Read Medumba Nebwôgte 33 Bible Online

Nebwôgte 33 - Medumba bible

Nebwôgte 33

¹Mosé mèn Nsi tam ntse bon Israél kà nkwù,

²ntshob ndù: Tshùaben fe num mbat Sinaï nse'e. A lo nsi num Seir mba lagnyam nà. A tshwèt nziag num mbat Paran. Ben Nsi ntshu'ntshu' be. Ntshù' Nsi be bu i nke ngù mba mbwôge là.

³Tshùaben be nkô ze nzwit mèn, A be nabte tse ben. Bo b'a mbaṅ nku mu. Bo kwé ntshob mu.

⁴Mosé lo fà ntshù' be, a be ntsi' mbumte bon Yakob.

⁵A na' mb'a mfen ntùm ngô Israél, ndùse fenfen ngô kùmte là, ndùse tse tunndà Israél kùmte là.

⁶A bwô ndù Rubèn yôge, ke zi nkwù, ben tse yàm nga' mbu!

⁷A tshob num nzwit Yuda ze ndù: Wù Tshùaben, ju' nze Yuda, ndo' i mbèn yi mbaṅ ze nzwit mèn. A bwô ndù mbu mi ghù neta, O ke njwimt'é num ghakeban tse!

⁸A tshob num nzwit Lévi ndù: Bo lo lem tummim bo urim mèn nelàne, z'o laṅt'é Masa là. Bin yi lo ghù ntanta mbaṅ ntse Mériba.

⁹Lévi tshob num tàab bo màab ndù: Me ke' to' yen yub tshàm! A ke' be lèn fèt tse kua' mebwô. A ke' be lèn bon tse. Nummbe bo num ntshùb ntshob mu, nke ndé' kàn so.

¹⁰Bo num ntswite ntag mu ben Yakob yu nzwit mèn, nke ntswite ntshù' o bon Israél. Bo num nshù tshu nelamte num mfaṅ ntselag mu, njab nyàm neton num tômbwôg so.

¹¹Tshùaben, a bwô neso ngù' num i, ntam ntse yi! Bam mfa' mbu mi! Be' zwe' ghamaṅt'é, ndùlala ndù kà ghakeban tse bèn ndo nsi mo' yoṅ i.

¹²A tshob num nzwit Benjamin ndù: A b'a nzwit ze Tshùaben be nkô i neshu là. A nsi tswe à ntùm mbétni mbaṅ i. Tshùaben a' ke nkabt'é njoṅ ndù fa. A nsi ke tswe à netèt num ntshua' mbe' mi.

¹³A tshob num nzwit Yosèf ndù: Tshùaben a' naṅ mbotni mum ngô i, mfà meme' ntùn mi a fe kamànyam nà yi, mfà ntse ntùn mi a tun kamànyam nà yi,

¹⁴mfà ntàm tù ntùn mi nyàm num mfà là yi, ntàm tù mi a be mba num zit ṅwù lo là.

¹⁵A nsi fà tshu ntùn ts'a num njwèn mbat là yi, tshu ntùn ts'a num nkônga mi a tswe matmat là.

¹⁶A nsi fà tshu ntùn ts'a num tsha'a, mba ts'a ntùm bwe là yi. A bwô ndù mèn z'a la'te wul i ntùm tswe'fiaṅ nà tam ntse, ntam ntse ndùlala num Yosèf ntam ntse tèt tu Yosèf z'a b'a mèn ndùb netèt fèt tse là!

¹⁷Yosèf ghù à neta ta' fot mfô, ndô mi b'a mba ndô nyatnyàm nà. A num ndo' ndô mi là ntsham ngôngô yi, tà nèn nkum dù' tsha' te ndù i là. Tshen nà b'a ben Efraim tse bo b'a ntshu'ntshu' là, ben Manasé tse bo b'a ntsha'ntsha' là.

¹⁸O tsiaṅte me Zabulon ntùm nde mi o num nkù là, wù Isakar a bwô ndù o ṅwate ntùm tsho ntàb!

¹⁹Bo nsi tsiaṅ ngôngô num mbale, bo tsho bwe mfà tshule'te tse nenùne, nummbe bo a' lo' tshunkàb dibantse là boa tshen nà ts'a lem ntùm nkwango' là.

²⁰A tshob num nzwit Gad ndù: Mbotni be mèn z'a gha'te ze ngô Gad là! Gad nô nsi a mba nzwi ngwayit là, a num nsé'te ndaṅ bu bo tu mèn.

²¹A lo lo' mbwe tshu ts'a ntùm ngô là, nummbe ze ju ngala' b'a bwe. A lo zin mbwe ngô, nke ngù nunetsin Tshùaben, nke nze nkàn mi num miag Israél.

²²A tshob num nzwit Dan ndù: Dan b'a metshab ngwayit. A tshwèt mfe nde num Basan nse'e.

²³A tshob num nzwit Néftali ndù: Néftali ghù njoṅ mfu' ntùn fa mi a fe Tshùaben nà, ke bwoṅ sàm ju. A lo' dibantse fa mba bag mà ntèn fa.

²⁴A tshob num nzwit Aser ndù: Aser b'a mènfen netèt njoṅ nshumnshum fa, a bwô a be ngaju netèt fèt tse, kà nke nsôg nku mi a ntùm mfèt.

²⁵A bwô fùnndà tsho b'a tùne bo tùn meba, ngù' o mbèn nsag à mba lé'njù tsho là.

²⁶Sàm mèn ke bwe z'a fute Nsi Israél là. A tshwèt ntsho' nde mfe kamànyam nse' ywimt'o. A tshwèt nkuni ntùm ndot z'a kel i nke nse' yi là.

²⁷Nsi z'a tswe matmat là b'a ndàlem, ndàlem num bam mbu mi a tswe matmat là. A ta' ngakeban mbwe o, ntshob wù ndù o biagt'é fa.

²⁸Israél b'a ntùm mbétni ndà i. Tôntse Yakob b'a ze dù' ntùm ngô ze ngefet bo ndu' be bwe yàm nà. Kamànyam be mfaṅ meme' nke naṅ nsi bwe.

²⁹Israél o be tsho a mènfen! We z'a be mba wù à? O b'a nzwit mèn ze Tshùaben tshu' i là. A b'a yu tshètntsho, mbe ṅwi nkuni mu. ghakeban tsho nsi se' ma' mbu wù, là o nsi nyiaṅte tshob dù' neṅate ntùm ngô nku mu.