Read Medumba Nebwôgte 30 Bible Online

Nebwôgte 30 - Medumba bible

Nebwôgte 30

¹Ndùse tshen tshu là nsi ṅwag wù, mbotni ke ndon no, tse m'a' yab mbwe o là, a be z'o yab ntù o bwe netèt ntumntum tse me Tshùaben Nsi nsi tshag o netèl bo là,

²a be z'o bèn njab ntù o num àm me Tshùaben Nsi o, nju' nz'àm ngô ntù o fa mba njoṅ zwiag so fa, wù bin à bon tsho fa, kua' mba me kite wù sènni là,

³mba kua' me Tshùaben Nsi o nsi lo' ben tsho tse bo be kuan nà bèn yi njam bèn ko ndèn mu, kùmte ben tsho netèt ntumntum tse me Tshùaben Nsi o tshag o bwe là.

⁴Ndùs'o nsi nèn ndà kuan num mo' tôg kamànyam nà, Tshùaben Nsi o nsi nèn bwe diag o, kùmte ben tsho bèn yi njam.

⁵Tshùaben Nsi o nsi lo' o bèn yi ntùm ngô z'a na' mbe ze tà tsho là, a tù' kua' yu; a nsi ghù mebwô wù, ghù ben tsho yàm ntshùa tà tsho.

⁶Tshùaben Nsi o nsi fà kaṅntù wù bin nzwil o, a tshùa ndùlala o ke nkô i ngô ntù o fa mba zwiag so fa, ntôg ndùlala njôge.

⁷Tshùaben Nsi o nsi so tshen ndon nà fa tu ghakeban tsho, tu ben tse bo bàn o, ntsho' nku mu kebàn nà.

⁸O nsi bèn njam tèt Tshùaben, ke ju' nz'é, bèn ke ze njoṅ ntag li fa mi me kite wù sènni là.

⁹Tshùaben Nsi o nsi ghù mebwô wù yàme, ghù mfa' mbu mu zine, bon tsho yàme, nyàm tsho yàme, tshu tse tsha' tsho fà là yàme. Ntù i nsi tsiaṅte neghù o be ntùm fu' mba ntù i na' ntsiaṅte neghù tà tsho be ntùm fu' là.

¹⁰Là, o nsi ju' nze Tshùaben Nsi o, ke ze ntag mi boa ntshob mi, mi bo kite ntùm yen ṅwa'ni ntshù' li là. A bwô ndù o bèn njam ntèt Tshùaben Nsi o njoṅ ngô ntù o fa mba njoṅ zwiag so fa.

¹¹Men ntag li mi me kite wù sènni là ke' tshùa yu neta, ke bèn nku'ni nesag o num sàm bag i mba ntshù'.

¹²A ke' b'a mfe kamànyam k'o tshob ndù: We z'a nsi ko' mfe kamànyam diag i bag, kà bag ju' i, nke nze i à?

¹³A ke' b'a mo' yoṅ dibantse k'o tshob ndù: We z'a nsi nèn mo' yoṅ ntse diag i bag, kà bag ju' i, nke nze i à?

¹⁴A ju ndù a ne mb'a kua' mbaṅ o, ntshu o, mba ntù o, ndùlala ndù o ke nze i kua' mebwô.

¹⁵Tshù, sènni me yab yôg bo mebwô, vùkob bo kebwô mbwe o.

¹⁶Nummbe me kite wù sènni mb'o ke nkô Tshùaben Nsi o, nke nzin num tse manze, nke nze ntag mi, ntshù' mi, ntshob mi. A nsi tshùa ndùlala o yôge, nzwil o yàme, Tshùaben Nsi o tam ntse wù ntùm ngô z'o a' tsho bwe a tù' yu là.

¹⁷Là, a be ze ntù o tsho' num Tshùaben Nsi o, o ke ju' ntshu, mfaṅ ntù o fùt'o, o te nkekwi' mu mbwe tsemo' nsi, mfa' bo là,

¹⁸mba me tshob wù sènni ndù o nsi bi, lé'njù tsho be ke yàm ntùm ngô z'o nsi tsho bwe, a tù' yu, ndùs'o dut ntse Yordan nà.

¹⁹Me lo' Kamànyam bo tsha' sènni mba ngakwénta là num o: Me yab yôg bo vùkob, mbotni bo ndon mbwe o. Lo' yôg, ntshùa ndùlala njôg bin nzwil o,

²⁰nke nkô Tshùaben Nsi o, nke nju' nz'é, mbèn nke ndat wut num i. A nsi tshùa ndùlala lé'njù tsho tènte, o bèn ntswe ntùm ngô ze Tshùaben na' ntshob nsaṅlaṅ num bwe tà tsho Abraham, Isak mba Yakob nefà bo là.