Read Medumba Nebwôgte 28 Bible Online

Nebwôgte 28 - Medumba bible

Nebwôgte 28

¹A be z'o ju' nze Tshùaben Nsi o kua' mebwô, nke nze ntag mi fa mi me kite wù sènni là, mba yi Tshùaben Nsi o nsi ghù o zi ntshùa njoṅ ngô fa ts'a be num nsitsha' là.

²A be z'o ju' ntshu Tshùaben Nsi o là, mba tshù njoṅ mbotni mi a nsi be wù, se' tà kum num o li:

³Tshùaben nsi naṅ mbotni ntùm ntusô mo, naṅ mbotni num tsho nà fa.

⁴Tshùaben nsi tam ntse wù bin à bon tsho, naṅ mbotni num tshu ts'o tsho' fèn nà, num nyàm tsho tse ndùb boa tse nke'e.

⁵Tshùaben nsi naṅ mbotni num ngefel o mba num jujù z'o nsi lo' nabte yi là.

⁶Tshùaben a' ghù ntam ntse wù ndùs'o kum nà mba ndùs'o tshwèt nèn nà.

⁷Tshùaben a' ke ngù o tshùa ghakeban tsho tse bo bù' tu nsi num o là; bo nsi se' num o num ta' manze, be fe kù tshùa à num manze sammbàa, kà lo num miag mo.

⁸Tshùaben nsi ghù bin mbotni ke mbe ku ntshù' ntùm nkandà mu, mba ntùm mit mfa' lo mi o to'te là. A nsi tam ntse wù ntùm ngô ze yi Tshùaben Nsi o fà wù là.

⁹O nsi ke mb'a nzwit mèn nelàn Tshùaben mb'a na' mbam wù num bwe là, a be z'o ze ntag Tshùaben Nsi o, nke nzin num tse manze là.

¹⁰Njoṅ ngôngô fa nsi yen ndù bo ke ndo' à lén Tshùaben ntsiaṅ o yi, ndùlala nke mbwôg o.

¹¹Tshùaben nsi fà bon wù yàme, fà nyàm wù yàme, fà jujù wù yàm ntùm ngô z'a mbam wù num bwe tà tsho ndù a' fà wù là.

¹²A nsi tsho' nta i ze fen dun bwe kamànyam nà, là, tum mbaṅ wù num ngelaṅ i. A nsi tshùa ndùlala o fà tshu ngô yàme, ke bwoṅ sàm ju z'a b'o lon sàm ngô là.

¹³Tshùaben nsi lo' o ghù a nkwémbwe yi ke b'a ntshèt njam; o nsi ke b'a be tù, ke b'a mànsi, a be z'o ze ntag Tshùaben Nsi o mi me nkite wù sènni, ntshùb njoṅ i fa,

¹⁴ke sô ku o bwe, nèn bu zwim ke bu kwéb lo, num ntag fa mi me fà wù sènni, nèn njam tsemo' nsi nke mfa' bo là.

¹⁵Là, a be z'o ke' ju' nze Tshùaben Nsi o kua' mebwô, ke bèn nke nze ntag mi fa boa ntshù' mi fa mi me kite wù sènni là, mba tshù ndon fa ts'a nsi tsho num o li:

¹⁶Tshùaben nsi so ndon tu o ntùm ntusô mu, so ndon num tsho nà fa.

¹⁷Tshùaben nsi so ndon num ngefel o mba num jujù z'o nsi lo' nabte yi là.

¹⁸A nsi so ndon tu bon tsho, so ndon num tshu ts'o tsho' fèn nà mba num nyàm tsho tse ndùb boa tse nke'e.

¹⁹Tshùaben a' ke nso ndon tu o ndùs'o kum nà mba ndùs'o tshwèt nèn nà.

²⁰Tshùaben nsi tum ndon wù boa va', dum ntshu o ntùm njoṅ mfa' mo fa mi o be mfa' là, bèn sat'o kà biagt'o kua' ndende num mfa' mo mi kebwô, mi a tènt'o kà ngù o ghua' i là.

²¹A nsi tum keya' num o tà nkum ndùs'a biagt'o sàm yu mèn ke bèn ntù' ntùm ngô z'o tshwèt nèn tsho bwe là.

²²Tshùaben nsi lo' bot tsho o yi bo saṅte wut, wut nekù bo jumte, kwitshu' boa netswe, tshen nge' là yab njam o kà mbiagt'o fa.

²³Kamànyam nsi be mfe num tu o à mba tùn meba là, fùn neta tsha' be tun nku mu a mba tùn nà.

²⁴Mbaṅ ze Tshùaben nsi tsin mfe kamànyam tum mum yu ngô là b'a mbabe, mba njôg; tshen tshu là nsi swe' tsho num o kà kum ndùse bo biagt'o fa là.

²⁵Tshùaben nsi ghù ghakeban tsho tshùa o ntsho; o nsi tum num bo à num ta' manze be fe kù tshùa à num manze sammbàa kà lo num miag mube; o nsi tù' tunu mbwôg njoṅ nufen fa ts'a nsitsha' là.

²⁶Fe o a' tù' jujù nsaṅ boa nyàm tse bo nsitsha' là; sàm mèn ke nsi tum kam yub num bwe.

²⁷Tshùaben nsi lo' keko' Egipto tsho o yi, tshobome, mbàne mba mbàn nzine. O ke nsi ku'ni netshwinte kà njate.

²⁸Tshùaben a' ghù zenu o bi, fù ghom o, zwiaṅte kab mbu num o.

²⁹O nsi momte dù' mbwôgtshù mba njam nà; mfa' mu ke nsi ke zin tse mebwô. Nefétt'o mba nelag tshu tsho ke nsi tsine, sàm mèn ke ne ntum num neywimt'o.

³⁰O nsi ka ménngon mo' mèn zi bo yi; o nsi kut ba' be ke tswe ntùm bwe; o nsi bwe nkùa be ke nu ndu' mi.

³¹Bo nsi wat nyàmna' o num miag mu, o be ke fèt lèn mbàb i; bo nsi lo' kekwèn o num miag mu, be ke bèn mba' i wù njam, bo nsi fà mbwe tsho ghakeban tsho, sàm mèn be ke tum neywimt'o.

³²Bo nsi swèn tsho nshum boa tsho ngon mo' nzwit ghua. Miag mu a' tàn nze neke ndôte ndù bo bèn njam, nda' ndù ke ku'ni neywimte yub sàm nu.

³³Tshu tse tsha' ts'o fa' fà là nsi kém nzwit mèn z'o ke' lèn i là, a bèn nke ngùtni o, nke mbiagt'o;

³⁴tu o nsi tshu' num tshu tse miag mu nsi yen nà.

³⁵Tshùaben nsi ghù mo' keko' kebwô te num ntammbwe mu mba njam ntsi' mu, be keko' ke yate. Sen keko' là nsi lo bam ku o nèn kà kum tèt tu o.

³⁶Tshùaben nsi lo' o bin mfen o nèn yi ntùm ngô z'o ke' lèn nà, wù ke tà tsho lo lo ke to' tswe ntùm yen ngô là. O nsi tsho bwe ke fa' nsi tse bo lo' ntshwèn bo loṅ nabte yi là.

³⁷O nsi tù' tunu fétwut, nu tshô bo nu komzwi netèt ngô tse Tshùaben nsi lo' o nèn yi bwe là.

³⁸O nsi ywit njwit tshu yàm ntùm nà o, là tsho' tshu a kag neshu, nummbe ngamntàn a' bagte nzwit tshu o ywit là.

³⁹O nsi bwe nkùa, nabte, be ke nu ndu' mi, nummb'o ke' diaṅ nkùa mba tàn nkùa jù nkùa fa là.

⁴⁰Nten nsi be ntùm yu ngô fa, là o ke bé'te mfèt mi, nummbe nten mu nsi vùte nsi fa.

⁴¹O nsi bwe nshumnshum boa ngonngon, là o nsi bi yub fa, nummbe bo a' ghom yub nèn yi ndà kuan.

⁴²Bon tshu netshôgte nsi fèt ntù mu fa, fèt tshu ts'a bit num tsho tsha' là.

⁴³Ngùn z'a be netèl o là nsi zin tshùa o, tu wul o ke nkôg yu a be nekôg nèn nsi.

⁴⁴A nsi ke tshwé' ju wù, tu wul o be ke tshwé' yu yi. A nsi bèn be ntshùambwe, o be yu à ntshètnjam.

⁴⁵Njoṅ tshen ndon nà fa nsi yab njam o, be yu ju tà nkum ndùs'a biagt'o là, nummb'o ke' ju' nze Tshùaben Nsi o, ke bèn nze ntag mi boa ntshù' mi mi a kite wù là.

⁴⁶Yen nà nsi be keki tsho'te ntsha Nsi num o mba num yu nzwit matmat.

⁴⁷Mb'o na' mbe ke fa' Tshùaben Nsi o ntùm mfu' mi o be netèt bwe, ntùm tsiaṅte bo ntù mebwô là,

⁴⁸o nsi fa' ghakeban tsho tse me nsi tum yub num o là, fa' bo à ntùm nziku', ntùm nzi ntse, fa' bo tunntôg bo kekua. A nsi ma' kele' tùn tô o, tà nkum ndùs'a biagt'o là.

⁴⁹Tshùaben nsi kamte mo' ta' ngô tà num tôg tsha' tshag num o, ngô là nsi fe ngùanesà vù num o mba bebabsa' là. O ke nsi ju' ntshob yen ngô là.

⁵⁰Ntshù tshen ben nà kuni neshu, bo ke ke nko ndèn njwèn mèn, ke tshàm ndèn mén.

⁵¹Yen ngô là nsi fèt nyàm tsho, jù tshu tse tsha' tsho fà là, tà nkum ndùs'a biagt'o là; a ke nsi faṅ sàm ju wù, ke ngefele, ndu', mfèt, nyàm tsho tse ndùb ke tse nke' lo, tà nkum ndùs'a biagt'o fa là.

⁵²A nsi kab mbu num o ntùm ntusô fa, tà tsho kàbngô vùte nsi, tshen nsànsà kàbngô neta là ts'o be njab ntù o a bwe ntùm yu ngô fa là. A nsi kàb mbu num o ntùm mu ntusô fa, ntùm yu ngô fa ze Tshùaben Nsi fà wù là.

⁵³Netèt nge' bo ngùtni ze ngakeban nsi te o bwe là, o nsi fèt ju z'a tum zwe' o là, mbàb nshumnshum tsho bo mbàb ngonngon tsho tse Tshùaben Nsi o na' mfà wù là.

⁵⁴Mén ng'é netèt bin, ze bo kwiagt'é a ntùm nku'ni là nsi yen mfèl i lag kebwô, yen nzwi i z'a be nzi ndà ntù i là lag kebwô mba tshé' ju z'a tù' yi num bon tse là.

⁵⁵Nummb'a ke nsi bam neghabte mbàb bon tse bo sàm mèn netèt bo. Tu wul i nsi bèn fèt tù' i, nummbe sàm ju ke nsi bèn tù' yi netèt ngùtni bo nge' ze ngakeban a' te o bwe ntùm ntusô mu là.

⁵⁶Tonte mènnzwi netèt bin, z'a be nkét wul i, ke be te ku i num tsha' mfa' sàm ju là, nsi lôte ndu i lag kebwô, ndu i z'a ke nzi ndà ntù i là, nshum i bo ngon i;

⁵⁷a' lamte ju z'a nsi tum bam i là, mén z'a nsi bwe là. Ntùm bwoṅ z'a nsi be ntùm bwe là, yen mènnzwi là nsi fèt mén z'a bwe là njam tsham netèt ngùtni bo nge' dù' ze ngakeban a' te i bwe ntùm ntusô mu là.

⁵⁸Tshùbe, nke nze njoṅ ntshob yen ntshù' li mi bo kite ntùm yen ṅwa'ni li là, ndo' nke ngamte kuni lén, lén nekuni Tshùaben Nsi o yi.

⁵⁹A be z'o ke' ghù ndùlala là, mba Tshùaben lo' nkeko' banban, mi kebwô, ngokèt kebwô boa tse netshùag lab o yi mba yu nzwit.

⁶⁰Tshùaben nsi lo' ngokèt Egipto fa ts'o ke mbwôg là se' yi netèl o, tshen ngokèt là ṅab o.

⁶¹Tshùaben bèn tum mba tsemo' nzenze ngokèt bo ke' tsi ndèn mub ntùm yen ṅwa'ni ntshù' li là num o, tà nkum ndùse bo biagt'o fa là.

⁶²Bin tse bin na' njàm mba nsa mi a kamànyam nà, bin nsi mi kà tù' a me bwoṅ benntùn, nummbe bin ke' ju' nze Tshùaben Nsi zin.

⁶³Mba Tshùaben ke ṅwate neghù bin yàm nà, be ndaṅndaṅ a' ṅwate nebiagte zin fa. Bo nsi sô zin ntùm ngô bin tshwèt ntsho bwe a tù' zin nà.

⁶⁴Tshùaben nsi lo' o nèn yi ntùm ngô fa, neto' mo' tôg tsha' nèn nkum num mo'o, o tsho bwe mfa' tsemo' nsi, tse bo nabte ntshwèn ke ndoṅ no là; tshen nsi là tse wù ke tà tsho lo ke' lèn yub là.

⁶⁵Fite ke ntswe mebwô lo ke nsi be wù ntùm tshen ngô là, ke dù' nete ku o bwe lo. Tshùaben nsi ghù ntù o ke ntame, miag mu ke nsènte, zwiag so fame.

⁶⁶Yôg so nsi ghel a tù mbwe o, bwôg ke mbe njam mba mbwôgtshù, nenywinte yôg mi tse wù.

⁶⁷Ntù o nsi vètte num tshu ts'o yen nà, o ke ntshob ndù: Tù' nda' nkebnjù a be mfetnjù, tù' nda' mfetnjù a be nkebnjù.

⁶⁸Tshùaben nsi lo' o ntùm nsitima nèn yi Egipto, o zin yen manze là me na' ntshob wù ndù o ke bèn neyen nà. Bin nsi swèn wut tsin bwe ghakeban tsine, be kuan tse bandum mba tse bènnzwi; sàm mèn ke nsi tum z'a ku'ni nejun zin nà.

⁶⁹Tshù ntshob Tshùaben tshob Mosé ndù a wat kàn yi boa bon Israél ntùm ngô Moab li. Sen kàn ni ke' b'a s'a wat boa bo Horéb là.