Read Medumba Nebwôgte 6 Bible Online

Nebwôgte 6 - Medumba bible

Nebwôgte 6

¹Tshù nkàn, ntshù' boa ntag mi Tshùaben Nsi zin tshob ndù bo tswite zin yi, ndù bin ke nze ntùm ngô bin nsi tsho bwe a tù' zin ni.

²Ndùlala o nsi bwôg Tshùaben Nsi o, ke nze njoṅ ntshù' mi boa nkàn mi fa me kite wù là njoṅ ndù fa o ke' ntùn nà, ke b'a nda' wù, wù bin nshum o mba nshum nshum o. A nsi tshùa ndùlala ntswe'njù mu tènte.

³Ndùlala o nsi ju' njoṅ i fa me Israél, ke ze njoṅ i fa kua' ntùm nku'ni. A nsi tshùa ndùlala o be mebwô, bin bèn njàm mba Tshùaben Nsi tà tsho na' ntshob wù, mbù ngô ze mbùn bo ṅwa' be nké nswe' ntùm bwe là.

⁴Ju' me Israél! Tshùaben Nsi be b'a nda' Nsi tù' i.

⁵O nsi ke kô Tshùaben Nsi o njoṅ ntù o fa, njoṅ zwiag so fa mba njoṅ yu neta fa.

⁶Men nkàn ni mi me fà wù sènni là nsi ke be ntùm ntù o.

⁷O nsi zi'te bon tsho yi, ke tshob nu bwe ndùs'o be ntùm ndà o là, ndùs'o tshwèt nkatte là, ndùs'o nô nsi là mba ndùs'o lo tù là.

⁸O *gi*nsi so men nkàn nà bu o mba ta' keki là, a nsi ke be num mbum se o.

⁹O nsi kite men nkàn nà num mbatndà nzendà o mba num ghabndà tsho.

¹⁰Tshùaben Nsi o nsi ghù o tsho ntùm ngô z'a nsaṅlaṅ bwe tà tsho Abraham, Isak mba Yakob nefà wù là. O nsi ghù ntusô ndùbndùb mi mebwô mi o na' mbèn mbe ke kut là,

¹¹mba' mi tshu ntùn dun bwe, ndù o ke bèn naṅ bwe là, ngù ntôntse netswe' mi o ke' bèn ntswe' là, ngù ba nkùa boa nten mi o ke' bèn mbwe là. Ndùs'o nsi jù kà ywèt là,

¹²mb'a bwô ndù o zete nelagte Tshùaben z'a na' nsô o ntùm ngô Egipto, ndà kuan nà.

¹³O nsi bwôg Tshùaben Nsi o, ke fa' yi, ke lo' lén se kàn mfe yi.

¹⁴Bin ke nsi nèn mbaṅ tsemo' nsi, netèt nsi ntumntum tse bo lam zin mbum nà;

¹⁵nummbe Tshùaben Nsi o b'a Nsi lànghe'e netèl o me Israél, yantù Tshùaben Nsi o ghù nekam num o, a biagt'o num nsitsha'a.

¹⁶Bin ke nsi laṅte Tshùaben Nsi zin, mba bin na' ndaṅt'é Masa là.

¹⁷Là bin nsi ze nkàn Tshùaben Nsi zin, ntag mi boa ntshù' mi mi a kite bin nà.

¹⁸O nsi ke ghù nu ndaṅndaṅ bo numebwô num miag Tshùaben. A nsi tshùa ndùlala o be mebwô; ntsho ntùm ngô ntùn ze Tshùaben na' nsaṅlaṅ num bwe tà tsho nefà wù là.

¹⁹A nsi be ghù ndùlala ndù a ta' ghakeban tsho fa mbwe o mba kua' tu wul i Tshùaben na' ntshob là.

²⁰A be z'a be mo' lé'njù nshum o bètt'o ndù: Men ntage, men ntshù' boa men nkàn mi Tshùaben Nsi be kite bin nà bagt'a ndùke là, mb'o nsi bùnte yi ndù:

²¹Bag lo be kuan Faraon mà Egipto, Tshùaben lo' bu i ze neta nsô yag yi Egipto.

²²Tshùaben lo ghù ba nsà boa tshu netshàm tse ndùb, ts'a bag neshu là num Egipto, num Faraon mba num tunndà i be kua' num miag mage.

²³A lo ghù bag tum bwe, a lo' yag nse' yi ntùm ngô z'a na' nka' ba tà tshag ntshob nsaṅlaṅ bwe ndù a' fà bag là.

²⁴Tshùaben lo tshob bag ndù bag ze njoṅ ntshù' mi fa, nke mbwôg yi Tshùaben Nsi be, a tshùa ndùlala be ke mbe be mebwô njoṅ ndù fa, a bèn nkabte yôg be mb'a tshwèt ngù sènni là.

²⁵Be tù' ben netsine, a be ze be ke nze kua' men nkàn nà mbwe Tshùaben Nsi be kua' mb'a tshob be là.