nsi fà tshule'te tse nefà me bam, jù ju bwe, tsiaṅte mbwe Tshùaben Nsi o.

⁸O nsi kite njoṅ ntshob yen ntshù' là fa num men ndoṅ, ntshebte num bwe kua' mebwô.

⁹Mosé boa ghale'te, ben Lévi, tshob ba Israél ndù: Israél kù' ntoṅ nju'u! Sènni, o tù' à ze nzwit mèn Tshùaben Nsi o.

¹⁰O nsi ke ju' nze Tshùaben Nsi o, ke ze nkàn mi boa ntshù' mi, mi me kite wù sènni là.

¹¹Be sen lé'njù là Mosé tshob men ntshob li ngô ndù:

¹²Ndùse bin nsi dut Yordan nà, mb'a bwô ndù Siméon, Lévi, Yuda, Isakar, Yosèf mba Benjamin tsin mfe tu mbat Garizim ntam ntse ngô;

¹³Rubèn, Gad, Aser, Zabulon, Dan mba Néftali tsin mfe tu mbat Ebal nso ndon.

¹⁴Yen ngelaṅ nà ben Lévi nsi fà nze yub tù tshob ba Israél fa ndù:

¹⁵Ndon tu mèn z'a nabte neto, ke ju nekome ze bo lo' a tùne nabte yi là, a be ju nebag mbwe Nsi, ndù bo ndo' a mbu mube kà nabte yi, nte ntùm dù' nelemte là. Njoṅ benntùn fa tshob ndù Amén.

¹⁶Ndon tu mèn z'a wag tàab là! Yen ngelaṅ nà ngô bùnte ntshob ndù: Amén!

¹⁷Ndon tu mèn z'a kù'te mi ndoṅ ndùnsi mfèl i là! Yen ngelaṅ nà ngô bùnte ntshob ndù: Amén!

¹⁸Ndon tu mèn z'a ghù ta' mfùmiag bi num manze là! Yen ngelaṅ nà ngô bùnte ntshob ndù: Amén!

¹⁹Ndon tu mèn z'a be mfétte ngùn, ménntse mba mfôg mènnzwi là! Yen ngelaṅ nà ngô bùnte ntshob ndù: Amén!

²⁰Ndon tu mèn z'a nô nzwi tàab là, nummb'a bù' nzwe mfùag tàab! Yen ngelaṅ nà ngô bùnte ntshob ndù: Amén!

²¹Ndon tu mèn z'a nô mba zit nyàm no là! Yen ngelaṅ nà ngô bùnte ntshob ndù: Amén!

²²Ndon tu mèn z'a nô mfèl i ze mènnzwi, ngon tàab ke ngon màab lo là! Yen ngelaṅ nà ngô bùnte ntshob ndù: Amén!

²³Ndon tu mèn z'a nô mà ntse i là! Yen ngelaṅ nà ngô bùnte ntshob ndù: Amén!

²⁴Ndon tu mènntùn z'a lab mfèl i njam tsham, nzwi i là, ke njamnjam. Njoṅ benntùn fa tshob ndù: Amén!

²⁵Ndon tu mèn ze bo junt'é ndù a fètte lem mbu' là! Yen ngelaṅ nà ngô bùnte ntshob ndù: Amén!

²⁶Ndon tu mèn z'a ke' zwiagte ntshob yen ntshù' li, ke bèn nke ntshùb ntshob mi là! Yen ngelaṅ nà ngô bùnte ntshob ndù: Amén!