Read Medumba Nebwôgte 7 Bible Online

Nebwôgte 7 - Medumba bible

Nebwôgte 7

¹Ndùse Tshùaben Nsi o nsi ghù o tsho ntùm ngô z'a nsi tù' yu, mbe be ndù a ta' ngô yàm num miag mu: Ba Hétia, ba Guirgas, ba Amor, ba Kanaan, ba Férésia, ba Hévia boa ba Yébusia, tshen ngô sammbàa là ts'a yàm mbèn nta ntshùa o là me Israél;

²ndùse Tshùaben Nsi o nsi swèn yub mum mbu mu k'o tshùa yub là, o nsi tam bu' num bo, ke wat sàm kàn bin à bo, ke ko ndèn mub num sàm nu.

³Kà bin à tshen ngô là so mbu ntùm nu nandà. O ke nsi fà ngonngon tsho tshob nshum, ke bèn mbètte tshob ngonngon num tsho nshum;

⁴nummbe mba bo nsi sô tsho nshum num àm, bo tù' ke mfa' a tsemo' nsi. Yen ngelaṅ nà yantù Tshùaben nsi kam num bin, a biagte zin be kua' ndende me Israél.

⁵Tshù mb'a bwô ndù bin ghù num bo li. A bwô bin sate ntômbwôg le'te mube, mbe'te neto tshobe, mbe'te bebun tshobe, nton mfuni tshu tse bo kom nà fa mbwôge.

⁶Nummbe wù Israél b'a nzwit mèn nelàne, mb'a nzwit Tshùaben Nsi o; Tshùaben Nsi o lo tsho' o ndù o be nzwit z'a b'a ze tù' i là, mbe ndùlala netèt njoṅ nzwit fa ts'a be num nsitsha' là.

⁷A ke' b'a mbe bin tshùa tsemo' nzwit fa neyàm kà Tshùaben nso ntù num bin, ntsho' zine. Bin yen mbe bin b'a metsit nzwit netèt njoṅ tsemo' fa.

⁸Là, mba Tshùaben be nkô zin nà, a lo lo' bu i ze neta nsô zin yi, ntshu' zin ndà kuan, ntùm mbu Faraon mfen Egipto. A ghù ndùlal'a num nezwiagte nka'ni mi a na' ngù tà tsin nà.

⁹Lèn kua' mebwô ndù Tshùaben Nsi o bèn mbe Nsi nenùn z'a be ngakondèn nà num ntshùb kàn se num zwiaṅ ntsha' mbùm, num ben tse bo be nkô i, mbèn nke nze nkàn mi là.

¹⁰Là Tshùaben num ndab bu tu ben tse bo be mbàn i là ndaṅndaṅ, mbiagte yube; a ke' be tshù nsi num mèn z'a be mbàn i là, nke ndab tu ng'é be kua' ndaṅndaṅ.

¹¹Ndùlala ke nze nkàn, ntshù' boa ntag mi me kite wù sènni là, nke ntshùb njoṅ i fa.

¹²A be ze bin ju' ntag men nà, a be ze bin tshùb men ntag là mbèn nke nze njoṅ i fa là, mba Tshùaben Nsi o nsi tshùb kàn se bo kondèn z'a na' nsaṅlaṅ bwe tà tsho num o là me Israél.

¹³A nsi kô o, tam ntse wù bèn ghù o yàme; a nsi tam ntse ju z'a tum zwe' o là, tam ntse num ju z'o ywit ntùm tsha' là, ngefele, ndu' mu bo mfèt mu, tam ntse nyàm tsho tse ndùb boa tse nke'e, ghù ndùlal'a ntùm ngô z'a na' ntshob nsaṅlaṅ bwe tà tsho nefà wù là.

¹⁴A nsi tam ntse wù tshùa tsemo' ngô. Sàm mèn, mandum ke mènnzwi lo ke nsi be kebwe netèl o; sàm nyàm o ke nsi be kebwe.

¹⁵Tshùaben nsi sô njoṅ ngokèt fa netèl o; a ke nsi tum sàm bagkèt ngokèt ts'a Egipto, tse tu wul o lèn nà netèl o. Là, a nsi lo' tshen ngokèt là biagte ben tse bo tshwèt mbàn o là yi.

¹⁶Israél, o nsi mi njoṅ ntumntum fa tse Tshùaben Nsi o nsi swèn yub wù là, ke tshàm ndèn mube; o ke nsi fa' nsi tshobe, nummbe mb'a nsi be ywi' wù.

¹⁷Be mo' ndù o tshob ntù o ndù: Tshen ngô li yàm neshu; be me ta' yub à ndùke?

¹⁸Kà bwôg yube. Kwimte ju ze Tshùaben Nsi o na' ngù Faraon mba ba Egipto fa là.

¹⁹Kwimte laṅte ndùbndùb tse miag mu yene, nsà boa tshu netshàme, bu i ze neta z'a nyit, ndùse yi Tshùaben Nsi o ghù o tum nà. Tshùaben Nsi o a' ghù be ndaṅndaṅ num njoṅ ntumntum fa ts'o tshwèt mbwôg là.

²⁰Tshùaben Nsi o a' tum mba màkùakoṅ, k'a biagte mba tshen nà tse be bo tum ntshu vùkob nkù ndem mbwe o là.

²¹Kà mi mvètte num bo, nummbe Tshùaben Nsi o b'a netèl o, yi z'a be Nsi ndùb, Nsi nekuni là.

²²Tshùaben Nsi o a' ta' tshen ngôngô là num miag mu be mén nda'nda'; b'o ke ta' yub yoṅ ntshù', mbwôg ndù kà nyàm tshwèt yàm, ndo nsi num o.

²³Tshùaben Nsi o nsi swèn yub mum mbu mu; bo a' zwiaṅte, tà nkum ndùse bo nsi biagte yub fa là.

²⁴A nsi swèn fenfen tshob mum mbu mu, o ghù lén sob bi ze bam kamànyam, sàm mèn netèt bo ke nsi bù' tu nsi mbwe o, tà nkum ndùs'o nsi biagte njoṅ yub fa là.

²⁵Bin nsi ton mfuni tshu nekome, tse nsi tshob ntùm mbwôge. Kà te lag ghe'te num silba ke gol lo tse tshen tshu nekom nà ghù num bo là, mbwôg ndù kà tshen tshu là tù' ywi' wù; nummbe tshen tshu nekom nà b'a tshùaya'nu num miag Tshùaben Nsi o me Israél.

²⁶O ke nsi lo' sàm tshùaya'nu tsho yi ntùm tunndà o, ndùlala ndù kà bo tam ntshù' num o mba yen ju là là; o nsi ke bàn yen ju là, lo' i mba tshùaya'nu là, nummb'a b'a ju ze bo tam ntshù' bwe là.